އެންސިސް އިން މަސްވެރިންނަށް ހިލޭ އައިސް ދޫކުރުން ހުއްޓާލައިފި

ރާއްޖެ އިން އެންމެ ގިނައިން މަސް އެކްސްޕޯޓް ކުރާ އެއް ކުންފުނި ކަމަށްވާ އެންސިސް ފިޝަރީޒް ޕްރައިވެޓް ލިމިޓެޑުން ބޮޑުކަންނެލި މަސްވެރިންނަށް ހިލޭ ދޫކުރަމުން އައި އައިސް ދޫކުރުން ހުއްޓާލައިފި އެވެ.

މެދުއިރުމަތީގެ ހަނގުރާމައާ ގުޅިގެން ތެލުގެ އަގު އިންތިހާއަށް އުފުލުމުގެ ސަބަބުން އައިސް އުފެއްދުމަށް ކުރަން ޖެހޭ ޚަރަދު ބޮޑުވެފައިވާތީ މި ފިޔަވަޅު އަޅަން މަޖުބޫރުވެފައިވާ ކަމަށް ބޮޑުކަންނެލި ގަންނަ ކުންފުންޏެއް ކަމަށްވާ އެންސިސް އިން ބުންޏެވެ.

އެ ކުންފުނިން ބުދަ ދުވަހު ނެރުނު ބަޔާނުގައި ބުނީ ތެލުގެ އަގު އިންތިހާ އަށް ބޮޑުވަމުން ދިޔުމުގެ ސަބަބުން އައިސް އުފެއްދުމަށާއި ފޯރުކޮށްދިނުމަށް ހިނގާ ޚަރަދު މިހާރު ވަނީ ފޫނުބެއްދޭ ވަރުގެ ބޮޑު ބުރައަކަށް ވެފައި ކަމަށެވެ.

 އެހެންކަމުން ބޮޑުކަންނެލީގެ މަސްވެރިންނަށް އެ ކުންފުނިން ހިލޭ ފޯރުކޮށްދެމުންދިޔަ އައިސް ދޫކުރުން ހުއްޓާލަން މަޖުބޫރުވެފައިވާ ކަމަށް އެ ކުންފުނިން ބުންޏެވެ.

އެންސިސް އިން މަސްވެރިންނަށް ހިލޭ އައިސް ދޫކުރުން ހުއްޓާލިއިރު، ކަންނެލި މަސްވެރިންނަށް ތެޔޮ ވެސް ލިބެނީ ބާޒާރުގައި ހުންނަ އަގަށެވެ. އެ އަގުގައި ތެޔޮ ގަނެގެން މަސްވެރިކަން ނުކުރެވޭނެ ކަމަށް މަސްވެރިން ބުނެ އެވެ. ކަންނެލި މަސްވެރިންނަށް ވެސް އަގުހެޔޮކޮށް ސަބްސިޑީ އަގެއްގައި ތެޔޮ ވިއްކާނެކަމުގެ ޔަގީންކަން ސަރުކާރުން އޮތީ ދީފަ އެވެ. އެކަމަކު މިއަދާ ހަމައަށް ވެސް މަސްވެރިންނަށް ތެޔޮ ލިބެނީ ބޮޑު އަގުގަ އެވެ.

މިފްކޯ އަށް މަސް ކިރާ ފަރާތްތަކަށް ސަބްސިޑީ އަގެއްގައި ތެޔޮ ވިއްކާނެ ކަމަށް  މިފްކޯއިން ވަނީ ބުނެފަ އެވެ. އެކަމަކު މިފްކޯ އަށް މަސް ކިރަނީ ދޮށީގެ މަސްވެރިކަން ކުރާ މަސްވެރިންނަސް ވުމުން ބޮޑުކަންނެލި މަސްވެރިންނަކަށް މިފްކޯއަކުން އަގުހެޔޮ ތެލެއް ނުލިބޭނެ އެވެ.

ސަރުކާރުގެ އެފްއެސްއެމް އިން އެއްގަމުގައި ހިންގާ ތެޔޮ ޝެޑުތަކުން ވިއްކާ ތެޔޮ ފިޔަވައި އެހެން ހުރިހާ ތެލެއްގެ އަގު ވަނީ ހޯމަ ދުވަހު ބޮޑުކޮށްފަ އެވެ. މިހާރު ޕެޓްރޯލް ލީޓަރެއް ލިބެނީ 27.13 ރުފިޔާ އަށެވެ. ޕެޓްރޯލް ލީޓަރެއް ކުރިން ވިއްކީ 13.50 ރުފިޔާ އަށެވެ. އެހެންކަމުން އެއީ 100.96 ޕަސެންޓުގެ ބޮޑުވުމެކެވެ. ޑީސަލް ލީޓަރެއް މިހާރު ލިބެނީ 28.32 ރުފިޔާ އަށެވެ. ކުރިން ވިއްކީ 13.92 ރުފިޔާ އަށެވެ. އެއީ 103 ޕަސެންޓުގެ އަގުބޮޑުވުމެކެވެ.

ހަނގުރާމައިގެ ސަބަބުން ދުނިޔޭގެ ތެލުގެ މާކެޓުތަކަށް ބުރޫ އަރާފައިވާ މި ދަނޑިވަޅުގައި ރާއްޖެއަށް ތެޔޮ ހޯދުމަށް އިންޑިއާގެ އެހީ އަށް ސަރުކާރުން ވަނީ އެދިފަ އެވެ. ތެލުގެ އަގު ބޮޑުވުމުން މަސްވެރިކަމުގެ ސިނާއަތަށް ކުރިމަތިވަމުންދާ ގޮންޖެހުންތަކަށް ސަރުކާރުން އަވަސް ހައްލެއް ހޯދަން މަސްވެރިން ދަނީ ގޮވާލަމުންނެވެ.