އިންތިޚާބުތައް މަދު ވުމަކީ ސިޔާސީ ހަމަޖެހުން ޤާއިމް ކުރެވޭ ކަމެއް ނޫން، ގެއްލުވާލަން މި އުޅެނީ ވާދަވެރިކަން : ފައިސަލް

އިންތިޚާބުތައް މަދު ވުމަކީ ސިޔާސީ ހަމަޖެހުން ޤާއިމް ކުރެވޭ ކަމެއް ނޫން ކަމަށާއި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި މެދު ނަގާ ރެފަރެންޑަމް ވޯޓުގެ ބޭނުމަކީ ސިޔާސީ ވާދަވެރިކަން ގެއްލުވާލުން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުން، ފައިސަލް ވަނީ އިންތިޚާބުތައް މަދުވުމުން ސިޔާސީ ހަމަނުޖެހުން މަދުވާ ކަމެއް ކަމަށް ސަރުކާރުން ބުނަމުންދާތީ އެކަމަށް ރައްދު ދެއްވާފަ އެވެ. އެގޮތުން އިންތިޚާބުތައް އޮތުމަކީ ސިޔާސީ ހަމަ ނުޖެހުމެއް އުފެދެން ޖެހޭ ސަބަބެއް ނޫން ކަމަށް ފައިސަލް ވަނީ ވިދާޅުވެފަ އެވެ. ޕީއެންސީގެ ފިކުރުގެ ވެރިކަމެއް ކުރިން އޮތް އިރު ރިޔާސީ އިންތިޚާބުގެ ނަތީޖާ އާއި މެދު ހިތްހަމަ ނުޖެހިގެން ކޯޓަށް ދިޔަ ކަން ފާހަގަކުރައްވައި ފައިސަލް ވިދާޅުވީ އެ ފިކުރުގެ މީހުން ވޯޓާއި މެދު އަމަލު ކުރާ ގޮތަކީ އެއީ ކަމަށެވެ.  

ފައިސަލް ވަނީ އެންމެންނަށް ޤާނޫނުއަސާސީ އިން ލިބިދޭ ހައްގުތައް ގެއްލުވާލާ ގޮތަށް ކަންކަން މަގުފަހިކުރުމަކީ އެއީ ހަމަނުޖެހުމަށް މަގުފަހިކުރުން ކަމަށެވެ. މީގެ އިތުރުން، ފައިސަލް ވަނީ ފެންނަ ނުފެންނަ ބޮޑު އިންތިޚާބެއް ބާއްވާ އިރު މިހާރު ޕީއެސްއެމް އިން އަމަލު ކުރަމުން ދަނީ ހަމަނުޖެހުން އުފެދޭ ގޮތަށް ކަމަށް ވެސް ވިދާޅުވެފަ އެވެ.

"ވަކި ކަމެއް ޕްރޮމޯޓްކޮށް ފެންނަ ވޯޓެއްގެ ގޮތުގައި މި ޕްރޮމޯޓް ކުރަނީ. އެއަށް ވުރެ ބޮޑު ހަމަ ނުޖެހުމެއް ހިންގޭނެތޯ؟ މީ ނޫންތޯ ހަމަ ނުޖެހުމަކީ. އެހެންވީމަ އަޅުގަނޑަކަށް ނުފެނޭ އިންތިޚާބުތައް މަދުވީމަ ސިޔާސީ ހަމަޖެހުން އިތުރުވާ ކަމަކަށް. އިންތިޚާބެއް ނެތިއްޔާ ވެރިއަކު ނުދާނެ ރަށްރަށަކަށް." ފައިސަލް ވިދާޅުވި އެވެ. 

މިހާރު ވެސް ވެރިން ރަށްރަށަށް ދަތުރުކުރަނީ ގިނައިން އިންތިޚާބުތަކާއި ދިމާކޮށް ކަމަށާއި އެގޮތަށް ވެރިން ރަށްރަށަށް ގޮސް އުޅުމަކީ ރަށްރަށުގެ ތަރައްޤީ އާއި ގުޅުން ހުރި ކަންކަމުގެ ވާހަކަދައްކަން ރައްޔިތުންނަށް ފުރުސަތު ލިބޭ ކަމެއް ކަމަށް ފައިސަލް ވިދާޅުވި އެވެ. އެއް އިންތިޚާބަށް ވާ ވައުދުތައް ދެ ވަނަ އިންތިޚާބާއި ހަމައަށް ދާއިރު ނުފުއްދޭ ނަމަ ވެރިން ލަދު ގަންނާނެ ކަމަށާއި އެކަމުގެ ސަބަބުން ވައުދުތައް ފުއްދަން ބާރު އެޅޭ ކަމަށް ފައިސަލް ވިދާޅުވި އެވެ. ލާމަރުކަޒީ ނިޒާމުގެ ތެރެއިން ރައްޔިތުންނަށް ލިބޭ ކުރިއެރުންތައް ލިބުމުގައި އިންތިޚާބުތައް އަދާކުރާ ދައުރަކީ ވަރަށް މުހިންމު ދައުރެއް ކަމަށް ފައިސަލް ވަނީ ވިދާޅުވެފަ އެވެ.