ޣައްޒާގެ އިންސާނީ ޙާލަތާ މެދު ސްޕެއިންގެ ރަސްގެފާނު ކަންބޮޑުވުން ފާޅު ކުރައްވައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާގެ އިންސާނީ ޙާލަތު މިހާރު އޮތް ގޮތާ މެދު ސްޕެއިންގެ ރަސްގެފާނު ކިންގް ފެލިޕޭ (ހަ ވަނަ) ކަންބޮޑުވުން ފާޅު ކުރައްވައިފި އެވެ.

އަންގާރަ ދުވަހު މިޞްރަށް ކުރެއްވި ދަތުރުފުޅެއްގައި ފެލިޕޭ ވަނީ، ޣައްޒާގައި އިސްރާއީލްގެ ހަމަލާ ތަކުގައި އެތައް ހާސް ފަލަސްޠީނު ރައްޔިތުންނެއް ތަހަންމަލު ކުރަމުންދާ ވޭނާއިި ހިތާމަ ފާހަގަ ކުރައްވައި، އެކަން ކުށްވެރި ކުރައްވައިފަ އެވެ. އާންމު ގޮތެއްގައި ޤައުމުން ބޭރުގައި ހިނގަމުން އަންނަ މައްސަލަތައް، ޚާއްސަކޮށް ބޭރުގެ ސިޔާސީ މައްސަލަތަކާ ގުޅޭ ގޮތުން ފެލިޕޭ ވާހަކަ ދައްކަވަނީ ވަރަށް މަދުންނެވެ.

ފެލިޕޭ ވިދާޅުވީ، އިސްރާއީލް އިން ހަނގުރާމަ ފުޅާކޮށް، އެންމެ ފަހުގެ މަރުހަލާ ފަށާފައިވާ ކަމަށް ހާމަކޮށްފައިވާއިރު، މި ޙާލަތަކީ ބަލައި ނުގަނެވޭނެ އިންސާނީ ޙާލަތެއް ކަމަށެވެ. އަދި އެތައް ހާސް މުސްލިމުންނެއް ދަނީ އެތަކެއް ވޭނާއި، އަނިޔާ ތަހަންމަލު ކުރަމުން ކަމަށް ފާހަގަ ކުރެއްވި އެވެ.

މިދިޔަ އަހަރުގެ މެއި މަހުގެ ތެރޭގައި ސްޕެއިން އިން ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ. އަދި ސްޕެއިން އަކީ، ޔޫރަޕުގެ ޤައުމު ތަކުގެ ތެރެއިން އިސްރާއީލް އަށް އެންމެ ބޮޑަށް ފާޑު ކިޔަމުން އަންނަ އެއް ޤއުމެވެ.

އެގޮތުން މިދިޔަ ދުވަސް ތަކުގެ ތެރޭގައި ސްޕެއިން އިން ވަނީ، އިސްރާއީލް އިން ޣައްޒާގައި ނަސްލު ނައްތާލުމަށް ހިންގާ ހަނގުރާމަ ހުއްޓުވުމަށް ބާރު އެޅުމުގެ ގޮތުން އިސްރާއީލްއާ ދެކޮޅަށް ފިޔަވަޅު ތަކެއް އަޅައިފަ އެވެ. އަދި އިސްރާއީލްގައި ހުރި ސްޕެއިންގެ ސަފީރު ވެސް ވަނީ އަނބުރާ ގެނެސްފަ އެވެ.

ފަލަސްޠީނަށް ތާއީދުކޮށް 100،000 އަށް ވުރެ ގިނަ މީހުން މަގު މައްޗަށް ނިކުމެ މުޒާހަރާ ކުރުމާ ގުޅިގެން، އާދީއްތަ ދުވަހު ސްޕެއިންގެ މެޑްރިޑުގައި ބޭއްވުމަށް ހަމަޖެހިފައިވާ ވުއެލްޓާ ސައިކަލް ރޭހުގެ ފަހު ބުރު ވަނީ ކެންސަލް ކޮށްފަ އެވެ. އެކަމާ ގުޅިގެން ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ވަނީ، ޣައްޒާ ހަނގުރާމަ ހުއްޓާލަން ދެން ބައިނަލްއަޤުވާމީ ކުޅިވަރު މުބާރާތްތަކުން އިސްރާއީލް އެކަހެރި ކުރުމަށް ވެސް ގޮވާލައްވައިފަ އެވެ.