އެފްއޭއެމް ވެޓަރަންސް ކަޕް: ޕޮލިސް ކުލަބު ބަލިކޮށް، ވިލިމާލެ ޔުނައިޓެޑު ފައިނަލް އަށް

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ސެމީ ފައިނަލްގައި ޕޮލިސް ކުލަބާ ދެކޮޅަށް ކުޅުނު މެޗުން މޮޅުވެ، ވިލިމާލެ ޔުނައިޓެޑުން މުބާރާތުގެ ފައިނަލްގެ ފުރަތަމަ ޖާގަ ހޯދައިފި އެވެ.

ހުކުރު ދުވަހުގެ ހަވީރު މާފަންނު ޓާފު ދަނޑުގައި ކުޅުނު މެޗު ވިލިމާލެ ޔުނައިޓެޑުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ވިލިމާލެ ޔުނައިޓެޑުން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ. ޕޮލިސް ކުލަބުގެ ހަމައެކަނި ލަނޑު އެ ޓީމުން ޖެހީ ވެސް ދެ ވަނަ ހާފުގަ އެވެ.

 މެޗު ފަށައިގެން އަށް ވަނަ  މިނެޓުގައި ވިލިމާލެ ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މުޙައްމަދު ޖުނައިދު އެވެ. އޭގެ ފަހުން ދެ ވަނަ ހާފުގެ 54 ވަނަ މިނެޓުގައި ޙަސަން ޞަލާޙު ވަނީ ވިލިމާލެ ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. ވިލިމާލެ ޔުނައިޓެޑުން ދެ ވަނަ ލަނޑެއް ޖެހިތާ ދެ މިނެޓު ފަހުން، އާޔަތުﷲ އިބްރާހީމް ވަނީ ޕޮލިސް ކުލަބުގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ފަހުން މެޗުގެ ނަތީޖާ ހަމަހަމަ ކުރުމަށް ޕޮލިސް ކުލަބުން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ.

ވިލިމާލެ ޔުނައިޓެޑުން މުބާރާތުގެ ފައިނަލްގެ ޖާގަ ހޯދިއިރު، މުބާރާތުގެ ގުރޫޕް ސްޓޭޖުގައި ކުޅުނު ހަތަރު މެޗުން ވެސް އެ ޓީމު ވަނީ މޮޅުވެފަ އެވެ.