ޗިސްމޭގެ ކެންސަރަށް އާ ފަރުވާއެއް: ޓިއުމަރުތައް އެއްކޮށް ނައްތާލައި، ބޭހަށް ނުގުޑާ މައްސަލައަށް އިންގިލާބީ ހައްލެއް

މެޑްރިޑް، ސްޕެއިން: ޗިސްމޭގެ ކެންސަރު (ޕޭންކްރިއެޓިކް ކެންސަރު) އަށް ދެވޭ ފަރުވާއަށް އިންގިލާބީ ބަދަލެއް ގެނުވައިފާނެ އާ ހޯދުމެއް ސައިންސްވެރިން ހޯދައިފިއެވެ. ސްޕެއިންގެ ނެޝަނަލް ކެންސަރ ރިސަރޗް ސެންޓަރ (ސީއެންއައިއޯ) ގެ ސައިންސްވެރިން ކުރި ދިރާސާއަކުން ދައްކާގޮތުގައި، ތިން ބޭހެއް އެއްކޮށްގެން ދެވޭ އާ ފަރުވާއެއްގެ ސަބަބުން މީދަލުގެ ހަށިގަނޑުގައި ހުރި ޗިސްމޭގެ ކެންސަރުގެ ޓިއުމަރުތައް ވަނީ އެއްކޮށް ނައްތާލެވިފައެވެ.

އަދި ހަމައެހެންމެ ކެންސަރު ސެލްތައް ބޭހަށް ނުގުޑާ (ޑްރަގް ރެސިސްޓެންސް) މައްސަލައަށްވެސް މި ފަރުވާގެ ސަބަބުން ވަނީ ކާމިޔާބު ހައްލެއް ލިބިފައެވެ. 'ޕްރޮސީޑިންގްސް އޮފް ދަ ނެޝަނަލް އެކަޑަމީ އޮފް ސައިންސަސް' (ޕީއެންއޭއެސް) ގައި ޝާއިއުކޮށްފައިވާ މި ދިރާސާގައި އިސްކޮށް ހަރަކާތްތެރިވެވަޑައިގަތީ ސީއެންއައިއޯގެ އެކްސްޕެރިމެންޓަލް އޮންކޮލޮޖީ ގްރޫޕްގެ އިސްވެރިޔާ މަރިއާނޯ ބާބަސިޑް އެވެ.

މި އާ ފަރުވާގައި އަމާޒުކޮށްފައިވަނީ ކެންސަރު އުފެދުމަށް މެދުވެރިވާ މައިގަނޑު އެއް ޖީން ކަމަށްވާ "ކޭ-ރާސް" (KRAS) ޕާތުވޭ އަށެވެ. ޗިސްމޭގެ ކެންސަރު ޖެހޭ މީހުންގެ 90 އިންސައްތަ މީހުންގެ ގަޔަށް ކެންސަރު ފެތުރެނީ މި ޖީންއަށް އަންނަ ބަދަލެއްގެ ސަބަބުންނެވެ. އާންމުކޮށް ދޭ ފަރުވާތަކުން މި ޕާތުވޭގެ އެއް ދިމާލަކަށް އަމާޒުކުރުމުން، ކެންސަރު ސެލްތައް މަދު މަސްތަކެއްގެ ތެރޭގައި އެއަށް ހޭނި، ބޭހަށް ނުގުޑާގޮތްވެއެވެ. ނަމަވެސް، މި އާ ދިރާސާގައި ބޭނުންކޮށްފައިވާ 3 ބޭސް (ޑަރަކްސޮންރާސިބް، އަފަޓިނިބް އަދި އެސްޑީ36) ގުޅިގެން ކޭ-ރާސް ޕާތުވޭގެ ތިން ދިމާލަކުން ބްލޮކްކޮށްލައެވެ. މީގެ ނަތީޖާއެއްގެ ގޮތުން ކެންސަރު ސެލްތަކަށް އަލުން އާލާވުމުގެ ފުރުސަތު ބަންދުވެ، ޓިއުމަރުތައް އެއްކޮށް ނެތިގެންދެއެވެ.

ޗިސްމޭގެ ކެންސަރަކީ ދުނިޔޭގައިވެސް އެންމެ ނުރައްކާތެރި އަދި އެންމެ އަވަހަށް ފުރާނައަށް ނުރައްކާކުރާ އެއް ކެންސަރެވެ. މި ބަލި އާންމުކޮށް ދެނެގަނެވެނީ ބަލީގެ ވަރަށް ފަހު މަރުހަލާގައި ކަމަށްވުމުން، ބަލިޖެހޭ މީހުންގެ ތެރެއިން 5 އަހަރަށްވުރެ ގިނަ ދުވަހު ދުނިޔޭގައި ތިބެނީ އެންމެ 10 އިންސައްތަ މީހުންނެވެ. އެހެންކަމުން މިއީ ސައިންސުގެ ދުނިޔޭގައި ލިބުނު ވަރަށް ބޮޑު އުއްމީދެކެވެ.

މަރިއާނޯ ބާބަސިޑް ވިދާޅުވިގޮތުގައި މިއީ ވަރަށް ކާމިޔާބު ތާރީޚީ ހޯދުމެއް. ނަމަވެސް، މިއީ އަދި ސީދާ އިންސާނުންގެ ގަޔަށް ދީގެން ކްލިނިކަލް ޓްރަޔަލްތައް ވަގުތުން ފަށަން ތައްޔާރުވެފައިވާ ފަރުވާއެއް ނޫނެވެ. އިންސާނުންނަށް ދެވޭ ފެންވަރަށް މި ބޭސްތައް ތަރައްގީކުރުމަށް އަދި އިތުރު ވަގުތު ނަގާނެއެވެ. އެހެންނަމަވެސް، މިއީ މުސްތަގުބަލުގައި ޗިސްމޭގެ ކެންސަރަށް އެކަށީގެންވާ ފަރުވާއެއް ހޯދުމަށް އެޅުނު ވަރަށް މުހިންމު ބިންގަލެއްކަން އޭނާ ފާހަގަކުރެއްވިއެވެ.

ނޯޓް; މިޚަބަރަކީ ސައިންޓިފިކް ގޮތުން ސައްޙަ އަދި އިތުބާރު ހުރި ޚަބަރެކެވެ. އެއީ ސްޕެއިންގެ ނެޝަނަލް ކެންސަރ ރިސަރޗް ސެންޓަރ (CNIO) ގެ ސައިންސްވެރިންތަކެއް ކޮށްފައިވާ ދިރާސާއެއްގެ މައްޗަށް ބިނާކޮށް ލިޔެފައިވާ ޚަބަރެކެވެ. އަދި މި ދިރާސާ ވަނީ މަޝްހޫރު ސައިންޓިފިކް ޖާނަލް އެއް ކަމަށްވާ PNAS ގައިވެސް ޝާއިއުކޮށްފައެވެ