އެންމެފަހުން ޕާކާއި މައިޒާންތަކަކީ ވެސް ތަރައްޤީކަމަށް ޕީއެންސީ ކެންޑިޑޭޓުންނަށް ޤަބޫލުކުރަން މަޖުބޫރުވެއްޖެ ދޯ އެވެ؟

ރަށެއްގެ ތަރައްޤީ މިންކުރާނީ ކޮން އުސޫލަކުން ހެއްޔެވެ؟ އެއީ ހަމައެކަނި ބޮޑެތި އިމާރާތްތަކާއި ތާރު އެޅި މަގުތަކުން ހެއްޔެވެ؟ ނޫނީ ރައްޔިތުންގެ ނަފްސާނީ ދުޅަހެޔޮކަމާއި އިޖުތިމާޢީ ބަދަހިކަމަށްޓަކައި ހެދޭ ހިތްފަސޭހަ މައިޒާންތަކަކީވެސް އެ ތަރައްޤީގެ މުހިންމު ބައެއް ހެއްޔެވެ؟ މި ސުވާލުތަކަކީ ކުޅުދުއްފުށީ ރައްޔިތުންގެ މެދުގައި މިއަދު އެންމެ ގަދައަށް ބަހުސްކުރެވެމުންދާ އެއް މައުޟޫއެވެ. ޚާއްޞަކޮށް، ތަރައްޤީގެ މަޝްރޫޢުތަކަކީ ހަމައެކަނި ބޮޑެތި އިންފްރާސްޓްރަކްޗަރ ކަމަށް ބުނަމުންދިޔަ ފަރާތްތަކުން، މިއަދު ޕާކުތަކާއި މައިޒާންތަކަކީ ރަށުގެ "ދިރުން" ކަމަށް ބުނަން ފެށުމުން، ތަރައްޤީ މާނަކުރުމުގައި އެ ފަރާތްތަކުން ގެންގުޅޭ މިންގަނޑުތަކާމެދު ސުވާލު އުފެދެއެވެ.

މި އަންނަ އޭޕްރީލް މަހު ބާއްވާ ލޯކަލް ކައުންސިލް އިންތިޚާބުގެ ފޯރި އެންމެ ހިފާފައިވާ މި ދަނޑިވަޅުގައި، ސަރުކާރު ހިންގާ މައި ޕާޓީ ޕީއެންސީގެ ޓިކެޓުގައި ކުޅުދުއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ރައީސް ކަމަށް ކުރިމަތިލައްވާފައިވާ ޚަދީޖާ މޫސާގެ ވާހަކަފުޅުތަކުން މި ބަހުސްއަށް ދިރުމެއް ވަނީ ލިބިފައެވެ.

ޕީއެންސީން ބޭއްވި މެދު އުތުރު ކަންމަތީ ތަރާވީޙުގައި ޚަދީޖާ ވިދާޅުވީ، ކުޅުދުއްފުށީ މެދު އުތުރު ދާއިރާއަށް ހަގީގީ ދިރުން ގެނެސް، އެ ދާއިރާ ތަރައްޤީކޮށްފައިވަނީ ޑަބްލިއުޑީސީންނެވެ. މި ތަރައްޤީގެ އެންމެ ބޮޑު ހެއްކެއްގެ ގޮތުގައި އޭނާ ދެއްކެވީ ޑަބްލިއުޑީސީން އިސްނަގައިގެން ތަރައްޤީކޮށްފައިވާ ޑަބްލިއުޑީސީ ޕާކެވެ.

ނަމަވެސް، މި ހިސާބުން އުފެދޭ ބޮޑު ސުވާލަކީ، އިދިކޮޅު އެމްޑީޕީގެ މެޖޯރިޓީ އޮންނަ ސިޓީ ކައުންސިލުން ރަށުގެ އެކި ސަރަޙައްދުތަކުގައި ތަރައްޤީކުރި ޕާކުތަކާއި މައިޒާންތައް ތަރައްޤީގެ ގޮތުގައި ބަލައިގަންނަން ޕީއެންސީން ފަސްޖެހެނީ ކީއްވެގެން ހެއްޔެވެ؟

މީގެ ކުރިން ސިޓީ ކައުންސިލުން ކުރާ މަސައްކަތްތަކަށް ފާޑުކިޔަމުން، އެއީ ރަށަށް ބޭނުންތެރި ކަންކަން ނޫން ކަމަށާއި، ކައުންސިލުން ރަށުގެ ތަރައްޤީއަށް އެއްވެސް ކަމެއް ނުކުރާ ކަމަށް ދެއްކުމަށް ޕީއެންސީން ވަނީ ގިނަ މަސައްކަތްތަކެއް ކޮށްފައެވެ. އެހެންނަމަވެސް، މިއަދު އަމިއްލަ ޕާޓީގެ ކެންޑިޑޭޓަކު ޕާކަކީ ތަރައްޤީގެ "ލާމަސީލު ހެއްކެއް" ކަމަށް ބުނުމުން، އެ ޕާޓީގެ ކުރީގެ ވާހަކަތަކާއި މިހާރުގެ ޢަމަލާ ދިމާނުވާކަން ހާމަވެއެވެ.

މިއީ ސިޔާސީ މަންފާއަކަށްޓަކައި ތަރައްޤީގެ މާނަ ބަދަލުކުރުން ހެއްޔެވެ؟ ޑަބްލިއުޑީސީން ހަދާ ޕާކު ތަރައްޤީއަށް ވެފައި، ސިޓީ ކައުންސިލުން ހަދާ ޕާކު "ބޭކާރު ޚަރަދަކަށް" ވަނީ ކޮން އުސޫލަކުން ހެއްޔެވެ؟ މިކަމުން ދޭހަވަނީ، ކުޅުދުއްފުށީ ސިޓީ ކައުންސިލުން ރަށުގެ ތަރައްޤީއަށްޓަކައި ކޮށްފައިވާ މުހިންމު މަސައްކަތްތައް، މިއަދު ސަރުކާރުގެ ކެންޑިޑޭޓުންގެ ދުލުން އިއުތިރާފުވާން މަޖުބޫރުވެފައިވާ ކަމެވެ. ޕާކުތަކާއި މައިޒާންތަކަކީ ރަށެއްގެ ދިރުން ކަމަށްވާނަމަ، އެ މަސައްކަތް ފެށި ބަޔަކަށް އެ ޝަރަފު ހައްޤުވާނެއެވެ.

ހަމަގައިމުވެސް ތަރައްޤީއަކީ ހަމައެކަނި ކޮންކްރީޓް ބިނާތަކެއް ނޫނެވެ. އެއީ ރައްޔިތުންގެ ދިރިއުޅުމަށް އަންނަ ހެޔޮ ބަދަލެވެ. ކުޅުދުއްފުށީގެ މެދު އުތުރު ދާއިރާގެ ޕާކަކީ ތަރައްޤީގެ ނިޝާނެއް ކަމަށް ޕީއެންސީން މިހާރު ޤަބޫލުކުރާނަމަ، އެއީ އެމްޑީޕީ މެޖޯރިޓީ އޮންނަ ސިޓީ ކައުންސިލުން މިހާތަނަށް ކުރި މަސައްކަތްތަކަށް ލިބުނު ނުސީދާ ބޮޑު ކާމިޔާބީއެކެވެ.