ޕީއެސްއެމްގެ ވެރިންނާ ބައްދަލުކުރަން ދިއުމުން ރިސެޕްޝަންގެ ކަރަންޓް ކަނޑާލައި އޭސީތައް ނިއްވާލައި، ދާން އަންގައިފި

ދައުލަތުގެ މީޑިއާ، ޕީއެސްއެމްގެ ޚަބަރާއި ކޮންޓެންޓް ގެނެސްދިނުމުގައި ވަކި ފަރާތަކަށް ޖެހިފައިވާ ކަމަށް ބުނެ އެކަމުގެ ކަންބޮޑުވުން ފާޅުކުރުމަށް އެމްޑީޕީގެ ޓީމެއް އެތަނަށް ދިއުމުން، އެ ތަނުގެ މުވައްޒަފުން ވަރަށް ޒިންމާދާރުކަން ކުޑަ ގޮތަކަށް އަމަލުކޮށް ކަރަންޓް ކަނޑާލައި، އޭސީތައް މިއްވައި، ރިސެޕްޝަނުން ނުކުތުމަށް އަންގާފައިވާ ކަމަށް އެމްޑީޕީ އިން ބުނެފި އެވެ.

އެމްޑީޕީ އިން ޕީއެސްއެމްގެ ވެރިންނާއި ބައްދަލުކުރަން ދިޔައީ ހޯމަ ދުވަހުގެ މެންދުރު އެވެ. މިކަމާ ގުޅޭ ގޮތުން އެމްޑީޕީގެ ނައިފަރު ދާއިރާގެ ރައީސް އަބްދުﷲ ރަޝީދު ވިދާޅުވީ، ޕީއެސްއެމްގެ ވެރިންނާ ބައްދަލުކުރުމަށް އެދި އާދީއްޔަ ދުވަހު ސިޓީއެއް ފޮނުވާފައިވާނެ ކަމަށާއި، ނަމަވެސް ހޯމަ ދުވަހު އެ ތަނަށް ދިޔައިރު ވެސް އެ ސިޓީއަށް އެއްވެސް ޖަވާބެއް ލިބިފައި ނުވާ ކަމަށެވެ.

އަބްދުﷲ ރަޝީދު ވިދާޅުވި ގޮތުގައި އެމްޑީޕީން ޕީއެސްއެމްއަށް ދިޔައީ ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ނަގާ ފެންނަ ނުފެންނަ ވޯޓާ ގުޅޭގޮތުން މައުލޫމާތު ދިނުމުގައި ހަމަހަމަ ފުރުސަތު ނުދޭތީ އެވެ. ޚާއްޞަކޮށް ދެ އިންތިޚާބު އެއްކޮށް ބޭއްވުމާ ދެކޮޅަށް ވާހަކަދައްކާ ފަރާތްތަކަށް ފުރުސަތު ނުދީ، ހަމައެކަނި ސަރުކާރުން ބޭނުންވާ ގޮތަށް ކޮންޓެންޓް ގެނެސްދޭތީ އެކަމުގެ ޝަކުވާ ހުށަހެޅުމަށެވެ. ނަމަވެސް، ޕީއެސްއެމްގެ ރިސެޕްޝަނުން ބުނެފައިވަނީ އެއްވެސް ވެރިއަކު އޮފީހުގައި ނެތް ކަމަށާއި، އެއީ ބަންދު ދުވަހެއް ކަމަށެވެ. އެހެންނަމަވެސް، އެމްޑީޕީއަށް މައުލޫމާތު ލިބިފައިވާ ގޮތުގައި އެ ވަގުތުވެސް ޑެޕިއުޓީ މެނޭޖިންގ ޑިރެކްޓަރުންނާއި ބައެއް އިސްވެރިން އޮފީހުގައި ތިއްބެވި އެވެ. އަދި އެމްޑީޕީގެ މެންބަރުން އެތާ ތިއްބާ ޑީއެމްޑީ އެތަނުން ނުކުމެވަޑައިގެންނެވި އެވެ. 

