އެެމެރިކާގެ އިންޓަ މިއާމީ އަށް ކުޅެމުން އަންނަ ސްޕެއިންގެ ސާޖިއޯ ބުސްކެޓްސް، ފުޓުބޯޅަ ކުޅުން ހުއްޓާލަން ނިންމާފައިވާ ކަމަށް އިއުލާން ކޮށްފި އެވެ.

ފުޓުބޯޅަ ކުޅުން ހުއްޓާލަން ނިންމާފައިވާ ކަމަށް ބުސްކެޓްސް އިއުލާން ކޮށްފައި ވަނީ އޭނާގެ އިންސްޓަގްރާމްގައި ކޮށްފައިވާ ޕޯސްޓެއްގަ އެވެ. ބުސްކެޓްސް ބުނެފައި ވަނީ، އޭނާގެ ފުޓުބޯޅަ ކެރިއަރުގައި އެހީތެރިކަން ދީފައިވާ އެންމެހާ ފަރާތްތަަކަށް ވެސް ޝުކުރު އަދާ ކުރާ ކަމަށެވެ.

އެކަން އިއުލާން ކުރަމުން ބުސްކެޓްސް ބުނެފައި ވަނީ، ރަސްމީ ފުޓުބޯޅަ އިން ރިޓަޔާ ކުރަންވީ ވަގުތު ޖެހިފައިވާ ކަމަށް ޤަބޫލު ކުރާ ކަމަށެވެ. ފުޓުބޯޅަ އަކީ އަބަދު ވެސް އޭނާގެ އެންމެ ބޮޑު ހުވަފެން ކަމަށް ފާހަގަކޮށް ބުސްކެޓްސް ބުނެފައި ވަނީ، 20 އަހަރުގެ އެތައް ހަނދާންތަކެއް އެކުލެވިގެންވާ ކެރިއަރު ނިމުމަކަށް ގެންނަންވީ ވަގުތު ޖެހިފައިވާ ކަމަށެވެ.

ބުސްކެޓްސް ބުނީ އޭނާ ފުޓުބޯޅަ ކުޅުން ހުއްޓާލަނީ ވަރަށް ބޮޑު އުފަލަކާ އެކު ކަމަށެވެ. ޚާއްސަކޮށް އޭނާގެ ކެރިއަރުގެ ދުވަސްތަކާ މެދު ހިތްހަމަ ޖެހޭ ކަމަށާއި، ކެރިއަރާ މެދު ވަރަށް ބޮޑަށް ފަޚުރުވެރިވާ ކަަމަށް ބުސްކެޓްސް ބުންޏެވެ. އެހެންކަމުން އޭނާ އާއެކު ކުޅުނު ކުޅުންތެރިންގެ އިތުރުން، އިރުޝާދު ދިން ކޯޗުން އަދި ކެރިއަރުގައި ހިއްސާވެފައިވާ އެންމެނަށް ވެސް ބުސްކެޓްސް ވަނީ ޝުކުރު އަދާ ކޮށްފަ އެވެ.

ފުޓުބޯޅަ ކުޅުން ހުއްޓާލަން ނިންމާފައިވާކަން އިއުލާން ކުރިއިރު، ބުސްކެޓްސްގެ އުމުރުން މިހާރު 37 އަހަރެެވެ. ބުސްކެޓްސް އޭނާގެ ސީނިއާ ކެރިއަރު ފެށީ ސްޕެއިންގެ ބާސެލޯނާ އިންނެވެ. ބާސެލޯނާގައި ހޭދަ ކުރި 15 ސީޒަންގެ ތެރޭގައި ބުސްކެޓްސް ވަނީ އެ ކުލަބަށް ކުޅެދިން 722 މެޗުގައި 18 ލަނޑު ޖަހައިފަ އެވެ. އަދި ބާސެލޯނާ އާއެކު ވަނީ 32 ތައްޓެއް ވެސް ކާމިޔާބު ކޮށްފަ އެވެ.

ބާސެލޯނާ ދޫކޮށްލުމަށް ފަހު، 2023 ވަނަ އަހަރު އޭނާ ބަދަލުވީ އިންޓަ މިއާމީ އަށެވެ. މިއާމީ އާއެކު ބުސްކެޓްސް ސޮއި ކޮށްފައި ވަނީ ދެ އަހަރާ ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު މިއަހަރުގެ ނިޔަލަށް ހަމަވާނެ އެވެ. އެހެންކަމުން އެއަށް ފަހު، ބުސްކެޓްސް ފުޓުބޯޅަ ކުޅުން ހުއްޓާލާނެ އެވެ. މިއާމީ އަށް މިހާތަނަށް ކުޅެދިން 105 މެޗުގައި ބުސްކެޓްސް ވަނީ އެއް ލަނޑު ޖަހައިފަ އެވެ. އަދި އެ ކުލަބާ އެކު ދެ ތައްޓެއް ކާމިޔާބު ކުރި އެވެ.

ބުސްކެޓްސް ވަނީ ސްޕެއިންގެ ޤައުމީ ޓީމަށް ވެސް ކުޅެފަ އެވެ. އެގޮތުން ޤައުމީ ޓީމަށް އޭނާ ވަނީ 143 މެޗު ކުޅެދީ ދެ ލަނޑު ޖަހައިފަ އެވެ. ޤައުމީ ޓީމާ އެކު ފީފާ ވޯލްޑް ކަޕްގެ އިތުރުން، ޔޫރޯ ފުޓުބޯޅަ މުބާރާތް ވެސް ކާމިޔާބު ކުރި އެވެ.