"މެސީ ކަޕް"ގެ ނަމުގައި ފުޓުބޯޅަ މުބާރާތެއް ބާއްވަނީ

އެމެރިކާގެ އިންޓަ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮަނަލް މެސީ، އޭނާގެ ނަމުގައި ފުޓުބޯޅަ މުބާރާތެއް ބާއްވަން އިއުލާން ކޮށްފި އެވެ.

"މެސީ ކަޕް"ގެ ނަމުގައި ކުރިއަށް ގެންދާ މި މުބާރާތް ޚާއްސަ ކޮށްފައި ވަނީ 16 އަހަރުން ދަށުގެ އުމުރުފުރާ އަށެވެ. މުބާރާތުގައި އަށް ޓީމެއް ވާދަ ކުރާނެ އެވެ. ޖުމުލަ 18 މެޗު ކުޅޭ ގޮތަށް މުބާރާތް ރާވާފައިވާއިރު، މުބާރާތް ކުރިއަށް ގެންދާނީ މިއަހަރުގެ ޑިސެމްބަރު މަހުގެ ނުވަ ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ.

ހަ ދުވަހުގެ މުއްދަތަކަށް ކުރިއަށް ގެންދާ މި މުބާރާތް އޮންނާނީ އެމެރިކާގެ ފްލޮރިޑާގަ އެވެ. މުބާރާތުގައި ބައިވެރިވާ ޓީމު ތަކުގެ ތެރޭގައި ޗެލްސީ، މެންޗެސްޓަރ ސިޓީ، އިންޓަ މިއާމީ، ބާސެލޯނާ، ރިވާ ޕްލޭޓް، އިންޓަ މިލާން، ނެވެލްސް އޯލްޑް ބޯއީސް އަދި އެތުލެޓިކޯ މެޑްރިޑް ހިމެނެ އެވެ.

މުބާރާތުގެ މެޗުތައް ކުޅުމަށް ހަމަޖެހިފައި ވަނީ ޕޯޓް ލޯޑަޑޭލްގައި ހުންނަ މިއާމީގެ ޗޭސް ސްޓޭޑިއަމްގަ އެވެ. މިއަހަރު ފަށާ މި މުބާރާތް، ކޮންމެ އަހަރަކު ވެސް ދެން ކުރިއަށް ގެންދާނެ ކަމަށް މީޑިއާ ތަކުގައި ވަނީ ބުނެފަ އެވެ.

މުބާރާތް އިއުލާން ކުރަމުން، މެސީ އޭނާގެ އިންސްޓަގްރާމް އެކައުންޓުގައި ބުނެފައި ވަނީ، މިއަހަރުގެ ޑިސެމްބަރު މަހުގެ ތެރޭގައި މިއާމީގައި ދުނިޔޭގެ އެންމެ މޮޅު ކުލަބު ތަކުގެ ޒުވާން ޓީމުތަކަށް ބާއްވާ ފުޓުބޯޅަ މުބާރާތެއް އޮންނާނެ ކަމަށެވެ.

މި މުބާރާތުގެ ސަބަބުން ކުޅިވަރުގެ މުސްތަޤުބަލު ފެންނާނެ ކަމަށާއި، އެއީ ހަމައެކަނި މެޗުތަކެއް ކުޅުމަށް ބާއްވާ މުބާރާތެއް ނޫން ކަމަށް ވެސް ބުނެފައިވެ އެވެ. މުބާރާތުގެ އިތުރުން، އެހެނިހެން ގިނަ ޙަރަކާތްތަތަކެއް ވެސް އެ ދުވަސްތަކާ ދިމާކޮށް ކުރިއަށް ގެންދިޔުމަށް ވަނީ ރާވައިފަ އެވެ.

މެސީ ކަޕްގެ ނަމުގައި ކުރިއަށް ގެންދާ މުބާރާތުގެ ހުރިހާ އިންތިޒާމު ތަކެއް ހަމަޖައްސަނީ، މެސީގެ ޕްރޮޑަކްޝަން ކުންފުނި 525 ރޮސާރިއޯ އިންނެވެ.

މުބާރާތާ ގުޅޭ ގޮތުން އެ ކުންފުނީގެ ސީއީއޯ ޓިމް ޕަސްޓޯ ވިދާޅުވެފައި ވަނީ އެ މުބާރާތަކީ، ހުނަރުވެރި ކުޅުންތެރިން އުފެއްދުމާއި، ޒުވާން ކުޅުންތެރިންނަށް ފުރުސަތު ހޯދުމަށް ބާއްވާ މުބާރާތެއް ކަމަށެވެ. ޚާއްސަކޮށް ދަނޑު މަތީގެ އިތުރުން، ދަނޑުން ބޭރުގައި ވެސް އުޅުންތަކާއި، ގުޅުން އިތުރު ކުރުމަށް އަމާޒު ކޮށްފައިވާ ކަމަށް އޭނާ ވިދާޅުވި އެވެ.

މުބާރާތުގައި ބައިވެރިވާ އަށް ޓީމު، ކޮންމެ ގުރޫޕެއްގައި ހަތަރު ޓީމު ހިމެނޭހެން ދެ ގުރޫޕުކަށް ބަހާލާނެ އެވެ. އެއަށްފަހު ގުރޫޕް ސްޓޭޖުގައި ކޮންމެ ޓީމެއް ކޮންމެ ޓީމަކާ ބައްދަލު ކުރުމަށް ފަހު، ދެ ގުރޫޕުގެ އެންމެ މަތިން ޕޮއިންޓު ލިބޭ ދެ ޓީމު ދާނީ ޕްލޭ އޮފަށެވެ. ޕްލޭ އޮފް އިން މޮޅުވާ ދެ ޓީމަށް މުބާރާތުގެ ފައިނަލްގެ ޖާގަ ލިބޭނެ އެވެ.

ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ، އަށް ފަހަރު ހޯދާފައިވާ މެސީ އަކީ މިހާތަނަށް ފުޓުބޯޅައިގައި އުފެދުނު އެންމެ މޮޅު ކުޅުންތެރިޔާ ކަމަށް ގިނަ ބަޔަކު ޤަބޫލު ކުރާ ކުޅުންތެރިޔާ އެވެ. މިއީ މެސީގެ ނަމުގައި އޭނާ ފުޓުބޯޅަ މުބާރާތެއް ބާއްވާ ފުރަތަމަ ފަހަރެވެ.