އެފްއޭއެމް ވެޓަރަންސް ކަޕް: ނިއު ރޭޑިއަންޓް ބަލިކޮށް ފައިނަލްގެ ފަހު ޖާގަ ހުޅުމާލެ ވެޓަރަންސް އަށް
މޮޅާއެކު ހުޅުމާލެ ވެޓަރަންސް އިން މުބާރާތުގެ ފައިނަލްގެ ޖާގަ ހޯދިއިރު، ފައިނަލް މެޗު އޮންނާނީ ހޯމަ ދުވަހުގެ ހަވީރު. މުބާރާތުގެ ފައިނަލްގައި ހުޅުމާލެ ވެޓަރަންސް އިން ނިކުންނާނީ ވިލިމާލެ ޔުނައިޓެޑާ ދެކޮޅަށް.
މެޗުގައި ލަނޑު ޖެހުމަށް ފަހު ހުޅުމާލެ ވެޓަރަންސްގެ ކުޅުންތެރިން އުފާ ފާޅު ކުރަނީ | ސޯޝަލް މީޑިއާ
މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ދެ ވަނަ ސެމީ ފައިނަލްގައި ނިއު ރޭޑިއަންޓް ސްޕޯޓްސް ކުލަބުގެ މައްޗަށް ކުރި ހޯދައި، ހުޅުމާލެ ވެޓަރަންސް ކުލަބުން މުބާރާތުގެ ފައިނަލްގެ ފަހު ޖާގަ ހޯދައިފި އެވެ.
ހޮނިހިރު ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު ހުޅުމާލެ ވެޓަރަންސް އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ހުޅުމާލެ ވެޓަރަންސް އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ. މި ހާފުގައި ނިއު ރޭޑިއަންޓް އިން ވެސް ލަނޑެއް ޖެހި އެވެ.
މެޗުގެ ފުރަތަމަ ހާފުގެ 24 ވަނަ މިނެޓުގައި ހުޅުމާލެ ވެޓަރަންސް އަށް ލީޑު ނަގައިދިނީ ހުސެއިން ވިޝާލް އެވެ. އޭގެ ތިން މިނެޓު ފަހުން ވިޝާލް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ދެ ވަނަ ހާފުގެ 42 ވަނަ މިނެޓުގައި ހުޅުމާލެ ވެޓަރަންސްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ މުޙައްމަދު ޒިޔާދު އެވެ. މެޗުގައި ހުޅުމާލެ ވެޓަރަންސް އިން ތިން ލަނޑު ޖެހި ފަހުން، ނިއު ރޭޑިއަންޓްގެ ހަމައެކަނި ލަނޑު ޖެހީ އިސްމާއީލް އަނިލް އެވެ.
މޮޅާއެކު ހުޅުމާލެ ވެޓަރަންސް އިން މުބާރާތުގެ ފައިނަލްގެ ޖާގަ ހޯދިއިރު، ފައިނަލް މެޗު އޮންނާނީ ހޯމަ ދުވަހުގެ ހަވީރު އެވެ. މުބާރާތުގެ ފައިނަލްގައި ހުޅުމާލެ ވެޓަރަންސް އިން ނިކުންނާނީ ވިލިމާލެ ޔުނައިޓެޑާ ދެކޮޅަށެވެ.