މި ތަނުން ރިސެޕްޝަނުން އަޅުގަނޑުމެންނަށް މި ދެއްވާ މަޢުލޫމާތަކީ، މި ތަނުގައި އެއްވެސް ވެރިއެއް ނެތޭ. މީ ބަންދު ދުވަހެކޭ. އެހެންނަމަވެސް، ރައްޔިތުން, ދައުލަތުގެ މީޑިއާއަކުން ހިނގަމުންދާ ކަންތައްތަކަކަށް ޖަވާބު ހޯދަންވެގެން އަޅުގަނޑުމެން މި ތަނަށް އައީ. އެ ޖަވާބު ނުދީ މި ތަނުގެ އެއްވެސް ވެރިޔަކާ ބައްދަލުނުކޮށް، ވަރަށް ގިނަ ވަގުތުތަކެއް ބައިތިއްބައިގެން، ވަރަށް އުނދަގޫ ދަތި ގޮތަކަށް ކަންކަން ކުރެއްވީ. މި ތަނުން އަޅުގަނޑުމެންނަށް ދަތިއުނދަގޫތަކެއް ކުރަމުން މި ގެންދިޔައީ. އެހެންވީމާ، އަޅުގަނޑުމެން އަދި މިކަން ހުއްޓާލައިގެން ދާ ގޮތަކަށް ނޫން މި ތިބީއަކީ. އަޅުގަނޑުމެން ހަމަ މި ތަނުގެ އިހުތިޖާޖު ވެސް ކުރާނަން. އަދި ކުރިއަށް އޮތް ތަނުގައި މި ބޭފުޅުން ބައްދަލުވާންދެން ނުވަތަ މި ތަނުގައި އަޅުގަނޑުމެންނަށް ހަމަހަމަ ދައުލަތުގެ މީޑިއާއަކުން ދެ ފަރާތަށް ދޭންޖެހޭ ހަމަހަމަ ފުރުޞަތުތައް ދޭންދެން އަޅުގަނޑުމެން އެ މަސައްކަތް ކުރިއަށް ގެންދާނަން.

އެމްޑީޕީގެ ނައިފަރު ދާއިރާގެ ރައީސް އަބްދުﷲ ރަޝީދު 

މި ބައްދަލުވުމަށް އެދި އެމްޑީޕީގެ މެންބަރުން ޕީއެސްއެމްގެ ރިސެޕްޝަން ސަރަހައްދުގައި މަޑުކޮށްގެން ތިއްބާ، އެ ތަނުގެ މުވައްޒަފުން ވަނީ ވަރަށް އިހާނެތިކޮށް އަމަލުކޮށްފައެވެ. އެގޮތުން ރޯދަމަހުގެ އެންމެ ހޫނުގަދަ ވަގުތުގައި އެ ސަރަހައްދުން ކަރަންޓު ކަނޑާލައި، އޭސީތައް ނިއްވާލާފައިވާ ކަމަށް އަބްދުﷲ ރަޝީދު ފާހަގަކުރެއްވި އެވެ. މީގެ އިތުރުން، އެ ތަނުގައި ތިބި މުވައްޒަފުން ވަރަށް ހަޑިހުތުރު ބަހުން މުއާމަލާތްކޮށް، އެތަނުން ނިކުތުމަށް އެތައް ފަހަރަކު އަންގައި، ޒިންމާދާރުކަން ކުޑަ ގޮތަކަށް އަމަލުކޮށްފައިވާ ކަމަށް ވެސް އޭނާ ވިދާޅުވި އެވެ.

