ނަގުދު ފައިސާ އާއި ޗެކުން އެފްއޭއެމްއަށް ލިބުނު 14.10 މިލިއަން ރުފިޔާ ގެއްލިފައިވޭ: އޮޑިޓް

ނަގުދު ފައިސާ އިންނާއި ޗެކުން އެފްއޭއެމް އަށް ފައިސާ ދިންކަމަށް ބުނެ ހުށަހަޅާފައިވާ ރަސީދު ތަކާއި ޕޭމަންޓް ވައުޗަރ ތަކުގައި ހިމެނޭ ޖުމުލަ 14.10 މިލިއަން ރުފިޔާ ގެއްލިައިވާ ކަމަށް ހުޅުމާލޭގައި ފުޓްބޯލް ޓްރެއިނިންގ ފެސިލިޓީއެއް ގާއިމުކުރުމަށް އެފްއޭއެމަށް ދޫކޮށްފައިވާ ބިމުން ބައެއް ކުއްޔަށް ދިނުމުގެ މުއާމަލާތްތަކާ ގުޅޭގޮތުން އޮޑިޓަރ ޖެނެރަލްގެ އޮފީހުން ތައްޔާރުކުރި ހާއްސަ އޮޑިޓް ރިޕޯޓުން ހާމަވެއްޖެ އެވެ.

މި ރިޕޯޓުގައި ބަޔާންކޮށްފައިވާ ގޮތުގައި، ނަގުދު ފައިސާއާއި ޗެކުން އެފްއޭއެމަށް ފައިސާ ދެއްކި ކަމަށް ބުނެ ހުށަހަޅާފައިވާ ރަސީދުތަކާއި ޕޭމަންޓް ވައުޗަރުތަކުގައި ހިމެނޭ ޖުމުލަ 14.10 މިލިއަން ރުފިޔާ އެ އިދާރާއަށް ލިބިފައިވާކަން އެނގެން ނެތް ކަމަށާއި އެ ފައިސާ ގެއްލިފައިވާ ކަމަށް ވަނީ ފާހަގަކޮށްފަ އެވެ.

އޮޑިޓް ރިޕޯޓުގައި ބުނެފައިވާ ގޮތުގައި، ކުލީގެ ގޮތުގައި އެފްއޭއެމަށް ދައްކަންޖެހޭ ފައިސާގެ ތެރެއިން 14،100،000 (ސާދަ މިލިއަން އެއްލައްކަ) ރުފިޔާ އެފްއޭއެމަށް ލިބިފައިވާ ކަމަށް ބުނެ، އެ އިދާރާގެ ސްޓޭމްޕާއި އިސްވެރިންގެ ސޮއި ހިމެނޭ ލިޔުންތަކެއް ވަނީ ހުށަހަޅާފަ އެވެ.

މި ފައިސާ ލިބުނު ކަމަށް ބުނެ ރަސީދުތަކާއި ޕޭމަންޓް ވައުޗަރުތަކުގައި ސޮއިކޮށްފައިވަނީ އެފްއޭއެމްގެ ކުރީގެ ރައީސް އާއި، ކުރީގެ ޖެނެރަލް ސެކްރެޓަރީގެ އިތުރުން ކުރީގެ ޑިރެކްޓަރ އޮފް ފައިނޭންސް ކަމަށް އޮޑިޓުން ވަނީ ހާމަކޮށްފަ އެވެ. ނަމަވެސް، މި ފައިސާގެ ތެރެއިން އެއްވެސް މިންވަރެއް އެފްއޭއެމްގެ ބޭންކް އެކައުންޓްތަކަށް ޖަމާކޮށްފައި ނުވާކަން އޮޑިޓަރުން ވަނީ ފާހަގަކޮށްފަ އެވެ. އަދި މި ފައިސާ ނަގުދު ފައިސާގެ ގޮތުގައި ލިބުނުކަން ނުވަތަ އެ އިދާރާގެ ބޭނުންތަކަށް ހަރަދުކުރިކަން އެނގޭނެ އެއްވެސް ރެކޯޑެއް ކޭޝް ރެޖިސްޓަރތަކުންނާއި އެހެނިހެން ލިޔެކިޔުންތަކުން ފެންނާކަށް ނެތެވެ.

މީގެ އިތުރުން، ސަބްލީސް އެއްބަސްވުންތަކުގެ ދަށުން އެފްއޭއެމްގެ ބޭންކް އެކައުންޓަށް ޖަމާވި ފައިސާގެ ތެރެއިން 14،074،060 (ސާދަ މިލިއަން ހަތްދިހަ ހަތަރު ހާސް ފަސްދޮޅަސް) ރުފިޔާ އެކި އަމިއްލަ ފަރާތްތަކުގެ އެކައުންޓްތަކަށް ފޮނުވާފައިވާކަން ވެސް އޮޑިޓުން ވަނީ ހާމަވެފައެވެ. މީގެ ތެރޭގައި ބޭރު ފައިސާ ގަނެވިއްކުމުގެ ވިޔަފާރިކުރާ އަމިއްލަ ކުންފުންޏެއްގެ އެކައުންޓަށް ޖަމާކޮށްފައިވާ 8.98 މިލިއަން ރުފިޔާ ހިމެނެ އެވެ. ބޭރު ފައިސާގެ މައްސަލައިގައި އޮޑިޓުގައި ބުނެފައިވަނީ 2022 އާއި 2023 ވަނަ އަހަރުގެ ތެރޭގައި ޗެކް މެދުވެރިކޮށް 13 ޓްރާންސެކްޝަނެއްގެ މަތިން މަނީ އެކްސްޗޭންޖް ވިޔަފާރި ކުރި އަމިއްލަ ކުންފުންޏެއްކަމަށްވާ އެމްއެސް ފައިނޭންސް ކަރަންސީ އެކްސްޗޭންޖް ޕްރައިވެޓް ލިމިޓެޑްގެ ބޭންކް އެކައުންޓަށް ޖަމާކޮށްފައިވާ ކަން ފާހަގަކުރެވެ އެވެ. 

