"ލޫޓުވައިފި" ބޮޑު މުޒާހަރާ އާއި ގުޅިގެން އެމްޕީ މައުރޫފް އަދި އިތުރު ދެ މީހެއްގެ މައްޗަށް ދައުވާ ކުރަން ފޮނުވައިފި

ނިމިދިޔަ 2025 ވަނަ އަހަރުގެ އޮކްޓޯބަރު މަހުގެ ތިން ވަނަ ދުވަހުގެ ރޭ އެމްޑީޕީ އިން ކުރިޔަށް ގެންދިޔަ "ލޫޓުވައިފި" މުޒާހަރާއާ ގުޅިގެން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) އާއި އެމްޑިޕީގެ އިތުރު 2 މެމްބަރެއްގެ މައްޗަށް ދައުވާ ކުރުމަށް ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފި އެވެ.

މަޓޭގެ އިތުރުން އެމްޑީޕީގެ ގައުމީ މަޖިލީހުގެ މެންބަރެއް ކަމުގައިވާ ފާތިމަތު ޒަހިއްޔާ (ޒާޔާ) އާއި ނ. ހޮޅުދޫ، މާފޮޅޭވިލާ، އަބްދުއްސަލާމްގެ މައްޗަށް ވެސް ދައުވާ ކޮށްދިނުމަށް އެދި ފުލުހުންގެ ފަރާތުން ޕީޖީ އޮފީހަށް ފޮނުވާފައިވެ އެވެ.

ފުލުހުން ފޮނުވާފައިވާ މައްސަލަ ނިމުނުގޮތުގެ ލިޔުމުގައި ވާގޮތުން މި ތިން މީހުންނަށް ވެސް ކުރަނީ ޣައިރު ޤާނޫނީ އެއްވުމެއް ރޫޅާލަން އުޅޭ މީހާއަށް ހުރަސް އެޅުމުގެ ތުހުމަތެވެ. މި ތިން މީހުންގެ މައްޗަށް ދައުވާ ކުރަން ފޮނުވާފައިވަނީ ގާނޫނާ ޚިލާފަށް މާލޭގެ އެކި ސަރަހައްދުގެ މަގުތަކަށް އެއްވެ އަޑުގަދަކޮށް މުޒާހަރާކޮށް، އާންމު ދަތުރުފަތުރަށް ހުރަސް އެޅުމާއި، ވިޔަފާރިތަކަށް ދަތިވާނެހެން ހަރަކާތްތެރިވެ، ފުލުހުންގެ ދައުރު އަދާކުރުމަށް ހުރަސް އަޅައި، ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސް އެޅިކަމުގެ ތުހުމަތުވާ މައްސަލައިގައި ކަމަށް ފުލުހުން ބުނެފައިވެ އެވެ.

މިކަމާ ގުޅިގެން އެކްސް ގައި ކުރެއްވި ޕޯސްޓެއްގައި އެމްޕީ މަޓޭ ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަންނަންޖެހޭ ހަގީގަތަކީ، އެނާ ގެ މައްޗަށް ދަޢުވާ އުފުލުމަކީ ކުރިއަށް އޮތް ލޯކަލް ކައުންސިލް އިންތިޚާބުގެ އެމްޑިޕީގެ ކެމްޕޭނަށް އެޅޭނެ ހުރަހެއް ނޫން ކަމެވެ. އަދި ނަގަން އުޅޭ ފެންނަ ނުފެންނަ ވޯޓުގައި ރައްޔިތުން އެމަނިކުފާނަށް "އާނބަސް" ނުބުނާނެކަން ވެސް ރައީސް މުޢިއްޒު ގަބޫލުފުޅު ކުރައްވަން ޖެހޭކަމަށް މަޓޭ ވަނީ ވިދާޅުވެފަ އެވެ. 

އެމްޑީޕީ އިން ބޭއްވި "ލޫޓުވައިފި" މުޒާހަރާއާ ގުޅިގެން މެންބަރު މައުރޫފު އާއި، ޒަހިއްޔާ އަދި ސަލާމްގެ އިތުރުން އެހެން ބަޔަކު ވެސް އެ ރޭ ހައްޔަރުކުރި އެވެ. މި މުޒާހަރާގެ ތެރެއިން ފުލުހުންގެ އަމުރަށް ނުކިޔަމަންތެރިވެ، ވާޖިބަށް ހުރަސްއަޅައި، ފުލުހުންގެ އާލާތްތަކަށް ގެއްލުން ދިންކަމުގެ ތުހުމަތުގައި ޖުމްލަ އަށް މީހަކު ހައްޔަރުކުރި އެވެ. އޭގެ ތެރެއިން ހަތް މީހެއްގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން، ހަ މީހަކު ފަނަރަ ދުވަހަށް ބަންދުކުރުމަށް އަމުރުކޮށްފައިވާއިރު، އެކަކު ވަނީ ބައެއް ޝަރުތުތަކާއެކު ދޫކޮށްލާފަ އެވެ.

މުޒާހަރާގެ ބައިވެރިން އާޓިފިޝަލް ބީޗުން ނުކުމެ މަޖީދީމަގަށް ވަންނަން އުޅުމުން، ފުލުހުން ވަނީ ބެރިކޭޑް ޖަހައި އެ ސަރަހައްދު ބަންދުކޮށްފަ އެވެ. މި މުޒާހަރާ ކޮންޓްރޯލްކުރުމުގެ ތެރޭގައި ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ހަމަނުޖެހުންތަކުގައި ބައެއް މީހުންނަށް އެކިވަރުގެ އަނިޔާ ލިބިފައިވެ އެވެ.

ފަހުގެ ތާރީޚެއްގައި ގިނަ ބަޔަކު ބައިވެރިވި މި މުޒާހަރާ ރޫޅާލުމަށް ފުލުހުން ވަނީ ޕެޕަރ ސްޕްރޭގެ އިތުރުން، ފުރަތަމަ ފަހަރަށް "ލޯންގް ރޭންޖް އެކޮއިސްޓިކް ޑިވައިސް" (އެލް.އާރް.އޭ.ޑީ) އޭ ކިޔާ ތޫނު އަޑު ފޮނުވާ އާލާތެއް ބޭނުންކޮށްފަ އެވެ. މުޒާހަރާ ރޫޅާލަން އެކަށީގެންނުވާ ބާރުގެ ބޭނުން ފުލުހުން ކުރުމުގެ ސަބަބުން ގިނަ ބައެއްގެ ފާޑުކިޔުން ވަނީ ރައީސް މުއިއްޒުގެ ސަރުކާރަށް އަމާޒުވެފަ އެވެ.