އޮފީސް ބަންދުކުރާ ގަޑި ކަމަށްވާ ހަތަރެއް ޖެހުމާއެކު، ފުލުހުން މެދުވެރިކޮށް އެމްޑީޕީގެ މެންބަރުން އެ ތަނުން ނެރުމަށް ވެރިން މަސައްކަތް ކުރެއްވި ކަމަށްވެސް އެމްޑީޕީން ބުނެ އެވެ. އަބްދުﷲ ރަޝީދު ވިދާޅުވީ، ޕީއެސްއެމްގެ މެނޭޖިންގ ޑިރެކްޓަރު މިވަގުތު އުމްރާގެ އަޅުކަމަށް ރާއްޖެއިން ބޭރުގައި ހުންނެވި ނަމަވެސް، މީޑިއާގެ މަސައްކަތްތައް ހިނގަމުންދާ ކަމަށާއި، އެހެންކަމުން ރައްޔިތުންގެ ސުވާލުތަކަށް ޖަވާބުދާރީވާން ޖެހޭނެ ކަމަށެވެ. އަދި އެމްޑީޕީން އެ ތަނުގައި ތިއްބާ، މިއަދުގެ ތާރީޚު ޖަހާފައިވާ ސިޓީއެއް ޑީއެމްޑީ ސޮއިކުރައްވައި ހަވާލުކުރަން އުޅުނު ނަމަވެސް، އެއީ ރަސްމީކޮށް ޕާޓީ އޮފީހަށް ފޮނުވަންޖެހޭ އެއްޗަކަށް ވާތީ އެ ސިޓީއާ ހަވާލުނުވާ ކަމަށް އޭނާ ވިދާޅުވި އެވެ.

ދެން އަޅުގަނޑުމެން މި ތަނުގައި ތިބިއިރުގައި މި ތަނުގައި ތިއްބެވި، ރިސެޕްޝަނުގައި ތިއްބެވި މުވައްޒަފުން ވެސް ވަރަށް ހަޑިހުތުރު ބަހުން ވެސް މުޢާމަލާތުކުރި، ބައެއް ބޭފުޅުން މި ތަނުގައި ތިއްބެވި. އެ ބޭފުޅުން އަޅުގަނޑުމެންނާ ދޭތެރޭގައި އަޅުގަނޑުމެންނަށް މި ތަނުގައި މިކަންތައް ނުކުރެވޭނެކަމާއި، މަސައްކަތަށް ދަތިވާ ކަމަށާއި، އަޅުގަނޑުމެން މިތަނުން ނިކުންނަން ވެސް ދެތިންހަތަރު ފަހަރެއްގައި މަތިން މިތާ ތިބި ސްޓާފުން ވެސް އަޅުގަނޑުމެންނަށް އަންގަމުންދިޔަ. އެހެންވީމާ، ވަރަށް ހުދުމުހުތާރު ގޮތަކަށް ނުވަތަ ޒިންމާދާރުކަން ކުޑަ ގޮތަކަށް މި ތަނުގެ މުވައްޒަފުން ވެސް މަސައްކަތްކުރަމުން މި ގެންދިޔައީ. 

އެމްޑީޕީގެ ނައިފަރު ދާއިރާގެ ރައީސް އަބްދުﷲ ރަޝީދު 

މި މައްސަލައާ ގުޅިގެން މީގެ ދެތިން ދުވަސް ކުރިން އިލެކްޝަންސް ކޮމިޝަނާ ބައްދަލުކޮށް ކަންބޮޑުވުންތައް ހިއްސާކޮށްފައިވާ ކަމަށްވެސް އެމްޑީޕީން ބުނެ އެވެ. އިލެކްޝަންސް ކޮމިޝަނުން މިކަމަށް ހައްލެއް ހޯދައިދޭނެ ކަމަށް ބުނެފައިވީ ނަމަވެސް، މިހާތަނަށް އެދެވޭ ޖަވާބެއް ލިބިފައި ނުވާ ކަމަށް އަބްދުﷲ ރަޝީދު ވިދާޅުވި އެވެ. އިންތިޚާބަށް ބާކީ އޮތް 15 ވަރަކަށް ދުވަހުގެ ތެރޭގައި، ދައުލަތުގެ މީޑިއާއިން ހުރިހާ ފަރާތްތަކަށް ހަމަހަމަ ފުރުސަތު ހޯދައިދިނުމަށް ކުރަންޖެހޭ ހުރިހާ މަސައްކަތެއް ކުރާނެ ކަމަށާއި، ވެރިންނާ ބައްދަލުވަންދެން އިހުތިޖާޖު ކުރިއަށް ގެންދާނެ ކަމަށްވެސް އެމްޑީޕީން ވަނީ ހާމަކޮށްފަ އެވެ.