އެފްއޭއެމް ވެޓަރަންސް ކަޕް: ވިލިމާލެ ޔުނައިޓެޑުން، ސިފައިންގެ ކުލަބު ބަލިކޮށްފި
މިއީ މުބާރާތުގައި ވިލިމާލެ ޔުނައިޓެޑުން ހޯދި ދެ ވަނަ މޮޅު. މި ގުރޫޕުގެ ފުރަތަމަ މެޗުގައި ވިލިމާލެ ޔުނައިޓެޑުން ވަނީ ނިއު ރޭޑިއަންޓް ސްޕޯޓްސް ކުލަބާ ކުޅެ މޮޅުވެފައި.
މެޗުގައި ލަނޑު ޖެހުމަށް ފަހު ވިލިމާލެ ޔުނައިޓެޑުގެ ކުޅުންތެރިން އުފާ ފާޅު ކުރަނީ | ސޯޝަލް މީޑިއާ
މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް އޭގައި ދިވެހި ސިފައިންގެ ކުލަބާ ދެކޮޅަށް ކުޅުނު މެޗުން ވިލިމާލެ ޔުނައިޓެޑު މޮޅުވެއްޖެ އެވެ.
ހޮނިހިރު ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު ވިލިމާލެ ޔުނައިޓެޑުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފު ނިމުނުއިރު ދެ ޓީމު އެއްވަރުވެފައި އޮތް ނަމަވެސް، ދެ ވަނަ ހާފުގައި ވިލިމާލެ ޔުނައިޓެޑުން ވަނީ ދެ ލަނޑު ޖަހައިފަ އެވެ.
މެޗުގެ ފުރަތަމަ ހާފުގެ 15 ވަނަ މިނެޓުގައި އަޙުމަދު ރަޝީދު ވަނީ ލަނޑު ޖަހައި ސިފައިންގެ ކުލަބަށް ލީޑު ނަގައިދީފަ އެވެ. އޭގެ ފަހުން މެޗުގެ ފުރަތަމަ ހާފުގެ 30 ވަނަ މިނެޓުގައި ޙަސަން ސަލާހު ވަނީ ވިލިމާލެ ޔުނައިޓެޑަށް ނަތީޖާ ހަމަހަމަ ކޮށްދީފަ އެވެ.
މެޗުގެ ދެ ވަނަ ހާފުގައި ވިލިމާލެ ޔުނައިޓެޑުން ލީޑު ނެގީ ޙުސެއިން ރަޝީދު ޖެހި ލަނޑުންނެވެ. އޭގެ ފަހުން މެޗުގައި އެ ޓީމުގެ ތިން ވަނަ ލަނޑު ޖަހައި މެޗުން ފުރިހަމަ މޮޅެއް ހޯދައިދިނީ އާދަމް މައުރޫފް އެވެ.
މިއީ މުބާރާތުގައި ވިލިމާލެ ޔުނައިޓެޑުން ހޯދި ދެ ވަނަ މޮޅެވެ. މި ގުރޫޕުގެ ފުރަތަމަ މެޗުގައި ވިލިމާލެ ޔުނައިޓެޑުން ވަނީ ނިއު ރޭޑިއަންޓް ސްޕޯޓްސް ކުލަބާ ކުޅެ މޮޅުވެފަ އެވެ.
