ހޯރްމޫޒް ކަނޑުއޮޅި ބަންދުކޮށްފައި އޮތް އޮތުން ދަމަހައްޓާނަން: އީރާން

ހޯރްމޫޒް ކަނޑުއޮޅި ބަންދުކޮށްފައި އޮތް އޮތުން ދަމަހައްޓާނެ ކަމަށާއި، ހުޅަނގު އޭޝިއާ ސަރަހައްދުގެ ސަލާމަތީ މަސްރަހު ގޯސްވަމުންދަނީ އެމެރިކާގެ ސަބަބުން ކަމަށް އީރާނުގެ އެކްސްޕީޑިއެންސީ ކައުންސިލްގެ އިސް މެންބަރަކު ވިދާޅުވެއްޖެއެވެ.

އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކުރީގެ ކޮމާންޑަރު މުހްސިން ރެޒާއީ މިހެން ވިދާޅުވީ، ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން ދިން ހަމަލާއެއްގައި އަވަހާރަކޮށްލި ސުޕްރީމް ނޭޝަނަލް ޑިފެންސް ކައުންސިލްގެ ސެކްރެޓަރީ އެޑްމިރަލް އަލީ ޝަމްޚާނީގެ ޖަނާޒާގައި ބައިވެރިވުމަށް އީރާނުގެ ވެރިރަށް ތެހެރާނަށް އެއްވި އާންމުންނާ މުޚާތަބު ކުރައްވައި ހޮނިހިރު ދުވަހު ދެއްކެވި ވާހަކަފުޅުގައެވެ.

ސްޓްރެޓެޖިކް ގޮތުން މުހިންމު އެ ކަނޑުއޮޅި ބަންދުކޮށްފައި އޮތް އޮތުން ދަމަހައްޓާނެ ކަމަށާއި، އެމެރިކާގެ އެއްވެސް ހަނގުރާމަމަތީ މަނަވަރަކަށް ޕާޝިއަން ގަލްފްގެ ސަރަހައްދަށް ވަނުމުގެ ހުއްދަ ނުދޭނެ ކަމަށް އޭނާ ވަނީ ވިދާޅުވެފައެވެ.

މިދިޔަ 50 އަހަރު ދުވަހުގެ ތެރޭގައި ޕާޝިއަން ގަލްފް ސަރަހައްދުގެ ސަލާމަތާއި ރައްކާތެރިކަން ގެއްލެން މެދުވެރިވި މައިގަނޑު ސަބަބަކީ އެމެރިކާގެ ސިފައިން އެ ސަރަހައްދުގައި ތިބުން ކަމަށް ރެޒާއީ ފާހަގަކުރެއްވިއެވެ. އަދި އެމެރިކާ އެ ސަރަހައްދުން ފޭބުމަށްފަހު، ހޯރްމޫޒް ކަނޑުއޮޅީގެ ފުރިހަމަ ކޮންޓްރޯލް އެ ސަރަހައްދުގެ ގައުމުތަކުން، ހާއްސަކޮށް އީރާނާއި އޮމާނުން ނަގައިގެން މެނުވީ ސަލާމަތީ ކަންކަން ކަށަވަރު ނުކުރެވޭނެ ކަމަށް އޭނާ ވިދާޅުވިއެވެ.

އެމެރިކާ އާއި އިޒްރޭލުން ދިން ޓެރަރިސްޓް ހަމަލާތަކުގައި ލިބުނު ގެއްލުންތަކުގެ ބަދަލު ފުރިހަމައަށް ލިބި، ކުރިމަގުގައި ސަލާމަތީ ކަންކަން ކަށަވަރުވާނެ ކަމުގެ ޔަގީންކަން ލިބުމުން ނޫނީ ބަދަލުހިފުމުގެ ގޮތުން ހިންގާ އޮޕަރޭޝަންތައް ހުއްޓާނުލާނެ ކަމަށް އެ އިސް އޮފިޝަލް ވިދާޅުވިއެވެ. މީގެ ތެރޭގައި ޕާޝިއަން ގަލްފުން އެމެރިކާ ސިފައިން މުޅިން ފޭބުން ހިމެނޭ ކަމަށް އޭނާ ވިދާޅުވިއެވެ.

ސިޔާސީ، ދިފާއީ އަދި އިގްތިސާދީ ދާއިރާތަކުން އީރާނުން ކާމިޔާބީ ހޯދާފައިވާކަން ފާހަގަކުރައްވަމުން ރެޒާއީ ވިދާޅުވީ، އެމެރިކާއަކީ ބަލި ނުކުރެވޭނެ ބާރެއް ކަމަށް ދެކެވޭ ވާހަކަތައް އީރާނުން ދޮގުކޮށްފައިވާ ކަމަށެވެ. އިގްތިސާދީ ގޮތުން ބަލާއިރު، ތެލުގެ އަގު ދަށްކުރުމަށްޓަކައި އެމެރިކާގެ ސްޓްރެޓީޖިކް ރިޒާވުން 170 މިލިއަން ފީފާގެ ސާފުނުކުރާ ތެޔޮ ބޭރުކުރުމަށް އެމެރިކާއިން ނިންމި ނިންމުމަކީ ފާއިތުވި 44 އަހަރު ތެރޭގައި ވެސް ނިންމާފައިނުވާ ފަދަ ނިންމުމެއް ކަމަށް އޭނާ ވިދާޅުވިއެވެ.

ނަމަވެސް، މި ފިޔަވަޅުގެ ސަބަބުން އަގުތަކަށް އަންނަ ބަދަލު އެއް ހަފުތާ ނުވަތަ ދެ ހަފުތާއަށް ވުރެ ގިނަ ދުވަހަށް ދެމިނޯންނާނެ ކަމަށާއި، އަނެއްކާވެސް ތެލުގެ އަގުތައް އިންތިހާއަށް އުފުލިގެންދާނެ ކަމަށް އޭނާ ވިދާޅުވިއެވެ.

ދިފާއީ ގޮތުން އީރާނަށް ކާމިޔާބު ލިބޭނެކަން ކަށަވަރު ކަމަށް އެކްސްޕީޑިއެންސީ ކައުންސިލްގެ މެންބަރު ރެޒާއީ ވިދާޅުވިއެވެ.

އެންމެ ޒަމާނީ ޓެކްނޮލޮޖީ އާއި، މަތިންދާބޯޓާއި، މިސައިލް އަދި ވައިގެ ދިފާއީ ނިޒާމުތައް ހުރި އެމެރިކާއަށް އީރާނު ފަދަ ގައުމަކުން މިފަދަ ވަރުގަދަ ހަމަލާތަކެއް ދީފާނެ ކަމަށް އެއްވެސް ބަޔަކު އުންމީދު ނުކުރާ ކަމަށް ރެޒާއީ ވިދާޅުވިއެވެ. އަދި ކުރިމަގު އޮތީ އީރާނަށް ކަމަށާއި، އީރާނުގެ ދިދަ އަބަދުވެސް ހުންނާނީ އުހުގައި އުފުލިފައި ކަމަށް އޭނާ ވިދާޅުވިއެވެ.