ވައުދުވި ތާރީހަށް ވުރެ ދެ މަސް ދުވަސް ފަހުން، ކައުންސިލް އިންތިޚާބާއި ދިމާކޮށް ކަރެކްޝަންސްގެ މުސާރަ ބޮޑުކޮށްދީފި
ކަރެކްޝަންސްގެ މިއަހަރުގެ ޖެނުއަރީ މަހުން ފެށިގެން މުސާރަ ބޮޑުވާނެ ކަމަށް ކުރިން ބުނި ނަމަވެސް، އެކަން ލަސްވުމާ ގުޅިގެން މުވައްޒަފުން ވަނީ ކަންބޮޑުވުން ފާޅުކޮށް ރައީސް އޮފީހަށް ޕެޓިޝަނެއް ވެސް ހުށަހަޅާފަ.
ކަރެކްޝަންގެ ދަސްވެވެނިވުމުގެ ރަސްމިއްުޔާތުގެ ތެރެއިން | ހޯމް މިނިސްޓްރީ
ވައުދުވި ތާރީހަށް ވުރެ ދެ މަސް ދުވަސް ފަހުން މޯލްޑިވްސް ކަސްޓަމްސް ސާވިސް އާއި، ކަރެކްޝަން ސާވިސްގެ މުވައްޒަފުން ގެ މުސާރަ ބޮޑުކޮށްދީފި އެވެ.
އެ ދެ މުއައްސަސާގެ މުވައްޒަފުންގެ މުސާރަ ބޮޑުކުރުމަށް ނިންމާފައި ވަނީ މި ހިނގާ މާރިޗް މަހުން ފެށިގެންނެވެ.
މި ދެ މުއައްސަސާގެ މުސާރަތައް ބޮޑު ކުރުމަށް މި އަހަރުގެ ބަޖެޓުގައި ވަނީ ހިމަނާފަ އެވެ. މީގެ ކުރިން ސަރުކާރުން ވައުދުވީ މި އަހަރު ފެށޭ އިރު ކަރެކްޝަންސް އަށް މުސާރަ ބޮޑުކޮށްދިނުމަށެވެ. ނަމަވެސް މުސާރަ ބޮޑުކުރުމުގެ ކަންކަން މަޑު ޖައްސާފައި އޮތުމަށް ފަހު މުސާރަ ބޮޑުކޮށްދީފައި މި ވަނީ ލޯކަލް ކައުންސިލް އިންތިޚާބަށް މަސް ދުވަހަށް ވުރެ ކައިރި ވެފައި ވަނިކޮށެވެ.
ސަރުކާރުން މިދިޔަ ޖެނުއަރީ މަހު ބޮޑުވާނެ ކަމަށް ބުނި މުސާރަ ބޮޑު ނުވުމުން އެކަމުގެ ކަނބޮޑުވުން ފާޅުކޮށް ކަރެކްޝަންގެ ގިނަ އޮފިސަރުންގެ ސޮޔާ އެކު ނިމިދިޔަ ފެބްރުއަރީ މަހުގެ ތެރޭގައި ޕެޓިޝަނެއް ރައީސް އޮފީހަށް ވަނީ ހުށަހަޅާފަ އެވެ. ހޯމް މިނިސްޓަރ އަލީ އިހްސާން ކަރެކްޝަން އޮފިސަރުންގެ މުސާރަ ޖެނުއަރީ މަހުގެ މުސާރަޔާއި އެކު ބޮޑުވާނެ ކަމުގެ ޔަގީންކަން ދެއްވާފައި ވީ ނަމަވެސް އެކަން އެގޮތަށް ނުހިނގާތީ ކަރެކްޝަންގެ މުވައްޒަފުން އައީ ކަންބޮޑުވުން ފާޅުކުރަމުންނެވެ.
