ނަަތަންޔާހޫ މަަރުވެފައިވާ ކަމަށް ބުނާ ވާހަކަ އޭނާގެ އޮފީހުން އެންމެ ފަހުން ދޮގު ކޮށްފި

އެމެރިކާ އާއި އިޒްރޭލް އިން އީރާާންއާ ދެކޮޅަށް ކުރިއަށް ގެންދާ ހަނގުރާމައިގައި، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ މަރުވެފައިވާ ކަމަށް ބުނެ ދެކެވެމުން އަންނަ ވާހަކަތައް އޭނާގެ އޮފީހުން ދޮގު ކޮށްފި އެވެ. 

ނަތަންޔާހޫ މަރުވެފައިވާ ކަމަށް ބުނެ ސޯޝަލް މީޑިއާގައި އަންނަނީ އެކި ވާހަކަތައް ދައްކަމުންނެވެ. އެގޮތުން ނަތަންޔާހޫ މަރުވެފައިވާ ކަމަށް ބުނާ ވާހަކައާ ގުޅޭ ގޮތުން، އަނަޑޯލޫ އެޖެންސީގެ ނޫސްވެރިޔަކު ސުވާލު ކުރުމުން ނަތަންޔާހޫގެ އޮފީހުން ބުނެފައި ވަނީ، އޭނާގެ ޙާލު ކޮޅު ރަނގަޅު ކަމަށެވެ. އަދި ނަތަންޔާހޫ މަރުވެފައިވާ ކަމަށް ބުނެ ދެކެވެމުން އަންނަ ވާހަކަ އަކީ އެއްވެސް އަސާސެއް ނެތް ވާހަކަ ތަކެއް ކަމަށާއި، އެއީ ދޮގު ޚަބަރު ތަކެއް ކަމަށް ވެސް އެ އޮފީހުން ވަނީ ބުނެފަ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަމަލާ ދިނުމާ ގުޅިގެން، ރައްދުގައި އީރާން ވެސް ގެންދަނީ ގިނަ ހަމަލާ ތަކެއް ދެމުންނެވެ. ދާދި ފަހުން ނަތަންޔާހޫ އޭނާގެ ސޯޝަލް މީޑިއާ އެކައުންޓުގައި ހިއްސާ ކޮށްފައިވާ ވީޑިއޯ މެސެޖަކީ، އޭއައި ބޭނުން ކޮށްގެން އުފައްދާފައިވާ މަންޒަރު ތަކެއް ކަމަށް ގިނަ ބަަޔަކު ތުހުމަތު ކޮށްފައިވެ އެވެ. ޚާއްސަކޮށް އެ ވީޑިއޯގެ 35 ވަނަ ސިކުންތުގައި ނަތަންޔާހޫ އޭނާގެ އަތް އުފުލާލާ ވަގުތު، އޭނާގެ ކަނާއަތުގެ ކުޑަވާ އިނގިލި ކައިރިން އިތުރު އިނގިޔެއް، ނުވަތަ ހަ ވަނަ އިނގިއްޔެއް ފެންނަ ކަމަށް ގިނަ ބަޔަކު ބުނެފައިވެ އެވެ. ގިނަ ބަޔަކު ބުނެފައި ވަނީ އެއީ އޭއައި ބޭނުން ކޮށްގެން ވީޑއޯ އުފައްދާއިރު އާންމުކޮށް ދިމާވާ "ފިންގާ ގްލިޗް"އެއް ކަމަަށެވެ. 

މީގެ އިތުރުން ވެސް ނަތަންޔާހޫއާ މެދު ގިނަ ސުވާލު ތަކެއް އުފެދިފައިވާއިރު، ބޮޑު ވަޒީރުގެ އޮފީހުން ތަކުރާރުކޮށް ބުނެފައި ވަނީ، އޭނާގެ ޞިއްޙީ ޙާލު ކޮޅު ރަނގަޅު ކަމަށެވެ. އަދި ނަތަންޔާހޫ ގެންދަވަނީ ބޮޑު ވަޒީރުގެ މަސްއޫލިއްޔަތު އަދާ ކުރައްވަމުން ކަމަށާއި، ނަތަންޔާހޫ ހުންނެވީ ގަދަވެ ސަލާމަތުން ކަމަށް ބުނެފައިވެ އެވެ. މީގެ ކުރިން ސޯޝަލް މީޑިއާގައި ވެސް ވަރަށް ޙަރަކާތްތެރި މީހެއްގެ ގޮތުގައި ފާހަގަވެފައިވާ ނަތަންޔާހޫ، މިހާރު ޕޯސްޓު ކުރައްވަނީ ވަރަށް މަދުންނެވެ. އަދި އާންމުންގެ ތެރެއަށް ނިކުންނަވާ ވަގުތު ވެސް ވަނީ ވަރަށް ބޮޑަށް މަދު ކުރައްވައިފަ އެވެ.