އެމްޑީޕީގެ ޕިކަޕް ޖަލްސާ: "ދެ އިންތިޚާބު އެއްކޮށްލައިފި ނަމަ ރައްޔިތުންގެ އަޑު އަހަން ސަރުކާރުން ބޭނުންވާނެ އެއްވެސް ސަބަބެއް ނެތް"
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ ދެކޮޅަށް އެމްޑީޕީން ބޭއްވި ޖަލްސާގައި، ސަރުކާރުން އިންތިޚާބުތަކާ ދިމާކޮށް ނުފޫޒު ފޯރުވުމަށް ވަޒީފާ ދެމުންދާ ކަމަށް ކުރީގެ މެންބަރު ރާއި ތުހުމަތު ކުރެއްވި. އަދި ގައުމީ މަޖިލީހުގެ މެމްބަރު އިހުސާން ވަނީ އެޕްރިލް މަހު ބާއްވާ ރެފަރެންޑަމް އަކީ ސްކޭމެއް ކަމަށް ވިދާޅުވެފައި.
ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރު މުހައްމަދު ރާއި | ރާއްޖެ އެމްވީ
ދެ އިންތިޚާބު އެއްކޮށްލައިފި ނަމަ ރައްޔިތުންގެ އަޑު އަހަން ސަރުކާރުން ބޭނުންވާނެ އެއްވެސް ސަބަބެއް ނެތް ކަމަށް ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ރާއި ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީ އިން ބޭއްވި ޕިކަޕް ޖަލްސާގައި ވާހަކަދައްކަވަމުންނެވެ. ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި ދެކޮޅަށް ރާއި ވަނީ ވާހަކަދައްކަވާފަ އެވެ.
ރާއި ވަނީ ފެށުނީއްސުރެ ސަރުކާރުން ރައްޔިތުންގެ އަޑު ނާހާ ރައްޔިތުން ނިކަމެތިކުރަމުންދާ ކަަމަށް ވިދާޅުވެފަ އެވެ. މީގެ އިތުރުން ރާއި ވަނީ މިހާރު ވެސް ކުރިއަށް އޮތް ކައުންސިލް އިންތިޚާބާއި ދިމާކޮށް ސަރުކާރުން އެތައް ވަޒީފާތަކެއް ދެމުންދާ ކަން ފާހަގަކޮށްފަ އެވެ. މިދިޔަ 10 ވަރަކަށް ދުވަހުގެެ ތެރޭގައި މުޅި ރާއްޖެ އިން އެމްޓީސީސިީ އަށް 300 އަށް ވުރެ ގިނަ މުވައްޒަފުން ނަގާފައިވާ އިރު އެއިން ކޮންމެ މީހަކަށް މަދުވެގެން 10،000 ރުފިޔާ ލިބޭނެ ކަމަށް ރާއި ވިދާޅުވި އެވެ. މިއީ ސަރުކާރު ހިންގާ ޕީއެންސީ އަށް ނިސްބަތްވާ މެމްބަރުން ވިދާޅުވެގެން ރައީސް ޑރ. މުހައްމަދު މުއިއްޒު އަށް ދެވަނަ ދައުރެއް ހޯދާދިނުމަށް ކުރަމުންދާ މަސައްކަތް ކަމަށް އޭނާ ވިދާޅުވި އެވެ.
"ދެވަނަ ދައުރެއް ހޯދަން މަކަރުވެރިކަމާއި އެކު މަސައްކަތް ކުރަނީ. ރިޔާސީ އިންތިޚާބާއި މަޖިލިސް އިންތިޚާބާއި އެއްކޮށްލައިފި ނަމަ މިހާރު ވެސް ތިބި މަޖިލިސް މެމްބަރުން ބަސް ނުބުނެ ތިބި މެމްބަރުން ރައްޔިތުންގެ މައްޗަށް ބަސް އިއްވަން ތިބޭނީ. އެކަމަށް އަޅުގަނޑުމެން ފުރުސަތު ދީގެން ނުވާނެ." އޭނާ ވިދާޅުވި އެވެ.
ޕިކަޕް ޖަލްސާގައި ވާހަކަދައްކަވަމުން އެމްޑީޕީގެ ގައުމީ މަޖިލީހުގެ މެންބަރު މުހައްމަދު އިހުސާން ވިދާޅުވީ ރެފަރެންޑަމް އަކީ ސްކޭމެއް ކަމަށެވެ. އެފަދަ ސްކޭމްތަކަކީ ސްކޭމް އެއްކަން އެނގެނީ ވެސް ވަގުތު ފާއިތުވެ ދާ ފަހުން ކަމަށެވެ. ފެންނަ ނުފެންނަ ވޯޓާއި ގުޅޭ އެކަށީގެންވާ މައުލޫމާތު ދިވެހިންނާއި ހަމައަށް އެމްޑީޕީ އިން ގެނެސްދެނީ އެ ސަބަބާއި ހުރެ ކަމަށް އިހުސާން ވިދާޅުވި އެވެ. ފެންނަ ނުފެންނަ ވޯޓެއް ނަގަން ވާނީ ވަރަސް ފުރިހަމަ އަށް އާއްމުންނަށް އެ ވޯޓާއި ގުޅޭ މައުލޫމާތު ދީގެން ކަމަށް އިހުސާން ވިދާޅުވި އެވެ.
"ޕީއެސްއެމްގެ މަސްއޫލިއްޔަތަކީ ރައްޔިތުންނަށް އެކަމެއްގެ އެންމެ އެކަށީގެންވާ މައުލޫމާތު ފޯރުކޮށްދިނުން. ނަމަވެސް މިއަދު ޕީއެސްއެމް އަށް އެމްޑީޕީ އިން ދިޔައީމަ ޕީއެސްއެމް އިން ވިދާޅުވަނީ މިހާތަނަށް ކަން ކުރެވުނީ ރަނގަޅަކަށް ނޫނޭ. ގާނޫނުގައި ދޭ މުއްދަތު ފަހަނައަޅާ ގޮސް އިންތިޚާބަށް ދެ ހަފްތާ އަށް ވީމަ މިކަން ރޭކާ މިލީ." އިހުސާން ވިދާޅުވި އެވެ.
އިހުސާން ވިދާޅުވީ ރިޔާސީ ނިޒާމެއްގައި އެންމެ ބާރުވެރި ބަޔަކީ ރައްޔިތުން ކަމަށެވެ. ރައްޔިތުންގެ ބާރު އަޑު ނާހާ، އެ އަޑު އެހުން މަދުވާ ގޮތަށް ނަގާ ވޯޓަކީ ރައްޔިތުންނަށްޓަކައި ނަގާ ވޯޓަކަށް ނުވާނެ ކަމަށް އިހުސާން ވަނީ ވިދާޅުވެފަ އެވެ.
