އިންޑޮނޭޝިއާގައި ބޯޓެއް އަޑިއަށް ގޮސް، ސްޕެއިންގެ އާއިލާއެއް ގެއްލިއްޖެ

އިންޑޮނޭޝިއާގައި ދަތުރު ކުރަމުން ދިޔަ ފަތުރުވެރިންގެ ބޯޓެއް އަޑިއަށް ގޮސް، ސްޕެއިންގެ އާއިލާއެއް ގެއްލިފައިވާ ކަމަށް ރިޕޯޓު ކޮށްފި އެވެ.  

އިންޑޮނޭޝިއާގެ ސްޓޭޓް ނޫސް އެޖެންސީ އަންޓަރާ އިން ހޮނިހިރު ދުވަހު ރިޕޯޓު ކޮށްފައިވާ ގޮތުގައި، ގެއްލިފައި ވަނީ ސްޕެއިންގެ ހަތަރު މީހުންގެ އާއިލާ އެކެވެ. 

ފަތުރުވެރި ކަމުގެ މަޝްހޫރު މަންޒިލެއް ލަބުއާން ބާޖޯ ކައިރީގައި ޕަދަރް އައިލެންޑް ސްޓްރެއިޓްގައި ހުކުރު ދުވަހުގެ ރޭ މި ބޯޓު އަޑިއަށް ގޮސްފައިވާއިރު، އެ ބޯޓުގައި ޖުމުލަަ 11 މީހުން ތިބި ކަމަށް ވަނީ ބުނެފަ އެވެ. 

އަންތަރާ އިން ބުނެފައި ވަނީ ބޯޓުގައި ތިބި މީހުންގެ ތެރެއިން ހަތް މީހަކު ސަލާމަތް ކޮށްފައިވާ ކަމަށެވެ. އޭގެ ތެރޭގައި ސްޕެއިންގެ ދެ ފަތުރުވެރިންނާއި، ހަތަރު ފަޅުވެރިން މެމްބަރުން އަދި ޓުއަ ގައިޑެއް ވެސް ހިމެނޭ ކަމަށް ބުނެފައިވެ އެވެ. ގެއްލިފައިވާ ކަމަށް ބުނާ ސްޕެއިންގެ އެއް އާއިލާގެ ހަތަރު މީހުން ހޯދުމުގެ މަސައްކަތް ހޮނިހިރު ދުވަހުން ފެށިގެން ކުރިއަށް ގެންދަމުން އަންނަ ކަމަށް ބުނެފައިވެ އެވެ. 

ލަބުއާން ބާޖޯ ބަނދަރުގެ އޮތޯރިޓީ އިން މި ހާދިސާ ހިނގި ސަބަބެއް ކަމަށް ބުނެފައި ވަނީ، ތިން މީޓަރު (10 ފޫޓު) އަށް ވުރެ ބޮޑެތި ރާޅު ތަކެއް އުފެދިގެން ކަމަށް ވަނީ ބުނެފަ އެވެ. ބަނދަރު އޮތޯރިޓީގެ ވެރިޔާ ވިދާޅުވެފައި ވަނީ، އެކަމުގެ ސަބަބުން އިތުރަށް މީހުން ހޯދުމުގެ މަސައްކަތް ކުރުމުގައި އެތައް ދަތި ތަކެއް ދިމާވެފައިވާ ކަމަށެވެ. 

ވައިގެ ޙާލަތު ވަރަށް ބޮޑަށް ގޯސްވެފައި ވުމުގެ ސަބަބުން، ޕަދަރް އައިލެންޑް ވަނީ ހޮނިހިރު ދުވަހު ފަތުރުވެރިންނަށް ބަންދުކޮށްފައި ކަމަށް ރިޕޯޓުގައި ބުނެފައިވެ އެވެ. 

އިންޑޮނޭޝިއާގައި ކަނޑުގެ ހާދިސާތައް ގިނައިން ހިނގާއިރު، މިއީ ދެކުނު އޭޝިއާގެ ގާތް ގަނޑަކަށް 17،000 ރަށުން އެކުލެވިގެންވާ ޖަޒީރާ ޤައުމެކެވެ. ގިނަ ފަހަރު މި ފަދަ ހާދިސާތައް ހިނގާފައި ވަނީ މޫސުން ގޯސްވުމުގެ އިތުރުން، ރައްކާތެރި ކަމުގެ މިންގަނޑުން ބޭރު ވެގެންނެވެ. 

މި ހާދިސާގައި ގެއްލިފައިވާ ސްޕެއިންގެ ހަތަރު މީހުންގެ މައުލޫމާތު އަދި ތަފްސީލް މިހާތަނަށް ހާމަ ކޮށްފައި ނުވެ އެވެ. އެމީހުން ހޯދުމުގެ މަސައްކަތް ކުރިއަށް ގެންދާއިރު، ވައިގެ ޙާލަތު ގޯސްވެފައި ވުމުގެ ސަބަބުން މަސައްކަތް ކުރިއަށް ގެންދިޔުމުގައި އިދާރާ ތަކަށް ވަނީ އިތުރު ގޮން ޖެހުން ތަކެއް ކުރިމަތިވެފަ އެވެ.