އަލިފާނުގެ ހާދިސާއާ ގުޅިގެން ވޯޓާސް ރަޖިސްޓަރީގައި ސޮއިކުރުން މެދުކަނޑާލައިފި

ބުދަ ދުވަހުގެރޭ އިންތިޚާބާބެހޭ މަރުކަޒާ ޖެހިގެން ހުރި ގުދަނެއްގައި އަލިފާނުގެ ހާދިސާއެއް ހިނގުމާ ގުޅިގެން، ކުރިއަށް އޮތް އިންތިޚާބުގައި ވޯޓު ދިނުމުގެ ހައްގު ލިބިގެންވާ މީހުންގެ ފައިނަލް ރަޖިސްޓަރީގައި ކެންޑިޑޭޓުންގެ ފަރާތުން ސޮއިކުރުމުގެ މަސައްކަތް އިލެކްޝަންސް ކޮމިޝަނުން ވަގުތީ ގޮތުން މެދުކަނޑާލައިފި އެވެ.

Raajje.mv

އިންތިހާބާ ބެހޭ މަރުކަޒު ކައިރީގައި ހުރި ގުދަނެއްގައި ރޯވެ އަނދަމުންދަނީ

މި ހާދިސާ ހިނގިތާ މާގިނަ އިރުތަކެއް ނުވަނީސް އިލެކްޝަންސް ކޮމިޝަނުން މީޑިއާތަކަށް ފޮނުވި މެސެޖެއްގައި ބުނެފައިވަނީ، އިންތިޚާބާބެހޭ މަރުކަޒު ހުންނަ އިމާރާތާ އިންވެގެން ހުރި ގުދަނެއްގައި އަލިފާން ރޯވުމުގެ ސަބަބުން، ރަޖިސްޓަރީގައި ސޮއިކުރުމުގެ ކަންކަން މިވަގުތަށް ހުއްޓާލާފައިވާ ކަމަށެވެ. އަދި މި މަސައްކަތް އަލުން ފަށާނެ ތާރީޚެއް ފަހުން އިއުލާނު ކުރާނެ ކަމަށްވެސް އެ ކޮމިޝަނުން ބުނެފައިވެ އެވެ.

Advertisement

އިލެކްޝަންސް ކޮމިޝަނުން އިތުރަށް ހާމަކޮށްފައިވާ ގޮތުގައި، މި އަލިފާނުގެ ހާދިސާ ހިނގާފައިވަނީ އިންތިޚާބާބެހޭ މަރުކަޒާ ވަރަށް ކައިރީގައި ކަމަށް ވީނަމަވެސް، އިންތިޚާބާ ގުޅުންހުރި އެއްވެސް މުހިންމު ލިޔެކިއުމަކަށް މިހާތަނަށް އެއްވެސް ގެއްލުމެއް ލިބިފައެއް ނުވެ އެވެ. މިއީ އިންތިޚާބުގެ އިންތިޒާމުތަކަށް ބުރޫއަރާފާނެ ފަދަ ހާދިސާއަކަށް ވާތީ، ރައްކާތެރިކަމުގެ ފިޔަވަޅެއްގެ ގޮތުން އިންތިޚާބާބެހޭ މަރުކަޒުގައި ހުރި ތަކެތި އެހެން ތަނަކަށް ބަދަލުކުރުމުގެ މަސައްކަތް މިހާރު ކުރަމުންދާ ކަމަށްވެސް އެ ކޮމިޝަނުން ބުނެފައިވެ އެވެ.

މި ހާދިސާއާ ގުޅިގެން ސަލާމަތީ ބާރުތަކުން އެ ސަރަހައްދުގައި ހަރަކާތްތެރިވަމުންދާއިރު، އިންތިޚާބާބެހޭ މަރުކަޒުގެ މަސައްކަތްތަކަށް މިކަމުގެ ސަބަބުން ވަނީ ބޮޑެތި ހުރަސްތަކެއް ކުރިމަތިވާނެކަމަށް ބެލެވެ އެވެ. ކެންޑިޑޭޓުންގެ ފަރާތުން ވޯޓާސް ރަޖިސްޓަރީގައި ސޮއިކުރުމަކީ އިންތިޚާބުގެ ސައްހަކަން ކަށަވަރުކުރުމަށް ކުރެވޭ މުހިންމު މަސައްކަތެކެވެ.