ބައްސާމްގެ މައްސަލަ: ޑޮލަރު މާރުކުރުމުގެ މުއާމަލާތެއް ކަމަށް ނިންމި ބައި ދައުލަތުން ހައިކޯޓުގައި އިސްތިއުނާފް ކޮށްފި
އެފްއޭއެމްގެ އެއް މިލިއަން ޑޮލަރުގެ ޗެކަކީ އަމީން އެވެނިއުއިން އެޕާޓްމަންޓް ގަތުމަށް ބޭނުންކުރި ފައިސާކަން ސާބިތުނުވާ ކަމަށް ކްރިމިނަލް ކޯޓުން ނިންމި ނިންމުން ޕީޖީ އޮފީހުން ހައިކޯޓުގައި އިސްތިއުނާފުކޮށްފި. ޕީޖީން ބުނީ އެ ފައިސާއަކީ ޑޮލަރު މާރުކުރުމުގެ މުއާމަލާތެއް ކަމަށް ކޯޓުން ކަނޑައެޅީ ހެކި ވަޒަންކުރުމުގައި ގާނޫނީ ހަމަތަކާ ޚިލާފަށް ކަމަށް. އެހެންކަމުން، ހެކިންގެ ހެކިބަސް އަލުން ނަގައި، އެ މުއާމަލާތަކީ މަނީ ލޯންޑްރިންގެ އަމަލެއްތޯ ބެލުމަށް މައްސަލަ އަނބުރާ ދަށު ކޯޓަށް ފޮނުވައިދިނުމަށް ޕީޖީން ވަނީ އެދިފަ.
އެފްއޭއެމްގެ ރައީސް ބައްސާމް އަދީލް ޖަލީލް | އެފްއޭއެމް
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އުފުލި މަނީ ލޯންޑްރިންގެ ދައުވާގައި ހިމެނޭ އެއް މިލިއަން ޑޮލަރުގެ މުއާމަލާތާ ގުޅޭ ބައި، ޕްރޮސެކިއުޓަރ ޖެނެރަލްގެ އޮފީހުން ހައި ކޯޓުގައި އިސްތިއުނާފުކޮށްފި އެވެ.
ޕީޖީ އޮފީހުން ބުނީ ބައްސާމުގެ މައްޗަށް ކްރިމިނަލް ކޯޓަށް ހުށަހެޅި މަނީ ލޯންޑްރިންގެ ކުށުގެ ދައުވާ ސާބިތުވާކަމަށް އެ ކޯޓުން ކަނޑައެޅިއިރު، އެފްއޭއެމްގެ އެއް މިލިއަން ޑޮލަރުގެ ޗެކަކީ އަމީން ކޮންސްޓްރަކްޝަން ގެ އަމީން އެވެނިއު 2 އެޕާޓްމަންޓް ގަތުމަށް ބޭނުންކުރި ފައިސާކަން ސާބިތު ނުވާކަމަށާއި، އެ ފައިސާއަކީ އެފްއޭއެމް އާއި އަމީން ކޮންސްޓްރަކްޝަން އާ ދެމެދު ކުރެވުނު ޑޮލަރު މާރުކުރުމުގެ މުއާމަލާތެއް ކަމަށް ސާބިތުވާ ކަމަށް ނިންމާފައިވާ ކަމަށެވެ.
ޕީޖީ އޮފީހުން ބުނީ އެ ޗެކަކީ ޑޮލަރު މާރުކުރުމުގެ މުއާމަލާތެއް ކަމަށް މައްސަލަ ބެއްލެވި ފަނޑިޔާރު ކަނޑައަޅުއްވާފައި ވަނީ ގާނޫނީ ހަމަތަކާ ޚިލާފަށް ހެކި ވަޒަން ކޮށްގެން ކަމަށް އެ އޮފީހުން ދެކޭ ކަމަށެވެ. އަދި އެ ދައުވާ ސާބިތު ކުރުމަށް ހުށަހެޅި ގިނަ ޝަފަހީ ހެކިންގެ ހެކިބަސް ނުނެގުމަށް މައްސަލަ ބެއްލެވި ފަނޑިޔާރު ނިންމަވާފައި ވަނީ ޤާނޫނާ ޚިލާފަށް ކަމަށް ވެސް ޕީޖީ އޮފީހުން ދެކޭ ކަމަށެވެ.
އެ އޮފީހުން ބުނީ އެހެންކަމުން މައްސަލައިގެ އެ ބައި ހައިކޯޓުގައި އިސްތިއުނާފު ކޮށްފައިވާ ކަމަށެވެ.
އެ އޮފީހުން ހައިކޯޓުގައި އެދިފައި ވާނީ، ދައުވާގެ އެ ބައި ސާބިތުކުރުމަށް ހުށަހެޅި އެންމެހައި ހެކިންގެ ހެކިބަސް ނަގައި، ދައުވާ ސާބިތުކުރުމަށް ހުށަހަޅާފައިވާ އެންމެހައި ހެކިތައް އަލުން ވަޒަންކޮށް، އެ ޗެކާ ގުޅޭ މުއާމަލާތަކީ މަނީ ލޯންޑްރިންގެ އަމަލެއްކަމާމެދު އަލުން ގޮތެއް ކަނޑައެޅުމަށްޓަކައި މައްސަލަ ދަށު ކޯޓަށް ތަހުވީލު ކޮށްދިނުމަށް ކަމަށް ޕީޖީ އޮފީހުން ވަނީ ބުނެފަ އެވެ.
ބައްސާމުގެ މައްޗަށް މަނީ ލޯންޑްރިންގެ ކުށުގެ މި ދައުވާ ސާބިތުވާ ކަމަށް ކަނޑައަޅާފައިވާ ކަނޑައެޅުމަކަށް މި އިސްތިއުނާފާ ގުޅިގެން އަސަރެއް ނުކުރާނެ ކަމަށް ވެސް ޕީޖީން ބުނެ އެވެ. ސަބަބަކީ، ބައްސާމުގެ މައްޗަށް ސާބިތުވެފައިވާ ދައުވާގައި އެފްއޭއެމް ގެ އެހެން ޗެކްތަކާއި ފައިސާ ހިމެނޭއިރު، އެ ފައިސާ ލޯންޑަރ ކޮށްފައިވާ ކަމަށް ކަނޑައަޅާފައިވާ ކަނޑައެޅުމަށް އެ އިސްތިއުނާފުގައި ތައުނު ކޮށްފައި ނުވާނެތީ ކަމަށް ޕީޖީ އޮފީހުން ބުނެ އެވެ.
މި ޗެކާ ގުޅިގެން އަމީން ކޮންސްޓްރަކްޝަން ގެ މައްޗަށް އުފުލި މަނީ ލޯންޑަރ ކުރުމަށް އެހީތެރިވުމުގެ ކުށުގެ ދައުވާ ސާބިތު ނުވާ ކަމަށް އެ ކޯޓުން ނިންމި ނިންމުން 2 މާރިޗު 2026 ގައި ޕީޖީ އޮފީހުން ވަނީ ހައިކޯޓުގައި އިސްތިއުނާފު ކޮށްފަ އެވެ.
