މަރުވެފައިވާ ކަމަށް ބުނާ ވާހަކަ ދޮގު ކުރުމަށް، ނަތަންޔާހޫ ވީޑިއޯއެއް އާންމު ކޮށްފި

އެމެރިކާ އާއި އިޒްރޭލް އިން އީރާާންއާ ދެކޮޅަށް ކުރަމުން އަންނަ ހަނގުރާމައިގައި އީރާން އިން ދެމުން އަންނަ ހަމަލާ ތަކުގައި އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ މަރުވެފައިވާ ކަމަށް ބުނާ ވާާހަކަ ދޮގު ކުރުމަށް، އޭނާ ވީޑިއޯ އެއް ޕޯސްޓު ކޮށްފި އެވެ. 

އާދީއްތަ ދުވަހު ނަތަންޔާހޫ ވަނީ އޭނާގެ ސޯޝަލް މީޑިއާ އެކައުންޓު ތަކުގައި އެ ވީޑިއޯ އާންމު ކޮށްފަ އެވެ. އެ ވީޑިއޯ އިން ފެންނަނީ ގުދުސްގެ ބޭރުގައި ހުންނަ ކެފޭއެއްގައި އޭނާ ކޮފީއެއް ބޯން ހުންނަ މަންޒަރެވެ. އަދި އެ ވަގުތު އޭނާ މީހަކާ ވާހަކަ ދައްކާ މަންޒަރު އަދި އަޑު ވެސް އިވެ އެވެ. 

އެ ވީޑިއޯގައި ނަތަންޔާހޫގެ އެހީތެރިޔަކު ވަނީ އޭނާ މަރުވެފައިވާ ކަމަށް ބުނެ ފަތުރަމުން އަންނަ ވާހަކަތަކާ ގުޅޭ ގޮތުން ސުވާލު ކޮށްފަ އެވެ. އެ ސުވާލު ކުރުމުން ނަތަންޔާހޫ ވަނީ، އިޒްރޭލްގެ ބަހުން މަޖާޒީ ލަފުޒެއް ބޭނުން ކޮށްގެން ޖަވާބު ދީފަ އެވެ. ކޮފީ ތަށި ހިފަމުން ނަތަންޔާހޫ ބުނެފައި ވަނީ، އޭނާ އަކީ ކޮފީ އަށް މަރުދޭ މީހެއް ކަމަށާއި، އޭނާގެ ޤައުމުގެ ރައްޔިތުން އޭނާ ދެކެ އިންތިހާ އަށް ލޯބިވާ ކަމަށެވެ. 

ރޮއިޓާސް އިން ވަނީ މި ވީޑިއޯގެ ޞައްޙަކަން ކަށަވަރު ކޮށްފަ އެވެ. އެގޮތުން އެ އެޖެންސީ އިން ވަނީ މި ވީޑިއޯ ނަގާފައިވަ ތަނާއި، ވީޑިއޯ ނަގާފައިވާ ތާރީޚު ޞައްޙަ ކަމަށް ބުނެފަ އެވެ. އެގޮތުން ވީޑިއޯ އިން ފެންނަ ކެފޭގެ އެތެރޭގެ މަންޒަރު ތަކަކީ ކުރީގެ ފޮޓޯތަކާ ދިމާވާ މަންޒަރު ތަކެއް ކަމަށާއި، އަދި އެ ކެފޭ އިން އާދީއްތަ ދުވަހު އާންމު ކުރި އެހެން ފޮޓޯތަކާއި ވީޑިއޯ ތަކުން ވެސް ނަތަންޔާހޫ ެ ކެފޭ އަށް ޒިޔާރާތް ކޮށްފައިވާކަން އިނގޭ ކަމަށް ރޮއިޓާސް އިން ބުނެފައިވެ އެވެ. 

މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފެށި ފަހުން ނަތަންޔާހޫ ވަނީ، ހަމަލާތައް އަމާޒުވި އިޒްރޭލްގެ ދެ ރަށެއްގެ އިތުރުން، ހޮސްޕިޓަލަކާއި، ބަނދަރަކާއި އަދި އަސްކަރީ މަރުކަޒު ތަކަކަށް ވެސް ޒިޔާރާތް ކޮށްފަ އެވެ. ނަމަވެސް، މީގެ ތެރެއިން އެއްވެސް ޒިޔާރަތެއްގައި މީޑިއާ ތަކަށް ފުރުސަތު ދީފައި ނުވާއިރު، ސޯޝަލް މީޑިއާގައި އާންމު ކޮށްފައި ވަނީ ބޮޑު ވަޒީރުގެ އޮފީހުން ތައްޔާރު ކޮށްފައިވާ ވީޑިއޯ ތަކެވެ.