ނަމަވެސް، އެ ކުންފުނިން އެފްއޭއެމް އަށް އެއްވެސް ޚިދުމަތެއް ފޯރުކޮށްދީފައިވާ ކަން ނުވަތަ އެ ކުންފުންޏަށް އެއްވެސް ފައިސާ އެއް ދައްކަންޖެހޭ ފަދަ މުޢާމަލާތެއް ހިނގާފައިވާކަން އެފްއޭއެމްގެ ރެކޯޑުތަކުން އެނގޭކަށް ނެތެވެ. މި ފައިސާ ބަދަލުކުރި މަޤްޞަދު އެނގޭނެ އެއްވެސް ރަސްމީ ރެކޯޑެއް އެފްއޭއެމްގެ ލިޔެކިޔުންތަކުން އެނގެން ނެތެވެ. މި ފައިސާ އެ ކުންފުނީގެ އެކައުންޓަށް ޖަމާ ކޮށްފައިވަނީ ބިމުގެ ސްލޮޓްތަކުގެ ކުލީގެ ފައިސާ އެފްއޭއެމްގެ އެކައުންޓަށް ޖަމާވި ތާރީޚާ ގާތް ތާރީޚުތަކެއްގަ އެވެ.

އެފްއޭއެމްއަކީ ބޭރު ފައިސާ އިން އާމްދަނީ ލިބޭ އިދާރާއަކަށް ވެފައި، ޑޮލަރު ގަތުމަށް އެހެން ފަރާތަކަށް މިވަރަށް ރުފިޔާ ފޮނުވަންޖެހޭ ފަދަ ހާލަތެއް އޮތްކަން ރެކޯޑުތަކުން އެނގެން ނެތްއިރު، މި މުޢާމަލާތްތަކަކީ އެފ.ްއ.ޭއެމްއަށް ލިބުނު ބިމުގެ ސްލޮޓަތަކުގެ ކުލީގެ ފައިސ އިން ނ ޖ އިޒު ފައިދ އެއް ހޯދުމުގެ މަޤްޞަދުގައި ހިންގ ފައިވާ މުޢާމަލާތްތަކެއް ކަމަށް ބެލެވޭ ކަމަށް އޮޑިޓުގައި ބުނެ އެވެ. އަދި މިކަމާ ގުޅޭގޮތުން ފައިސާ ލިބުނު ކުންފުނިން ބުނެފައިވަނީ އެފްއޭއެމް އިން ފޮނުވި ފައިސާ އަކީ މަނީ އެކްސްޗޭންޖް މުޢާމަލާތްތަކެއް ކަމަށެވެ. ނަމަވެސް، އެފްއޭއެމްއިން ފޮނުވި ފައިސާ އަށްވާ ބޭރުފައިސާ އެފްއޭއެމްގެ އެއްވެސް ބޭންކް އެކައުންޓަކަށް ޖަމާވެފައި ނުވެ އެވެ. އަދި އެ ފައިސާ ނުވަތަ އެ ފައިސާ އަށްވާ ބޭރު ފައިސާ ލިބުނުކަން އެފްއޭއެމްގެ އެއްވެސް ރެކޯޑަކުން އެނގެން ނެތްކަމަށް އޮޑިޓުގައި ބުނެފައިވެ އެވެ. 

އޮޑިޓް ރިޕޯޓުގައި އިތުރަށް ބަޔާންކޮށްފައިވާ ގޮތުގައި، އެއްވެސް ލިޔެކިޔުމެއް ނެތި އަދި ކޮން ބޭނުމަކު ކުރި މުއާމަލާތެއްކަން އެނގެން ނެތް ގޮތަށް، އަމިއްލަ ފަރުދުންނާއި އެހެނިހެން ކުންފުނިތަކުގެ އެކައުންޓްތަކަށް 5.08 މިލިއަން ރުފިޔާ ވަނީ ޖަމާކޮށްފަ އެވެ. މީގެ އިތުރުން ނަގުދު ފަިސާގެ ގޮތުގައި ބޭންކް އެކައުންޓުންނަގާފައިވާ 1.42 މިލިއަން ރުފިޔާ  އެފްއޭއެމްގެ ބޭނުމަށް ހަރަދުކޮށްފައިވާކަން އެނގެން ނެތް ކަމަށް ވެސް އޮޑިޓުގައި ބުނެފައިވެ އެވެ.