އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާގެ އިންސާނީ ހައްގު ތަކުގެ މައްސަލައިގައި، އިންޓަނޭޝަނަލް ކްރިމިނަލް ކޯޓު (އައިސީސީ) އަށް އެހީތެރިވުމަށް ސްޕެއިން އިން ނިންމައިފި އެވެ.

ބުރާސްފަތި ދުވަހު އެކަން ހާމަ ކުރައްވާފައި ވަނީ ސްޕެއިންގެ އެޓާނީ ޖެނަރަލް އެވެ. ސްޕެއިންގެ އެޓާނީ ޖެނަރަލްގެ އޮފީހުން ނެރެފައިވާ ބަޔާނެއްގައި ބުނެފައި ވަނީ، ސްޕެއިންގެ ތަޖުރިބާކާރު ޕްރޮސެކިއުޓަރު އަދި އެޓާނީ ޖެނަރަލް އަލްވާރޯ ގާސިއާ ވަނީ ޣައްޒާގައި ހިނގާ އިންސާނީ ހައްގުތަކާ ޚިލާފު އަމަލުތައް ތަހުގީގި ކުރުމަށް ޚާއްސަ ޓީމެއް އެކުލަވާލުމަށް އަމުރު ނެރެފައި ކަމަށެވެ.

އެޓާނީ ޖެނަރަލް އެކުލަވާލާފައިވާ ތަހުގީގީ ޓީމުގެ މަޤުސަދަކީ ހެކިތައް އެއްކޮށް، ކަމާ ބެހޭ ފަރާތްތަކާ ހިއްސާ ކުރުމެވެ. އެއީ ބައިނަލްއަޤުވާމީ އެއްބާރުލުމާއި، އިންސާނީ ހައްގުތަކާ ގުޅޭ ގޮތުން ސެޕެއިންގެ ޒިންމާ އަދާ ކުރުމުގެ ގޮތުން ކުރެވޭ މަސައްކަތެއް ކަމަށް ވަނީ ފާހަގަ ކޮށްފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ލާއިންސާނީ ޖަރީމާ ތަކުގެ ސަބަބުން، އައިސީސީ އިން ވަނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަދި ކުރީގެ ޑިފެންސް މިނިސްޓަރު ޔޯވް ގަލަންޓް އަށް އަމާޒުކޮށް، ޣައްޒާގައި ހިންގާ ހަނގުރާމަ އާއި ހަނގުރާމައިގެ ކުށްތަކާއި، އިންސާނިއްޔަތާ ދެކޮޅު ކުށްތައް ކުރުމުގެ ތުހުމަތުގައި އެ ދެ މީހުން ހައްޔަރު ކުރުމުގެ އަމުރެކެވެ.

މީގެ އިތުރުން، ޣައްޒާގައި ހިންގަމުން އަންނަ ހަނގުރާމަ އާއި، ނަސްލު ނައްތާލުމުގެ ޖަރީމާތައް ހިންގާ ކަމުގެ ދައުވާ، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ކުރިއަށް ދާއިރު، ސްޕެއިން އިން ވަނީ އެ މައްސަލައިގައި ބައިވެރިވެފަ އެވެ.

ނެދަލެންޑްސްގެ ދަ ހޭގްގައި ހުންނަ މި ދެ ކޯޓުން، މި މައްސަލަތަކާ މެދު އަމަލު ކުރާ ގޮތާ މެދު އިސްރާއީލް އާއި އެ ޤައުމުގެ ބައެއް ރަޙުމަތްތެރިން ވަނީ ނުރުހުންވެ، ފާޑު ކިޔައިފަ އެވެ. މިއަހަރުގެ ފެބްރުވަރީ މަހު އެމެރިކާ އިން ވަނީ، ނަތަންޔާހޫ ހައްޔަރު ކުރުމުގެ އަމުރާ ގުޅިގެން، އައިސީސީ އިން ބޭރުގެ ބޭނުން ނަހަމަ ގޮތުގައި ކުރާ ކަމަށް ބުނެ، އެ ކޯޓާ ދެކޮޅަށް ފިޔަވަޅު އަޅަން ނިންމައިފަ އެވެ.

އައިސީސީގެ މެމްބަރުންގެ ގޮތުގައި 125 ޤައުމު ހިމެނޭއިރު، އިސްރާއީލް އިން ވަނީ އެ މައްސަލަތައް ބެލުމުގެ އިހުތިޞާޞް އައިސީސީ އަށް ލިބިގެންދާ ކަމާ މެދު ވެސް ސުވާލު އުފައްދައިފަ އެވެ.