އެފްއޭއެމް ވެޓަރަންސް ކަޕް: ދެ ވަނަ މެޗުގައި ވިލިމާލެ ޔުނައިޓެޑު އަތުން ނިއު ރޭޑިއަންޓް ބަލިވެއްޖެ

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ބީގައި ވިލިމާލެ ޔުނައިޓެޑާ ދެކޮޅަށް ކުޅުނު މެޗުން، ނިއު ރޭޑިއަންޓް ސްޕޯޓްސް ކުލަބު ބަލިވެއްޖެ އެވެ. 

ބުދަ ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗުގައި ވިލިމާލެ ޔުނަައިޓެޑުން ވަނީ 2-1 އިން ނިއު ރޭޑިއަންޓް ބަލިކޮށްފަ އެވެ. މެޗުގައި ދެ ޓީމުން ވެސް ލަނޑުތައް ޖަހާފައި ވަނީ މެޗުގެ ދެ ވަނަ ހާފުގަ އެވެ.

އެގޮތުން މެޗުގެ 55 ވަނަ މިނެޓުގައި ޙަސަން ސޮލާޙު ވަނީ ލަނޑު ޖަހައި ވިލިމާލެ ޔުނައިޓެޑަށް ލީޑު ނަގައިދީފަ އެވެ. އޭގެ ދެ މިނެޓު ފަހުން އިސްމާއީލް މުޙައްމަދު ވަނީ ވިލިމާލެ ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

ވިލިމާލެ ޔުނައިޓެޑުން ދެ ވަނަ ލަނޑެއް ޖެހިތާ ދެ މިނެޓު ފަހުން ނިއު ރޭޑިއަންޓް އިން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. އެ ލަނޑު ނިއު ރޭޑިއަންޓަށް ޖަހައިދިނީ އިއްޒަތު ޢަބްދުލް ޣަނީ އެވެ. ނަމަވެސް، ނިއު ރޭޑިއަންޓަށް މެޗުގެ ނަތީޖާ ހަމަހަމަ ކުރެވޭ ގޮތެއް ނުވި އެވެ.

މުބާރާތުގެ ގުރޫޕް ސްޓޭޖުގައި ނިއު ރޭޑިއަންޓުގެ ފުރަތަމަ މެޗުން އެ ޓީމު ވަނީ މޮޅުވެފަ އެވެ. މިި ގުރޫޕުގައި ނިއު ރޭޑިއަންޓް އާއި، ވިލިމާލެ ޔުނައިޓެޑުގެ އިތުރުން ދެން އޮތީ، މުއިވެޔޮ ފްރެންޑްސް ކުލަބާއި، ދިވެހި ސިފައިންގެ ކުލަބު އަދި ދަ ގްރާންޑޭ އެވެ.