ހިނގަމުންދާ މަޖިލިހެއްގެ ޢުމުރު ކުރުކޮށް ކުރީ އޮތް ޢުމުރަށް ރުޖޫޢަވާގޮތަށް ހުށަހަޅާ ހުށަހެޅުމަކީ ޤާނޫނީ ނަޒަރަކުން ޞައްޙަކަމެއް ނެތް، ދެކޮޅުނުޖެހޭ ހުށަހެޅުމެއް: އިބުރާ

ހިނގަމުންދާ މަޖިލިހެއްގެ ޢުމުރު ކުރުކޮށް، އިންތިޚާބެއް ބޭއްވުމަށް ފަހު، އަނެއްކާވެސް ކުރީ އޮތް ޢުމުރަށް ރުޖޫޢަވާގޮތަށް ހުށަހަޅާ ހުށަހެޅުމަކީ ޤާނޫނީ ނަޒަރަކުން ޞައްޙަކަމެއް ނެތް، ދެކޮޅުނުޖެހޭ ހުށަހެޅުމެ ކަމަށް ޤާނޫނުއަސާސީ އެކުލަވާލި އިރު ޤާނޫނުއަސާސީ ޑްރާފްޓްކުރި ކޮމިޓީގެ މުޤައްރިރުކަން އަދާކުރެއްވި އިބްރާހިމް އިސްމާއިލް ވިދާޅުވެއްޖެ އެވެ.

ޤާނޫނީ ވަކީލުން މިކަމުގައި އެއްޗެއް ބުނޭތޯ މަޑުކޮށްލައިގެން ހުންނެވި ކަމަށް އިބުރާ ވަނީ އޭނާ އެކްސްގައި ކުރެއްވި ޕޯސްޓެއްގައި ވިދާޅުވެފަ އެވެ. ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި މެދު ފެންނަ ގޮތެއް ބެލުމަށް ބާއްވާ ރެފަރެންޑަމް ޤާނޫނުއަސާސީގެ 262 ވަނަ މާއްދާގެ މަފްހޫމަށް ނުފެތޭ ކަމަށް އޭނާ ވިދާޅުވި އެވެ.

ޤާނޫނުއަސާސީއަށް ގެންނާން މިއުޅޭ ބަދަލަކީ ޤާނޫނުއަސާސީއިން ހުއްދަކުރާ ބަދަލެއްތޯ އޭނާ ވަނީ ސުވާލު އުފައްދަވާފަ އެވެ. ރައްޔިތުންގެ ވޯޓަކަށް މި ހުށަހަޅާ ބިލް ޤާނޫނުއަސާސީގެ 262 ވަނަ މާއްދާގެ މަފްހޫމަށް ނުފެތޭ ކަމަށް އޭނާ ކުރެއްވި ޕޯސްޓްގައި ވިދާޅުވެފައި ވެ އެވެ.

" ޤއ ގެ 262 (ށ)ގެ 2. ގައި އޮންނަނީ: "ޤާނޫނުއަސާސޯގެ 79 ވަނަ މާއްދާގެ (ހ) (ރައްޔިތުންގެ މަޖިލިހުގެ ޢުމުރު) " މިފަދައިންނެވެ. 79 (ހ) ގައި އޮންނަނީ: "ރައްޔިތުންގެ މަޖިލިހުގެ ޢުމުރަކީ، މަޖިލިސް އިންތިޚާބު ކުރުމަށްފަހު، ފުރަތަމަ ޖަލްސާކުރާ ތާރީޚުން ފެށިގެން 5 އަހަރު ދުވަހެވެ....." މިފަދައިންނެވެ." އިބްރާ ކުރެއްވި ޕޯސްޓުގައި ވެ އެވެ.

އެހެންކަމުން، 262 ގެ ދަށުން ބަދަލުކުރެވޭނީ މަޖިލިހުގެ ޢުމުރު ކަމަށް އޭނާ ވިދާޅުވި އެވެ. އެގޮތުން ރައްޔިތުންގެ މަޖިލިހުގެ ޢުމުރު 5 އަހަރުން އެހެން ޢަދަދަކަށް ބަދަލުކުރާނަމަ، ބަދަލު ކުރުމަށް ފަހު ދެން އޮންނާނީ އެގޮތަށް ކަމަށް ވެސް އޭނާ ވަނީ ވިދާޅުވެފަ އެވެ. 

ރައްޔިތުންގެ ޢާންމު ވޯޓަކަށް ހުށަހަޅާން ޖެހޭނީ އެންމެ ސުވާލެއް ކަމަށާއި އޮންނާންޖެހޭނީ އެންމެ ޖަވާބެއް ކަމަށް ވެސް އޭނާ ވިދާޅުވި އެވެ.

" މިހާރު މިހުށަހަޅާ ސުވާލުގައި އެއަހަނީ ކީކޭ ހެއްޔެވެ؟ މަޖިލިހުގެ ޢުމުރަކީ 4 އަހަރާ ބައި ހެއްޔެވެ؟ ނުވަތަ 5 އަހަރު ހެއްޔެވެ. ހިނގަމުންދާ މަޖިލިހެއްގެ ޢުމުރު ކުރުކޮށްފައި، އަނެއްކާވެސް  އިންތިޚާބެއްބާއްވައި، އަނެއްކާވެސް ކުރީ އޮތް ޢުމުރަށް ރުޖޫޢަވާގޮތަށް ހުށަހަޅާ ހުށަހެޅުމަކީ ޤާނޫނީ ނަޒަރަކުން ޞައްޙަކަމެއް ނެތް، ދެކޮޅުނުޖެހޭ ހުށަހެޅުމެކެވެ." އިބުރާ ވަނީ މިފަދައިން ވިދާޅުވެފަ އެވެ.

މިނޫން ގޮތަކަށް މި އިޞްލާޙު މާނަކުރެވޭނެގޮތެއް ފުންނާބު އުސް ވަކީލަކު ވިދާޅުވެދެއްވުމަށް ވެސް އޭނާ އެދިލެއްވި އެވެ.