އެފްއޭއެމް ވެޓަރަންސް ކަޕް: ހުޅުމާލެ ވެޓަރަންސް އާއި ޕޮލިސް ކުލަބު އެއްވަރު

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ބީގައި ހުޅުމާލެ ވެޓަރަންސް ކުލަބާއި، ޕޮލިސް ކުލަބު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.

ހޯމަ ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ޕޮލިސް ކުލަބުން ދެ ލަނޑު ޖަހައިގެން ކުރި ހޯދާފައި ވަނިކޮށް، ހުޅުމާލެ ވެޓަރަންސް އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރތަމަ ހާފުގެ 25 ވަނަ މިނެޓުގައި ޕޮލިސް ކުލަބަށް ލިބުނު ޕެނަލްޓީ ކާމިޔާބުކޮށް އެ ޓީމަށް ލީޑު ނަގައިދިނީ އަލީ ރިސްވާން އަޙުމަދު އެވެ. އޭގެ ދެ މިނެޓު ފަހުން އަޙުމަދު ޝާން ވަނީ ޕޮލިސް ކުލަބުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

ޕޮލިސް ކުލަބުން ދެ ލަނޑު ޖެހިތާ ތިން މިނެޓު ފަހުން، ހުޅުމާލެ ވެޓަރަންސްގެ ފުރަތަމަ ލަނޑު ޖަހައި ފަރަގު ކުޑަ ކޮށްދިނީ ޙުސެއިން ސިމާޒް އެވެ. މެޗުގެ ދެ ވަނަ ހާފުގެ 60 ވަނަ މިނެޓުގައި ހުޅުމާލެ ވެޓަރަންސް އަށް ލިބުނު ޕެނަލްޓީ ކާމިޔާބުކޮށް އެ ޓީމަށް ނަތީޖާ ހަމަހަމަ ކޮށްދިނީ ވެސް ސިމާާޒް އެވެ. 

ފަހަތުން އަރައި ޕޮލިސް ކުލަބު އަތުން ހޯދި ޕޮއިންޓާ އެކު، ހުޅުމާލެ ވެޓަރަންސް އޮތީ މި ގުރޫޕުގެ އެއް ވަނައިގަ އެވެ. މެޗުން ލިބުނު ޕޮއިންޓާ އެކު، ދެ ވަނައިގައި ޕޮލިސް ކުލަބު އޮތީ ހަތަރު ޕޮއިންޓު ހަމަކޮށްގެންނެވެ.