ރެފަރެންޑަމް ވޯޓަކީ ޤާނޫނުއަސާސީ ގަޑުބަޑުކުރުމަށް ކުރާ މަސައްކަތެއް: ޝައުނާ

ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ނަގާ ރެފަރެންޑަމް ވޯޓަކީ ޤާނޫނުއަސާސީ ގަޑުބަޑުކުރުމަށް ކުރަމުން ކަމަށް ނިމިދިޔަ އެމްޑީޕީ ސަރުކާރުގެ ތިމާވެށްޓާ ބެހޭ ވަޒީރު މިނިސްޓަރު އާމިނަތު ޝައުނާ ވިދާޅުވެއްޖެ އެވެ.

ޝައުނާ އެފަދައިން ވިދާޅުވީ ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުންނެވެ.

ޝައުނާ ވިދާޅުވީ އެޕްރިލް މަހު ބާއްވާ މި ރެފަރެންޑަމް ވޯޓު ނެގުމާއި ހަމައަށް އައި ގޮތަށް ވިސްނާލުމުން ވެސް މި ވޯޓު ނެގުމުގެ ފަހަތުގައި ސަރުކާރުގެ  ރަނގަޅު ނިޔަތެއް ނެތް ކަން ހާމަވާ ކަމަށެވެ. އެގޮތުން، ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ރެފަރެންޑަމް ވޯޓެއް ނަގަން ސަރުކާރުގެ ފުރިހަމަ މެޖޯރިޓީ އޮތް މަޖިލީހުން ފާސް ކުރީ މިނިވަން ބަހުސް އަކާއި ނުލާކަން ޝައުނާ ފާހަގަކުރެއްވި އެވެ. އަދި ކޮމިޓީ މަރުހަލާ އިން އެކަމާއި ގުޅުން ހުރި ބިލް ފާސްކުރަން ނެގީ އެންމެ 5 މިނިޓުކަން ޝައުނާ ވަނީ ފާހަގަކުރައްވާފަ އެވެ.

 މިކަމާއި މެދު ދެ ގޮތަކަށް ވިސްނިދާނެ ކަމަށް ފާހަގަކުރައްވާ ޝައުނާ ވިދާޅުވީ ފެންނަ ނުފެންނަ ވޯޓަށް އެކަށީގެންވާ ގޮތަށް ތައްޔާރު ނުވެ އެ ވޯޓު ނަގަނީ ނާގާބިލް ކަމުން ކަމަށް ވެދާނެ ކަމަށެވެ. ދެވަނަ ގޮތަކީ މިއީ ގަސްތުގައި މުޅި ވެރިކަމުގެ ނިޒާމް ގަޑުބަޑުކޮށްލުމަށް ރޭވިގެން ހިނގާކަމެއްގެ ގޮތުގައި ބެލުން ކަމަށް ވެސް އޭނާ ވިދާޅުވި އެވެ.

"ހަގީގަތުގައި ޑިމޮކްރެޓިކް ނިޒާމެއްގެ ތެރޭގައި ތަރުތީބުވެފައި މި އޮންނަނީ ވަރަށް ގިނަ މަރުހަލާތަކަކަށް ފަހު މިހާ ބޮޑެތި ކަންކަން ކުރަން. އެހެންވީމަ ދެން އަޅުގަނޑުމެންނަށް ލިބެން އޮންނަ އެތި ވެސް ގޯސް ވާނެ. ލިބޭ އޮތި އޮންނާނީ ގަޑުބަޑު ވެފައި." ޝައުނާ ވިދާޅުވި އެވެ.

ޕީއެސްއެމް އަކީ ދައުލަތުގެ މީޑިއާ ކަމަށާއި އެއީ ޤާނޫނަކުން ޒިންމާތަކެއް މަތި ކުރުވާފައިވާ ދައުލަތުގެ މުއައްސަސާ އެއް ކަމަށް ޝައުނާ ވިދާޅުވި އެވެ. އާއްމު ރައްޔިތުންނާއި ހަމަ އަށް ރެފަރެންޑަމް އެއް ގެންނަން ވާނީ އެ ރެފަރެންޑަމް އެއްގެ ސައްހަ މައުލޫމާތު ރައްޔިތުންނަށް ނޯޅޭ މިންވަރަށް ފޯރުކޮށްދިނުމަށް ފަހުގައި ކަމަށް ޝައުނާ ވަނީ ވިދާޅުވެފަ އެވެ. ވަކި ފަރާތަނަށް ނުޖެހި އެ މައުލޫމާތުތައް ފޯރުކޮށްދިނުމުގެ ބަދަލުގައި ސަރުކާރުގެ ޚިޔާލު ފެތުރުމަށް ޕީއެސްއެމް އިން މަސައްކަތް ކުރާ ކަމަށް އޭނާ ވަނީ ވިދާޅުވެފަ އެވެ.