އޭޝިއާ ޕެސިފިކް އަށް ތެޔޮ ފޯރުކޮށްދިނުމުގެ ޤާބިލުކަން އެމެރިކާ އަށް ލިބިގެންވާ ކަމަށް އިންޓީރިއާ ސެކްރެޓަރީ ވިދާޅުވެއްޖެ

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން އޭޝިއާ ޕެސިފިކް ސަރަހައްދަށް ތެލާއި ގޭސް ފޯރުކޮށްދިނުމުގެ ހުރަސް ތަކެއް ކުރިމަތިވެފައިވާ މި ދަނޑި ވަޅުގައި، އެ ސަރަހައްދަށް ބޭނުންވާ ހަކަތަ އިތުބާރާ އެކު ފޯރުކޮށްދިނުމުގެ ޤާބިލުކަން އެމެރިކާ އަށް ލިބިގެންވާ ކަމަށް އެ ޤައުމުގެ އިންޓީރިއާ ސެކްރެޓަރީ ޑަގް ބާގަމް ވިދާޅުވެއްޖެ އެވެ. 

ޖަޕާނުގެ ވެރި ރަށް ޓޯކިޔޯގައި ކުރިއަށްދާ އިންޑޯ-ޕެސިފިކް އެނާޖީ ސެކިއުރިޓީ މިނިސްޓީރަލް އެންޑް ބިޒްނަސް ފޯރަމްގައި ވާހަކަ ދައްކަވަމުން ބާގަމް ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕްގެ "އެނާޖީ ޑޮމިނަންސް" ނުވަތަ ހަކަތައިގެ ނުފޫޒު ވަރުގަދަ ކުރުމުގެ ސިޔާސަތުގެ މައިގަނޑު މަޤުސަދަކީ އެމެރިކާގެ އެތެރޭގެ ތަނަވަސް ކަމަށް ބޭނުންވާ ހަކަތަ ކަށަވަރު ކުރުމާ އެކު، އެމެރިކާގެ އެކުވެރި ޤައުމު ތަކަށް ހަކަތަ ވިއްކުމުގެ ޤާބިލުކަން އިތުރު ކުރުން ކަމަށެވެ. 

މި ފޯރަމް އަކީ ސަރަހައްދުގެ 17 ޤައުމަކުން ބައިވެރިވާ މުހިންމު ބައްދަލުވުމެކެވެ. ބާގަމް އިތުރަށް ވިދާޅުވި ގޮތުގައި، އެމެރިކާގެ މި ސިޔާސަތުގެ ސަބަބުން އޭޝިއާ ޕެސިފިކް ސަރަހައްދަށް ބޭނުންވާ ހަކަތަ، އިތުބާރު ހުރި، އަގު ހެޔޮ އަދި ރައްކާތެރި ގޮތެއްގައި ލިބޭނެކަން ކަށަވަރު ވާނެ އެވެ. މިއީ ޓެރަރިސްޓު ދައުލަތް ތަކުން ހިންގާ އަމަލު ތަކުގެ ސަބަބުން މެދު ކަނޑާލެވޭނެ ސަޕްލައިއެއް ނޫން ކަމަށް ވެސް ބާގަމް ވަނީ ފާހަގަ ކުރައްވައިފަ އެވެ. 

މީގެ އިތުރުން، ދުނިޔޭގެ ޤައުމު ތަކުން ޗައިނާ އަށް ބަރޯސާވާ މިންވަރު ކުޑަ ކުރުމަށް މަސައްކަތް ކުރަމުންދާ މި ދަނޑި ވަޅުގައި، އުފެއްދުންތެރި ކަމަށް ބޭނުންވާ މުހިންމު މިނަރަލްސް ނުވަތަ މައުދަންތައް ރައްކާތެރިކަމާ އެކު ފޯރުކޮށްދިނުގެ މުހިންމުކަމާ ގުޅޭ ގޮތުން ވެސް ބާގަމް ވަނީ ވާހަކަ ދައްކަވައިފަ އެވެ. ޗައިނާ އަކީ މިހާރު މިފަދަ މައުދަންތައް އެންމެ ގިނައިން އެކްސްޕޯޓު ކުރާ ޤައުމެވެ. 

މި ފޯރަމް އަކީ މާ ކުރިން ވެސް ބޭއްވުމަށް ތާވަލު ކޮށްފައި އޮތް ފޯރަމެކެވެ. އެގޮތުން މި ފޯރަމްގައި ސިޔާސީ ލީޑަރުންގެ އިތުރުން، އެމެރިކާގެ ހަކަތައާ ބެހޭ ކުންފުނި ތަކުން ވެސް ދަނީ ބައިވެރި ވަމުންނެވެ.