ޑިމޮކްރަސީ އަގުހެޔޮ ކުރަން އުޅޭނަމަ އެއީ އަމިއްލަ ހާލަތު ދަށް ކުރަން އެޅޭ ފިޔަވަޅެއް: ނަޝީދު

ވެރިކަން ހިންގުމަށް ޑިމޮކްރަސީ އަގުހެޔޮ ކުރަން އުޅޭ ނަމަ އެއީ އަމިއްލަ ހާލަތު ދަށް ކުރުމަށް އެޅޭ ފިޔަވަޅެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ. 

ކައުންސިލް އިންތިޚާބުގެ ކެމްޕެއިނަށް ބ. ތުޅާދޫ އަށް ވަޑައިގެން އެ ރަށުގެ ރައްޔިތުންނާ ވާހަކަ ދައްކަވަމުން ރައީސް ނަޝީދު ވިދާޅުވީ ދުނިޔޭގެ ތަނަވަސް ގައުމުތަކުގައި ފެންނަ ނުފެނަން ވޯޓު ނަގަމުން ދާ ކަމަށެވެ.

ނަމަވެސް އެއީ ޚަރަދު ކުޑަ ކުރަން ނޫން ކަމަށާއި، ރާއްޖޭގައި ދެ އިންތިޚާބު އެއްކުރަން ފެންނަ ނުފެންނަ ވޯޓު ނަގަން އުޅެނީ ޚަރަދު ކުޑަ ކުރުމަށް ކަމަށެވެ. އެގޮތުން ވެރިކަން ހިންގުމަށް ކަމަށް ޑިމޮކްރަސީ އަގުހެޔޮ ކުރަން ޖެހޭ ކަމަށް ގަބޫލުކޮށް އެކަން ކުރުމަކީ އަމިއްލަ ހާތަލު ދަށް ކުރުމަށް އެޅޭ ފިޔަވަޅެއް ކަމަށް އެމަނިކުފާނު ވިދާޅުވި އެވެ. 

ވެރިކަމަށް، ވެރިކަން ހިންގުމަށް، ޑިމޮކްރަސީ އަގުހެޔޮ ކުރަން އަޅުގަނޑުމެން އުޅެއްޖެ ނަމަ އެއީ އަޅުގަނޑުމެން އަމިއްލަ އަށް ހާލަތު ދަށް ކުރުމަށް އެޅޭ ފިޔަވަޅެއް. 

 ކުރީގެ ރައީސް މުހައްމަދު ނަޝީދު

ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ރައްޔިތުންގެ މެދުގައި ނަގާ ފެންނަ ނުފެންނަ ވޯޓާ ގުޅިގެން ސަރުކާރުން ދެވަނަ ވިސްނުމަކަށް ދިޔުމަށް އެމަނިކުފާނު މީގެ ކުރިން ވެސް ވަނީ މި ސަރުކާރަށް ގޮވާލައްވާފަ އެވެ. 

ރައީސް ނަޝީދު ވިދާޅުވީ، ރާއްޖޭގެ ޑިމޮކްރަސީ ހަރުދަނާކުރުން ކޮންމެހެން ބޭނުންތެރި ކަމަށެވެ. އެ ގޮތުން، ގާނޫނުއަސާސީ އަށް ގެންނަ ކޮންމެ އިސްލާހެއް ގެންނަންވާނީ އަވަސް އަރުވާލުމުގެ ބަދަލުގައި، އެންމެހާ ފަރާތްތަކާ ފުޅާ ދާއިރާއެއްގައި މަޝްވަރާކޮށްގެން ކަމަށް އެ މަނިކުފާނު ވިދާޅުވި އެވެ.

އަވަސް އަރުވާލައިގެން ގާނޫނު އަސާސީ އަށް ބަދަލު ގެނައުމަކީ ކުޅިވަރަކަށް ހަދައިގެން ދެ އިންތިހާބު އެއްކޮށްލަން ސަރުކާރުން މަސައްކަތް ކުރަނީ، ހީލަތްތެރި ރޭވުންތަކެއްގެ ދަށުން، ރާއްޖޭގައި ހުދުމުހުތާރު ވެރިކަމެއް ގާއިމު ކުރުމަށްކަމަށް އިދިކޮޅު ފަރާތްތަކުން ތުހުމަތު ކުރެ އެވެ.

އެޕްރީލް 4، ގައި ރެފެރެންޑަމް ވޯޓު ނަގާއިރު އެ ދުވަހު ލޯކަލް ކައުންސިލް އިންތިހާބު ވެސް ބާއްވަން އޮތީ ތާވަލުކޮށްފަ އެވެ.