ވެޓަރަންސް ކަޕްގެ ޗެމްޕިއަންކަން ވިލިމާލެ ޔުނައިޓެޑުން ހޯދައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދިޔަ، އެފްއޭއެމް ވެޓަރަންސް ކަޕްގެ ޗެމްޕިއަންކަން ވިލިމާލެ ޔުނައިޓެޑުން ހޯދައިފި އެވެ.

ވިލިމާލެ ޔުނައިޓެޑުން މުބާރާތުގެ ޗެމްޕިއަންކަން ހޯދީ ހޯމަ ދުވަހުގެ ހަވީރު މާފަންނު ޓާފް ދަނޑުގައި ކުޅުނު ފައިނަލް މެޗުގައި، ހުޅުމާލެ ވެޓަރަންސް ކުލަބުގެ މައްޗަށް ކުރި ހޯދައިގެންނެވެ. އެ މެޗު ވިލިމާލެ ޔުނައިޓެޑުން ކާމިޔާބު ކުރީ 1-0 އިންނެވެ. މެޗުގައި ވިލިމާލެ ޔުނައިޓެޑުން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ.

މެޗު ފަށައިގެން 16 ވަނަ މިނެޓުގައި ވިލިމާލެ ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޙުސެއިން ރަޝީދު އެވެ. އޭގެ ފަހުން މެޗުގައި ލީޑު ފުޅާ ކުރާނެ ފުރުސަތު ވެސް ވިލިމާލެ ޔުނައިޓެޑަށް ލިބުނެވެ. މެޗުގެ ނަތީޖާ ހަމަހަމަ ކުރުމަށް ހުޅުމާލެ ވެޓަރަންސް އިން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ.

މިފަހަރުގެ ވެޓަރަންސް ކަޕްގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ހުޅުމާލެ ވެޓަރަންސްގެ ޙުސެއިން ސިމާޒް އެވެ. އޭނާ ވަނީ މުބާރާތުގައި އަށް ލަނޑު ޖަހައިފަ އެވެ. މީގެ އިތުރުން މުބާާރާތުގެ އެންމެ މޮޅު ކުޅުންތެރިޔަކަަށް ހޮވުނީ ވިލިމާލެ ޔުނައިޓެޑުގެ ޙަސަން ޞަލާޙު އެވެ. 

އެފްއޭއެމް އިން ބޭއްވި ވެޓަރަންސް ކަޕްގައި މި އަހަރު ޖުމުލަ 10 ޓީމެއް ވާދަ ކުރި އެވެ. މިއީ ގިނަ އަހަރު ތަކެއްގެ މެދު ކެނޑުމަކަށް ފަހު ސީދާ އެފްއޭއެމް އިން ވެޓަރަންސް ކަޕް ބޭއްވި ފުރަތަމަ ފަހަރެވެ.