އެމްޑީޕީ ގެ ކަންބޮޑުވުންތަކަށް އީސީގެ ޖަވާބު: އެންމެން އިންތިޒާރު ކުރާނީ ކައުންސިލް ވޯޓުގެ ނަތީޖާ އަށް، ރެފަރެންޑަމްގެ ވޯޓު ގުނޭނީ ފަހުން

ކުރިއަށް އޮތް ލޯކަލް ކައުންސިލް އިންތިޚާބާ އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ވޯޓާ ގުޅިގެން އެމްޑީޕީ އިން އިލެކްޝަންސް ކޮމިޝަނުގައި ފާޅުކުރި ކަންބޮޑުވުންތަކަށް އެ ކޮމިޝަނުން ޖަވާބު ދީފި އެވެ. 

އިލެކްޝަންސް ކޮމިޝަނުން އެމްޑީޕީ ގެ ވަގުތީ ޗެއަރޕާސަން އަބްދުއްޣަފޫރު މޫސާ އަށް ފޮނުވި ސިޓީ އެއްގައި ވަނީ އެ ޕާޓީ އިން ހުށަހަޅާފައިވާ ކަންކަމާ މެދު މަޝްވަރާ ކުރުމަށްފަހު އެކަމާ މެދު އަމަލު ކުރުމަށް އެ ކޮމިޝަނުން ނިންމާފައިވާ ގޮތުގެ މައުލޫމާތު ހިއްސާ ކޮށްފަ އެވެ. 

އީސީ އިން ބުނީ އެމްޑީޕީ ގެ ކެންޑިޑޭޓުން ވާދަނުކުރާ ދާއިރާތަކުގައި ޕާޓީގެ އޮބްޒާވަރުން ނެތް ކަމުގެ ކަންބޮޑުވުންފާޅު ކޮށްފައިވާތީ އެ ފުރުސަތު ފަހި ކޮށްދިން ކަމަށެވެ. 

ރާއްޖެ އިން ބޭރުގައި ފޮށި ބެހެއްޓުމުގެ ސީލިންގް ދަށް ކުރުމާއި އަލުން ރީ-ރަޖިސްޓްރީ ކުރުމަށް ފުރުސަތު ދިނުމަށް އެމްޑީޕީ އިން އެދިފައިވާތީ އެކަމާ ގުޅިގެން އީސީ އިން ބުނީ ގާނޫނީ ގޮތުން ކަންކަން ތަރުތީބުވެފައިވާ ގޮތަށް ބަލާއިރު ލިސްޓު އާންމު ކޮށް، ޝަކުވާއަށް ހުޅުވާލެވި، ރީ-ރަޖިސްޓްރީ ކުރުމުގެ ފުރުސަތު ދީފައިވާ ކަމަށެވެ. އަދި ރެފަރެންޑަމް އާ ގުޅިގެން ރާއްޖެއިން ބޭރުގައި ބަހައްޓަން އިއުލާނުކުރި ފޮށިތައް ހިމެނޭހެން ރީ-ރަޖިސްޓްރީ ވުމުގެ ފުރުސަތު ދެވަނަ ފަހަރަށް ހުޅުވާލިކަން ވެސް ފާހަގަ ކޮށްފައި ވެ އެވެ. 

އީސީ އިން ބުނީ މި މަހުގެ 12 ވަނަ ދުވަހު އެމްޑީޕީ އާއެކު ބައްދަލު ވުން ބޭއްވި އިރުވެސް ވޯޓު ލާ މީހުންގެ ފައިނަލް ލިސްޓު އާންމު ކޮށްފައިވުމާއެކު އިންތިޚާބު ބާއްވާ ދުވަހާ ދެމެދު ކުރަން ހުރި ވޯޓު ކަރުދާހާ ގުޅުންހުރި މަސައްކަތްތައް އަދި ލޮޖިސްޓިކްސް ގެ ކަންކަމަށް ބަލާއިރު އިތުރަށް ރީ- ރަޖިސްޓްރީ ވުމުގެ ފުރުސަތު ދެވެން ނެތް ކަމަށެވެ. 

މީގެ އިތުރުން ޚިޔާލު ހޯދުމުގެ އާންމު ވޯޓުގެ ނަތީޖާ ކުރިން އިއުލާނު ކުރަން އެދުނު ނަމަވެސް ތިން އިންތިޚާބު ބާއްވާއިރު ރަށްރަށުގައި ތިބި ކެންޑިޑޭޓުންގެ މަސްލަހަތު ހުރި އަދި އެންމެން އިންތިޒާރު ކުރާ ނަތީޖާ އަކަށް ވާނީ ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތް ކުރާ ކޮމެޓީގެ އިންތިޚާބުގެ ނަތީޖާ އަށް ކަމަށާއި އެހެން ކަމުން ފުރަތަމަ ގުނައި، ނަތީޖާ ތައްޔާރު ކުރާނީ އެ އިންތިޚާބުތަކުގެ ވޯޓު ކަމަށް އީސީ އިން ބުނެފައި ވެ އެވެ. 

އީސީ އިން ބުނީ އެހެން ނަމަވެސް މުޅި ރާއްޖޭގެ ހުރިހާ މަރުކަޒެއް އޮބްޒާވް ކުރުމާއެކު މޮނިޓަރ ކުރުމަށް 8900 އަށް ވުރެ ގިނަ ފަރާތްތައް ހަރަކާތްތެރި ވާނެ ކަމަށާއި 3 ވޯޓުނަގައި، ގުނައި، ނަތީޖާ އިއުލާނު ކުރެވެން ދެން ގިނަ އަދަދެއްގެ ބަޔަކު ކަން ހިނގާ، ނުހިނގާ ގޮތް ބެލުމަށް ހަރަކާތްތެރި ވާނެ ކަމަށް ދެކޭ ކަމަށެވެ. 

ރެފަރެންޑަމް އާ ގުޅިގެން އެ ކޮމިޝަނުން ބުނީ އެކަމަށް މީހުން ހޭލުންތެރި ކުރުމަށް މިހާރު ވެސް މަސައްކަތް ކުރަމުންދާ ކަމަށެވެ. އަދި ޕާޓީތަކަށް ހަމަހަމަ ފުރުސަތު ފަހިކުރުމަށްޓަކައި ޕީއެސްއެމް އާ މުއާމަލާތު ކުރަމުން ދާކަން ވެސް އީސީ އިން ފާހަގަ ކޮށްފައި ވެ އެވެ. 

 އެމްޑީޕީއިން ވަނީ އިންތިޚާބުގެ އިންތިޒާމުތައް ރޭވިފައިވާ ގޮތުން ވޯޓުގެ ސައްހަކަމާމެދު ސުވާލު އުފެދޭ ފަދަ މުހިންމު ހަތަރު ކަމެއް ފާހަގަކޮށްފަ އެވެ.