ސްޕެއިންގެ ބާސެލޯނާގައި ރޭލެއް ފާރެއްގައި ޖެހި، ޑްރައިވަރު މަރުވެ، އެތައް ބަޔަކަށް އަނިޔާވެއްޖެ

ބާސެލޯނާ ސަރަހައްދުގައި ދަތުރުކުރި ރޭލެއް، ރޭލު ދަގަނޑުތަކުގެ މައްޗަށް ވެއްޓިފައި އޮތް ފާރެއްގައި ޖެހި އަންގާރަ ދުވަހު ހިނގި ހާދިސާއެއް ގައި ޑްރައިވަރު މަރުވެ އެތައް ބަޔަކަށް އެކިވަރުގެ އަނިޔާތައް ލިބިއްޖެ ކަމަށް ސްޕެއިންގެ ކެޓަލޯނިއާ ސަރަޙައްދުގެ އޮފިޝަލުން ހާމަކޮށްފި އެވެ.

މި ހާދިސާ ހިނގާފައި މިވަނީ، އެ ޤައުމުގެ ދެކުނުގެ ސަރަޙައްދެއް ކަމަށްވާ އެންޑަލޫޝިއާ ގައި މިދިޔަ އާދީއްތަ ދުވަހު ދެ ރޭލު ޖެހި ހިނގި ނުރައްކާތެރި އެކްސިޑެންޓެއްގައި މަދުވެގެން 42 މީހުން މަރުވެފައިވާތީ، އެކަމުގެ ހިތާމައިގައި މުޅި ޤައުމު އޮއްވަ އެވެ.

ކެޓަލޯނިއާގެ ސިވިލް ޕްރޮޓެކްޝަން އެޖެންސީން ސޯޝަލް މީޑިއާގައި ހާމަކޮށްފައިވާ ގޮތުގައި، ޖެލީޑާ މުނިސިޕަލިޓީ ސަރަޙައްދުގައި ރޭލު ދަތުރުކުރާ ދަގަނޑުތަކުގެ މައްޗަށް ފާރެއް ވެއްޓުމުގެ ސަބަބުން، އެ ވަގުތު ދަތުރުކުރި ފަސިންޖަރުން އުފުލާ ރޭލެއް ވަނީ އެ ފާރުގައި ޖެހި އެކްސިޑެންޓްވެފަ އެވެ.

ކެޓަލޯނިއާގެ ކުއްލި ނުރައްކަލުގެ ޚިދުމަތްތަކުން މަޢުލޫމާތު ދިން ގޮތުގައި، ހާދިސާ ހިނގި ސަރަޙައްދުގައި 11 އެމްބިއުލާންސް ވަނީ ހަރަކާތްތެރިވެފަ އެވެ.

ފަހުން ލިބުނު މަޢުލޫމާތުތަކާ ހަވާލާދީ ބުނެފައިވަނީ، ރޭލުގައި އެއްވެސް މީހަކު ތާށިވެފައި ނެތް ކަމަށާއި، އިތުރު ބަޔަކަށް އަނިޔާވެފައިވޭތޯ ކަށަވަރު ކުރުމަށްޓަކައި އެ ސަރަޙައްދު ބަލައި ފާސްކުރުމުގެ މަސައްކަތް ކަމާބެހޭ ޓީމުތަކުން ކުރަމުންދާ ކަމަށެވެ.

ކުއްލި ހާލަތްތަކުގައި އެހީތެރިކަން ފޯރުކޮށްދޭ ފަރާތްތަކުން ހާމަކޮށްފައިވާ ގޮތުގައި، އަނިޔާވި މީހުންގެ ތެރެއިން ބައެއް މީހުން ވަނީ އެ ސަރަޙައްދާ ކައިރީގައި ހުންނަ ހޮސްޕިޓަލަކަށް ފަރުވާއަށް ގެންގޮސް ފައެވެ.

މެޑިކަލް އިމަޖެންސީ ސާވިސަސްއިން ބުނި ގޮތުގައި، ސީރިއަސް އަނިޔާ ލިބުނު ފަސް މީހުންގެ އިތުރުން، ހަ މީހަކަށް ނިސްބަތުން ކުދި އަނިޔާ ލިބިފައިވާއިރު، 26 މީހަކަށް ލިބިފައިވަނީ ވަރަށް އާދައިގެ ކުދި އަނިޔާތަކެއް ކަމަށެވެ.