ފަލަސްްޠީނަށް، އދ ގެ ފުރިހަމަ މެމްބަރުކަން ދިނުމަށް ސްޕެއިންގެ ބޮޑު ވަޒީރު ޕެޑްރޯ ސަންޗޭޒް ގޮވާލައްވައިފި އެވެ.

ސަންޗޭޒް މިފަދައިން ގޮވާލައްވާފައި ވަނީ ފްރާންސް އާއި ސައުދީ އަރަބިއްޔާގެ އިސް ނެގުމުގެ މަތިން ބޭއްވުނު ދެ ދައުލަތުގެ ޙައްލަށް މަޝްވަރާ ކުރުމުގެ ސަމިޓުގައި ވާހަކަ ދައްކަވަމުންނެވެ.

އެ ބައްދަލުވުމުގައި ވާހަކަ ދައްކަވަމުން ސަންޗޭޒް ވިދާޅުވެފައި ވަނީ، އެ ސަމިޓަކީ ވަރަށް މުހިންމު ފެށުމެއް ކަމަށާއި، ނަމަވެސް އެއީ އެ ދަތުރުގެ ނިމުމެއް ނޫން ކަމަށެވެ. އަދި ފަލަސްޠީނަށް އދ ގެ ފުރިހަމަ މެމްބަރުކަން ލިބެން ޖެހޭ ކަމަށާއި، އެހެން ޤައުމު ތަކެކޭ އެއް ފަދައިން ފަލަސްޠީނަށް ވެސް އދ އާ ގުޅުމުގެ ފުރުސަތު ވީ އެންމެ އަވަހަކަށް ލިބެން ޖެހޭ ކަމުގައި ސަންޗޭޒް ވަނީ ވިދާޅުވެފަ އެވެ.

ސަންޗޭޒް އަކީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ލާއިންސާނީ އަމަލުތަކާ ދެކޮޅަށް އެންމެ ގަދައަށް ވާހަކަ ދައްކަވާ އެއް ބޭފުޅާ އެވެ. އޭނާ އަންނަނީ އިސްރާއީލް އަށް ވަރަށް ބޮޑަަށް ފާޑު ވިދާޅުވަމުންނެވެ. މިދިޔަ މެއި މަހުގެ ތެރޭގައި ސްޕެއިން އިން ވަނީ، އަޔެލެންޑް އަދި ނޯވޭއާ އެކު ފަލަސްޠީނުގެ މިނިވަން ދައުލަތް ވެސް ބަލައިގެންފަ އެވެ.

އިސްރާއީލްއާ ދެކޮޅަށް ސަންޗޭޒް ފާޑު ވިދާޅުވަމުން ގެންދަވާތީ، އިސްރާއީލް އިން އަންނަނީ ސަންޗޭޒް އަށް ނުރުހުމުގެ ބަސްތައް އަމާޒު ކުރަމުންނެވެ. އެގޮތުން އިސްރާއީލްގެ ފޮރިން މިނިސްޓަރު ގިޑިއަން ސާރް ވަނީ، މި ފަހަކަށް އައިސް ސަންޗޭޒް އަށް "އެންޓިސެމިޓިކް" އަދި "ދޮގުވެރިއެއް"ގެ ގޮތުން މުޚާތަބު ކުރަމުންނެވެ.

އެއީ ސްޕެއިންގެ ވުލެއްޓާ ސައިކަލު ރޭހުގައި ފަލަސްޠީނަށް ތާއީދުކޮށް ކުރި މުޒާހަރާތަކާ ގުޅިގެން، ސަންޗޭޒް އެކަމަށް ތާއީދު ކުރެއްވުމުންނެވެ. އެ މައްސަލަތަކާ ގުޅިގެން ސްޕެއިންގެ ވެރި ރަށް މެޑްރިޑުގައި ހުންނަ އިސްރާއީލްގެ އެންމެ އިސް ޑިޕްލޮމެޓް ވެސް ވަނީ ޙާޟިރުކޮށް ސުވާލު ކޮށްފަ އެވެ.

އދ ގެ ފުރިހަމަ މެމްބަރުކަން ފަލަސްޠީނަށް ދިނުމަށް ސަންޗޭޒް ގޮވާލެއްވުމާ އެކު، ޣައްޒާގައި ހިންގަމުންދާ އަނިޔާވެރިކަން ހުއްޓުވައި، ސުލްޙަވެރިކަން ޤާއިމު ކުރުމަށް ފިޔަވަޅުތައް އަޅަން ވެސް އޭނާ ވަނީ ގޮވާލައްވައިފަ އެވެ.

މިފަހަކަަށް އައިސް ސަންޗޭޒް އަންނަނީ ބައިނަލްއަޤުވާމީ ކުޅިވަރު މުބާރާތްތަކުން ވެސް އިސްރާއީލް ބޮއިކޮޓް ކުރުމަށް ވަކާލާތު ކުރައްވަމުންނެވެ. އެގޮތުން، އިސްރާއީލް އިން ބައިވެރިވާ ކުޅިވަރު މުބާރާތްތަކުގައި ސްޕެއިން އިން ބައިވެރި ނުވާނެ ކަމަށް ބުނެ ސަންޗޭޒް ވަނީ ވާހަކަ ދައްކަވައިފަ އެވެ.