އެފްއޭއެމް ވެޓަރަންސް ކަޕް: ބުރު އަތުން ޕޮލިސް ކުލަބަށް ހަތް ލަނޑުގެ މޮޅެއް

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ބީގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުން، ޕޮލިސް ކުލަބު ބޮޑު މޮޅެއް ހޯދައިފި އެވެ. 

ހުކުރު ދުވަހުގެ ހަވީރު މާފަންނު ޓާފު ދަނޑުގައި ކުޅުނު މެޗު ޕޮލިސް ކުލަބުން ކާމިޔާބު ކުރީ 7-0 އިންނެވެ. މެޗުގެ ފުރަތަމަ ހާފުގައި ޕޮލިސް ކުލަބުން ހަތަރު ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ. 

މެޗުގެ ފުރަތަމަ ހާފުގެ 18 ވަނަ މިނެޓުގައި ޕޮލިސް ކުލަބަށް ލީޑު ނަގައިދިނީ އަޙުމަދު ޝާން އެވެ. އޭގެ ދެ މިނެޓު ފަހުން ނިޝާދު އަލީ ވަނީ ޕޮލިސް ކުލަބުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ 26 ވަނަ މިނެޓުގައި މުޙައްމަދު ޝަހުބާން ވަނީ ޕޮލިސް ކުލަބުގެ ތިން ވަނަ ލަނޑު ޖަހައިފަ އެވެ. އަދި އޭގެ މިނެޓެއް ފަހުން އޭނާ ވަނީ އެ ޓީމުގެ ހަތަރު ވަނަ ލަނޑު ވެސް ޖަހައިފަ އެވެ.

މެޗުގެ ދެ ވަަނަ ހާފުގައި ޕޮލިސް ކުލަބުގެ ތިން ލަނޑު ވެސް ޖެހީ ޝަހުބާން އެވެ. މެޗުގައި އޭނާ ޖުމުލަ ފަސް ލަނޑު ޖެހިއިރު، މެޗުގެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ. 

މުބާރާތުގައި ބުރުން ކުޅުނު ފުރަތަމަ މެޗުގައި ވަނީ ޔޫވީއާ އެއްވަރުވެފަ އެވެ. މިއީ ޕޮލިސް ކުލަބުން މުބާރާތުގައި ކުޅުނު ފުރަތަމަ މެޗެވެ.

ޕޮލިސް ކުލަބާއި، ބުރުގެ އިތުރުން ދެން މި ގުރޫޕުގައި އޮތީ ހުއްރިއްޔާ ސްޕޯޓްސް ކުލަބާއ، ހުޅުމާލެ ވެޓަރަންސް ކުލަބު އަދި ޔުނައިޓެޑު ވިކްޓަރީ (ޔޫވީ) އެވެ.