ސައީދު އަށް ނާއިންސާފް ހަރާމް ހުކުމް އިއްވިތާ 5 މަސް: އެންމެ ބޮޑު ކަންބޮޑުވުމަކީ އެކަށީގެންވާ ބޭސްފަރުވާ ނުލިބި ލަސްވާތީ

ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރު އަހުމަދު ސައީދު މުހައްމަދުގެ މައްޗަށް އިއްވާފައިވާ ނާއިންސާފު ޖަލު ހުކުމް ތަންފީޒު ކުރައްވަމުން ގެންދަވާއިރު، އޭނާއަށް އެކަށީގެންވާ ސިއްހީ ފަރުވާ ނުލިބޭ ކަމަށް ބުނެ އާއިލާ އިން ކަންބޮޑުވުން ފާޅުކޮށްފި އެވެ.

ސައީދު ޖަލުގައި ހޭދަކުރެއްވި މުއްދަތުގައި، އޭނާގެ ސިއްޙީ ހާލަތު ހުރި ގޮތުން ގަވާއިދުން އައި.ޖީ.އެމް.އެޗް އިން ފަރުވާ ހޯއްދަވަން ޖެހިވަޑައިގަތެވެ. ދާދި ފަހުން ސިއްޙީ ހާލަތު އިތުރަށް ގޯސްވެ، ހޮސްޕިޓަލުގައި އެޑްމިޓްކޮށްގެން ފަރުވާ ދީފައިވާއިރު، ސިއްޚީ ގޮތުން ސައީދު ހޯދަންޖެހޭ މުހިންމު ފަރުވާތައް ލިބުން ލަސްވަމުން ދިއުމަކީ އާއިލާގެ ވަރަށް ބޮޑު ކަންބޮޑުވުމެކެވެ.

‎ރާއްޖެއެމްވީ އާ ވާހަކަ ދައްކަމުން އައިލާގެ ފަރާތުން ފާހަގަކުރި ގޮތުގައި، އެކަށީގެންވާ ގޮތެއްގައި ފަރުވާ ނުލިބި ލަސްވާ ކޮންމެ ދުވަހަކީ ސައީދުގެ ސިއްޚީ ހާލަތު އިތުރަށް ގޯސްވެ ފުރާނަ އަށް ނުރައްކާ ވެދާނެ ކަމުގެ ބިރު އޮތް ދުވަހެކެވެ.

‎މީގެ އިތުރުން، ސައީދުގެ މެޑިކަލް ކަންތައްތައް ކުރިން ބަލަހައްޓައި، އޭނާ އަށް ފަރުވާ ދެއްވި ޑޮކްޓަރުންނަށް ދެއްކުމުގެ ފުރުސަތު ބަންދުވެފައި އޮތުމަކީ އާއިލާގެ އެންމެ ބޮޑު އެއް ކަންބޮޑުވުމެވެ. އާއިލާ އިން ބުނާ ގޮތުގައި ސައީދުގެ ބަލި ހާލަތު އެންމެ ރަނގަޅަށް އެނގޭނީ ކުރިންވެސް ފަރުވާ ދެއްވި ޑޮކްޓަރުންނާ އަދި ފަރުވާ އަށް އެކަށީގެންވާ ޒަމާނީ ވަސީލަތްތައް ހުރި ތަނަކުން ކަމަށްވާއިރު، އެ ޑޮކްޓަރުންގެ އިރުޝާދުގެ ދަށުން ފަރުވާ ހޯދުމުގެ ފުރުސަތު ނުލިބުމަކީ، ފަރުވާގެ ނިޒާމަށް އޮތް ބޮޑު ހުރަހެކެވެ.

ބޭސްފަރުވާ ކުރުމުގެ ހައްގަކީ ކޮންމެ އިންސާނަކަށްމެ ކަށަވަރުކޮށްދޭންޖެހޭ އަސާސީ ހައްގަކަށްވާއިރު، ސައީދު އެ ހައްގުން މަހުރޫމް ނުކުރުމަށް އާއިލާގެ ފަރާތުން ވަނީ އިލްތިމާސްކޮށްފަ އެވެ.

ސިއްހީ ފަރުވާ ލަސްވުމެއްނެތި ފޯރުކޮށްދިނުމަކީ އިންސާނީ ކަރާމާތާ ގުޅިފައިވާ ކަމެއްކަން ފާހަގަކޮށް، އާއިލާ އިން އެދެނީ މިހާރު ކުރިމަތިވެފައިވާ ދަތި ހާލަތަށް ހައްލެއް ލިބި، އެކަށީގެންވާ ސިއްހީ ފަރުވާގެ ނިޒާމެއް ސައީދަށް މަގުފަހިވެގެން ދިއުމަށެވެ.

އިސްލާމްދީނުގެ މަތިވެރި އަޅުކަންތައް ފުރިހަމަ ގޮތުގައި އަދާކުރުމުން މަހުރޫމް ކުރެވި އެ ފުރުސަތު ނުލިބޭތީ، ސައީދު ވަނީ އާއިލާ އަށް އެ ކަންބޮޑުވުން ފާޅުކޮށް، އެކަމާ އިންތިހާއަށް ހިތާމަކުރާކަން ހާމަކޮށްފަ އެވެ.

‎ސައީދުގެ މައްޗަށް 4 އަހަރުގެ ނާއިންސާފު ހަރާމް ޖަލު ހުކުމެއް އިއްވާފައިވަނީ 28 ސެޕްޓެމްބަރު 2025 ގަ އެވެ. މި ހުކުމާ ގުޅިގެން ޝަރުއީ ދާއިރާގެ ބޭފުޅުންނާއި އާންމުންގެ ފާޑުކިޔުން އަމާޒުވެފައިވާއިރު، ގިނަ ބަޔަކު ގަބޫލުކުރާ ގޮތުގައި މިއީ ސިޔާސީ ނުފޫޒު އެކުލެވޭ، އިންސާފުން އެއްކިބާވެފައިވާ ނާއިންސާފު ހުކުމެކެވެ. އަދި މިއީ އޭނާ އަށް ދެވޭ އަނިޔާއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

‎މި ހުކުމް ސައީދުގެ ފަރާތުން ހައިކޯޓުގައި އިސްތިއުނާފް ކޮށްފައިވީ ނަމަވެސް، އިސްތިއުނާފީ މަރުހަލާ ދިގުލައިގެން ދިއުމަކީ އާއިލާގެ އޮތް ބޮޑު ކަންބޮޑުވުމެކެވެ. އަދި މި މަރުހަލާގެ ކަންކަން އަވަސްކޮށްދިނުމަށް އާއިލާ އިން ވަނީ އިލްތިމާސްކޮށްފަ އެވެ.