އެމެރިކާގެ އިންޓަރ މިއާމީ އަށް ކުޅެމުން އަންނަ ސްޕެއިންގެ ޖޯޑީ އަލްބާ، މިހާރު ކުރިއަށްދާ ސީޒަނަށް ފަހު ފުޓުބޯޅަ ކުޅުން ހުއްޓާލަން ނިންމައިފި އެވެ.

އުމުރުން 36 އަހަރުގެ ކުޅުންތެރިޔާ އިންޓަރ މިއާމީ އަށް ބަދަލުވީ 2023 ވަނަ އަހަރު އެވެ. ބާސެލޯނާ ދޫކޮށްލުމަށް ފަހު ޖޯޑީ އަލްބާ އިންޓަރ މިއާމީ އަށް ބަދަލުވީ އެއް އަހަރާ ބައިގެ އެއްްބަސްވުމެއްގެ ދަށުންނެވެ. އެހެން ނަމަވެސް، މިދިޔަ އަހަރުގެ ފަހު ކޮޅު އޭނާ ވަނީ މިއާމީގެ އެއްބަސްވުން އައު ކޮށްފަ އެވެ.

އެ އެއްބަސްވުމުގެ މުއްދަތު ހަމަވާނީ މިހާރު ކުރިއަށްދާ މޭޖާ ލީގު ސޮކާ (އެމެރިކާ ލީގު)ގެ ސީޒަންގެ ނިޔަލަށެވެ. އެއާއެކު ޖޯޑީ އަލްބާ ރަސްމީކޮށް ފުޓުބޯޅަ ކުޅުން ހުއްޓާލާނެ އެވެ. ފުޓުބޯޅަ ކުޅުން ހުއްޓާލަން ނިންމާފައިވާކަން އިއުލާން ކުރިއިރު، ޖޯޑީ އަލްބާ ވަނީ މިހާތަނަށް ގިނަ ކާމިޔާބީ ތަކެއް ހޯދައިފަ އެވެ.

ޖޯޑީ އަލްބާ ބުނެފައި ވަނީ ފުޓުބޯޅަ އިން އޭނާ އަށް ހުރިހާ ކަމެއް ޙާސިލު ކުރެވިއްޖެ ކަމަށެވެ. އެހެންކަމުން މިހާތަނަށް އައިއިރު އޭނާ އަށް އިރުޝާދު ދިން ކޯޗުންނާއި، އޭނާ އާއެކު ކުޅެފައިވާ ކުޅުންތެރިންނާއި، ކޯޗިން އޮފިޝަލުން އަދި އިދިކޮޅަށް ކުޅެފައިވާ ކުޅުންތެރިންނަށް ވެސް ޝުކުރު އަދާ ކުރަން ބޭނުންވާ ކަމަށް އޭނާ ބުންޏެވެ.

މީގެ އިތުރުން ޒުވާން އުމުރުގައި ފުޓުބޯޅަ ކުޅެން ފެށި ކުލަބާއި، ސީނިއާ ކެރިއަރުގައި އެންމެ ފުރަތަމަ ކުޅުނު ކުލަބަށް ޚާއްސަ ޝުކުރެއް އޮންނާނެ ކަމުގައި ޖޯޑީ އަލްބާ ވަނީ ބުނެފަ އެވެ. އަލްބާ ވަނީ އޭނާގެ ކެރިއަރުގައި ގިނަ ކާމިޔާބީތަކެއް ހޯދި ސްޕެއިންގެ ބާސެލޯނާ އަކީ، އޭނާގެ މުޅި ޙަޔާތް އެ ކުލަބަކަށް އޮންނާނެ ކުލަބު ކަމަށް ބުނެފަ އެވެ.

ޚާއްސަކޮށް ބާސެލޯނާގައި ހޭދަ ކުރި މުއްދަތަކީ އެތައް ހަނދާން ތަކެއް ކަމަށާއި، އެ ހަނދާން ތަކަކީ ހިތުން ފޮހެލަން އުނދަގޫ ހަނދާން ތަކެއް ކަމަށް އޭނާ ބުންޏެވެ. ހަމަ އެހެންމެ، ސްޕެއިންގެ ޤައުމީ ޓީމުގައި ހޭދަ ކުރި މުއްދަތާއި، ޤައުމީ ޓީމާ އެކު ހޯދިފައިވާ ކާމިޔާބީ ތަކާ މެދު އުފާވާ ކަމަށް ވެސް އޭނާ ބުނެފައިވެ އެވެ.

އިތުރަށް އަލްބާ ވަނީ މިހާރު އޭނާ ކުޅެމުން އަންނަ މިއާމީ އިން އޭނާ އަށް ފުރުސަތު ދިން ކަމަށްޓަކައި އެ ކުލަަބަށް ވެސް ޝުކުރު އަދާ ކޮށްފަ އެވެ. ޚާއްސަކޮށް އޭނާގެ ކެރިއަރުގެ ފަހު ދުވަސްތައް މިއާމީގައި ހޭދަ ކުރަން ލިބުނު ފުރުސަތުގައި އެ ޓީމުގެ ކުޅުންތެރިންނާއި، ސަޕޯޓަރުންގެ ފަރާތުން އޮތް ލޯބި ފާހަގަ ކުރާ ކަމަށް ޖޯޑީ އަލްބާ ވަނީ ބުނެފަ އެވެ.

އަލްބާ ވަނީ އޭނާގެ ކެރިއަރުގައި ބާސެލޯނާގައި 11 ސީޒަން ހޭދަކޮށްފަ އެވެ. އެ މުއްދަތުގެ ތެރޭގައި އޭނާ ވަނީ ބާސެލޯނާ އަށް ކުޅެދިން 459 މެޗުގައި 27 ލަނޑު ޖަހައިފަ އެވެ. އަދި އެ ކުލަބާ އެކު އޭނާ ވަނީ 17 ތައްޓެއް ވެސް ކާމިޔާބު ކޮށްފަ އެވެ.

މިހާރު ކުޅެމުން އަންނަ މިއާމީ އާއެކު ހޭދަ ކޮށްފައިވާ ތިން ސީޒަންގެ ތެރޭގައި އަލްބާ ވަނީ އެ ކުލަބަށް ކުޅެދިން 95 މެޗުގައި 14 ލަނޑު ޖަހައިފަ އެވެ. އަދި މިއާމީ އާއެކު އޭނާ ވަނީ ދެ ތައްޓެއް ވެސް ކާމިޔާބު ކޮށްފަ އެވެ.

މީގެ އިތުރުން ސްޕެއިންގެ ޤައުމީ ޓީމަށް އަލްބާ ވަނީ 93 މެޗު ކުޅެދީ ނުވަ ލަނޑު ޖަހައިފަ އެވެ. އަދި ޤައުމީ ޓީމާ އެކު އޭނާ ވަނީ ޔޫރޯ ފުޓުބޯޅަ މުބާރާތުގެ އިތުރުން، ޔުއެފާ ނޭޝަންސް ލީގު ވެސް ކާމިޔާބު ކޮށްފަ އެވެ.