އެފްއޭއެމް ވެޓަރަންސް ކަޕް: މުއިވެޔޮ ބަލިކޮށް ނިއު ރޭޑިއަންޓް ސެމީ ފައިނަލް އަށް

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ސްޓޭޖުގައި މުއިވެޔޮ ފްރްންޑްސް ކުލަބާ ދެކޮޅަށް ކުޅުނު މެޗުން މޮޅުވެ، ނިއު ރޭޑިއަންޓް އިން މުބާރާތުގެ ސެމީ ފައިނަލްގެ ޖާގަ ކަށަވަރު ކޮށްފި އެވެ.

މާފަންނު ޓާފް ދަނޑުގައި އާދީއްތަ ދުވަހުގެ ހަވީރު ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 1-0 އިންނެވެ. މެޗުގެ ހަމައެކަނި ލަނޑު ނިއު ރޭޑިއަންޓް އިން ޖެހީ ދެ ވަނަ ހާފުގަ އެވެ. 

މެޗު ފަށައިގެން ރަނގަޅަށް ކުޅެމުން ދިޔައީ މުއިވެޔޮ އިންނެވެ. އެގޮތުން އެ ޓީމުން ދިޔައީ ލިބުނު ފުރުސަތު ތަކުގައި ނިއު ރޭޑިއަންޓްގެ ގޯލަށް ނުރައްކާ ކުރުމަށް މަސައްކަތް ކުރަމުންނެވެ. މެޗުގައި ނިއު ރޭޑިއަންޓް އިން ލީޑު ނެގީ 58 ވަނަ މިނެޓުގަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ އަޙުމަދު އަޝްފާން އެވެ. 

މޮޅާ އެކު ނިއު ރޭޑިއަންޓް އިން މުބާރާތުގެ ސެމީ ފައިނަލްގެ ޖާގަ ހޯދީ މި ގުރޫޕުގެ ދެ ވަނަ ޓީމުގެ ގޮތުގައި ހަތް ޕޮއިންޓާ އެކު އެވެ. މި ގުރޫޕުގެ އެއް ވަނައިގައި ސެމީ ފައިނަލްގެ ފުރުސަތު ހޯދި ވިލިމާލެ ޔުނައިޓެޑަށް ލިބެނީ ނުވަ ޕޮއިންޓެވެ. މުއިވެޔޮ އަށް ތިން ވަނަ ލިބުނުއިރު، އެ ޓީމަަކީ ނައިބު ރައީސް ޙުސެއިން މުޙައްމަދު ލަޠީފް (ސެމްބެ) ކުޅުއްވާ ޓީމެވެ.