ހާލަތުގެ ނާޖާއިޒު ފައިދާ ނަގާ ތެޔޮ އަގުބޮޑު ކުރުމަކީ ޑްރައިވަރުންނަށް ދަތިކުރުމަށް ސަރުކާރުން އިތުރުކުރި ބޮޅެއް: ނިޔާޒް
ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ރާއްޖޭގައި ޕެޓްރޯލްގެ އަގު ބޮޑުކުރުމަށް ނިންމި ނިންމުން މުރާޖާކުރުމަށް ޑްރައިވަރސް އެސޯސިއޭޝަނުން ސަރުކާރަށް ގޮވާލައިފިް. އެ ޖަމިއްޔާގެ ރައީސް ނިޔާޒު ވިދާޅުވީ އެއްމަސް ދުވަހުގެ ތެޔޮ ސްޓޮކްކޮށްފައި ހުރިކަމަށް ސަރުކާރުން ބުނުމަށް ފަހު އަގު ބޮޑުކުރުމަކީ ޙާލަތުގެ ނާޖާއިޒު ފައިދާ ނެގުން ކަމަށާއި، މީގެ ސަބަބުން ޓެކްސީ ޑްރައިވަރުންގެ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް. އެހެންކަމުން ރައްޔިތުންނަށް ލިބޭ ތަކުލީފުތައް ކުޑަކުރުމަށްޓަކައި ތެލުގެ އަގަށް ހެޔޮ ބަދަލެއް ގެނައުމަށް އޭނާ ވަނީ އިލްތިމާސްކުރައްވާފަ.
ޑްރައިވަރސް އެސޯސިއޭޝަން އޮފް މޯލްޑިވްސް ގެ ރައީސް އިބްރާހިމް ނިޔާޒް | ރާއްޖެއެމްވީ
ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާ ގުޅިގެން ރާއްޖޭގައި ޕެޓްރޯލްގެ އަގު ބޮޑުކުރުމަށް ސަރުކާރުން ނިންމި ނިންމުން މުރާޖާކުރުމަށް ޑްރައިވަރސް އެސޯސިއޭޝަންގެ ރައީސް އިބްރާހިމް ނިޔާޒު، ސަރުކާރަށް ގޮވާލައްވައިފި އެވެ.
'އެކްސް' ގައި ކުރެއްވި ޕޯސްޓެއްގައި ނިޔާޒް ވިދާޅުވީ، އެމެރިކާއާއި އިޒްރޭލް ގުޅިގެން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ދުނިޔޭގެ މަސްރަޙަށް ބަދަލުތަކެއް އަންނަމުންދާއިރު، ދުނިޔޭގެ އެކި ކަންކޮޅުތަކުގެ މުއްސަނދިން ރާއްޖެއަށް އައިސް ވެލާނާ އިންޓަރނޭޝަނަލް އެއަރޕޯޓް ޕްރައިވެޓް ޖެޓްތަކުން ފުރިފައިވާ ކަމަށެވެ.
ނަމަވެސް، މިފަދަ ދަނޑިވަޅެއްގައި ރައްޔިތުންނަށް، ޚާއްސަކޮށް ޑްރައިވަރުންނަށް ތެލުގެ އަގު ބޮޑުކުރުމަކީ ކަންބޮޑުވާންޖެހޭ ކަމެއް ކަމަށް އޭނާ ވިދާޅުވި އެވެ.
ނިޔާޒު ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގައި އެއްމަސް ދުވަހުގެ ތެޔޮ ސްޓޮކްކޮށްފައި ހުރިކަމަށް ވިދާޅުވިތާ އެންމެ ދެ ދުވަސް ފަހުން ތެލުގެ އަގު ބޮޑުކުރުމަކީ ޙާލަތުގެ ނާޖާއިޒު ފައިދާ ނެގުމެވެ.
"އަޅުގަނޑު ދެކޭ ގޮތުގައި ޙާލަތުގެ ނާޖާއިޒު ފައިދާ ތެޔޮ އަގުބޮޑު ކުރުމުން ދޭހަކޮށްދެނީ ސަރުކާރުން ސިލްސިލާކޮށް ޓެކްސީ ޑްރައިވަރުންނަށް ދަތިކުރަމުންދާ ދަތިކުރުމަށް އިތުރުކުރި ‘ބޮޅެއް’ ގެ ގޮތުގައި،" ނިޔާޒު ވިދާޅުވެފައި ވެ އެވެ.
ޑްރައިވަރސް އެސޯސިއޭޝަނުން ބުނާ ގޮތުގައި ތެލުގެ އަގު މިހާ ބޮޑުތަނުން އުފުލުމަކީ ޓެކްސީ ޑްރައިވަރުންގެ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިވާނެ ކަމެކެވެ.
އެހެންކަމުން، ރައްޔިތުންނަށް ލިބޭ ތަކުލީފުތައް ކުޑަކުރުމަށްޓަކައި، މިހާރު ކަނޑައަޅާފައިވާ ތެލުގެ އަގުތައް އަލުން މުރާޖަޢާކޮށް، ހެޔޮ ބަދަލެއް ގެނައުމަށް ނިޔާޒު ވަނީ ސަރުކާރަށް ގޮވާލާފަ އެވެ.
ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާ ގުޅިގެން ރާއްޖޭގެ ބާޒާރުގައި ވެސް ތެލުގެ އަގަށް ބަދަލުތަކެއް އަންނަމުންދާ މި ދަނޑިވަޅުގައި، މިއީ އާންމު ދަތުރުފަތުރާއި މުދާ އުފުލުމުގެ އަގުތަކަށްވެސް އޭގެ އަސަރު ފޯރާނެ ކަމެއް ކަމުގައި އިގްތިސާދީ މާހިރުން ލަފާކުރެ އެވެ.
