ޝިހާމްގެ ހެޓްރިކާ އެކު، ހުރާ އިން ޔޫވީ ބަލިކޮށްފި

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ބީގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން، ހުއްރިއްޔާ ސްޕޯޓްސް ކުލަބު (ހުރާ) މޮޅުވެއްޖެ އެވެ.

މާފަންނު ޓާފް ދަނޑުގައި އަންގާރަ ދުވަހުގެ ހަވީރު ކުޅުނު މެޗު ހުރާ އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ހުރާ އިން ތިން ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. ދެ ވަނަ ހާފުގައި ޔޫވީ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން 10 ވަނަ މިނެޓުގައި ހުރާގެ ފުރަތަމަ ލަނޑު ޖެހީ އަލީ އުމަރު އެވެ. އޭގެ ފަހުން މެޗުގެ 28 ވަނަ މިނެޓުގައި އަލީ ޝިހާމު ވަނީ ހުރާގެ ދެ ވަނަ ލަނޑު ޖަހައިފަ އެވެ. އޭގެ މިނެޓެއް ފަހުން އޭނާ ވަނީީ އިތުރު ލަނޑެއް ޖަހައި ހުރާގެ ލީޑު ފުޅާ ކޮށްފަ އެވެ. މެޗުގެ ދެ ވަނަ ހާފުގައި ޝިހާމް ވަނީ ތިން ވަނަ ލަނޑެއް ޖަހައި އޭނާގެ ހެޓްރިކް ހަމަ ކޮށްފަ އެވެ. މެޗުގައި ޔޫވީގެ ހަަމައެކަނި ލަނޑު ޖެހީ މުޙައްމަދު ޙަސަން އެވެ.

މެޗުން މޮޅުވެ ހުރާ ވަނީ މި ގުރޫޕުގެ ތިން ވަނަ އަށް ޖެހިލައިފަ އެވެ. މިއީ މުބާރާތުގައި ހުރާ އިން ހޯދި ފުރަތަމަ މޮޅެވެ.