މުޖުތަބާ ޚާމަނާއީ ދިރިހުރިކަން ޔަޤީނެއް ނޫން: ޓްރަމްޕް
އެންބީސީ ނިއުސް އަށް ދެއްވި އިންޓަވިޔުއެއްގައި އެމެރިކާގެ ރައީސް ޓްރަމްޕް ވަނީ، އީރާންގެ ރޫހީ ލީޑަރު މުޖުތަބާ ޚާމަނާއީގެ ޞިއްޙީ ޙާލު ކޮޅާ މެދު ސުވާލު އުފައްދަވާފައި. އެގޮތުން ޓްރަމްޕް ވިދާޅުވެފައި ވަނީ، މުޖުތަބާ ޚާމަނާއީ ދުނިޔޭގައި ހުރިކަން ޔަޤީން ނުވާ ކަމަށެވެ. އަދި ދުނިޔޭގައި ހުންނެވި ނަމަ، އެންމެ ބުއްދިވެރި ގޮތަކީ ޤައުމަށްޓަކައި އަމާން ދެއްވުން ކަމަށް ވެސް ޓްރަމްޕް ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް އަދި އީރާންގެ ރޫހީ ލީޑަރު މުޖުތަބާ ޚާމަނާއީ | ރޮއިޓާސް
އީރާންގެ އައު ރޫހީ ލީޑަރު މުޖުތަބާ ޚާމަނާއީ ދުނިޔޭގައި ދިރިހުރިކަން ޔަޤީން ނުވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އީރާންގެ އައު ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކުރައްވާފައި ވަނީ މިދިޔަ ހަފުތާގެ އާދީއްތަ ދުވަހު އެވެ. އޭގެ ފަހުން މިހާތަނަށް ހަފުތާއެއް ވެފައިވާއިރު ވެސް، އާންމުންގެ ތެރެއިން މުޖުތަބާ ޚާމަނާއީ ފެނިވަޑައިގެންފައި ނުވެ އެވެ. އާންމު ގޮތެއްގައި ވެސް މުޖުތަބާ ޚާމަނާއީ އަކީ އާންމުންގެ ތެރެއަށް އެހާ ގިނައިން ނިކުމެ އުޅުއްވާ ބޭފުޅެއް ނޫނެވެ.
ނަމަވެސް، މިދިޔަ ބުރާސްފަތި ދުވަހު އައު ރޫހީ ލީޑަރު މުޖުތަބާ ޚާމަނާއީ ވަނީ ފުރަތަމަ ފަހަރަށް ބަޔާނެއް ނެރުއްވައިފަ އެވެ. އީރާންގެ ދައުލަތުގެ މީޑިއާ އިން ދައްކާފައިވާ އެ ބަޔާނުގައި މުޖުތަބާ ޚާމަނާއީ ފެނިވަޑައިގެންފައި ނުވާއިރު، ބަޔާން ކިޔާފައި ވަނީ ޓީވީ ޕްރެޒެންޓަރެކެވެ. އެ ބަޔާނުގައި އައު ރޫހީ ލީޑަރު ވަނީ އީރާންގެ ސާބިތުކަން ދައްކުވައިދީ، އެމެރިކާ އަށް އިންޒާރު ދެއްވައިފަ އެވެ.
އެންބީސީ ނިއުސް އަށް ދެއްވި އިންޓަވިޔުއެއްގައި އެމެރިކާގެ ރައީސް ޓްރަމްޕް ވަނީ، އީރާންގެ ރޫހީ ލީޑަރު މުޖުތަބާ ޚާމަނާއީގެ ޞިއްޙީ ޙާލު ކޮޅާ މެދު ސުވާލު އުފައްދަވައިފަ އެވެ. އެގޮތުން ޓްރަމްޕް ވިދާޅުވެފައި ވަނީ، މުޖުތަބާ ޚާމަނާއީ ދުނިޔޭގައި ހުރިކަން ޔަޤީން ނުވާ ކަމަށެވެ. އަދި ދުނިޔޭގައި ހުންނެވި ނަމަ، އެންމެ ބުއްދިވެރި ގޮތަކީ ޤައުމަށްޓަކައި އަމާން ދިނުން ކަމަށް ވެސް ޓްރަމްޕް ވިދާޅުވި އެވެ. ޓްރަމްޕްގެ އިތުރުން، އެމެރިކާގެ ދިފާއީ ވަޒީރު ޕީޓް ހެގްސެތު ވެސް ވަނީ މުޖުތަބާ ޚާމަނާއީ ވަރަށް ބޮޑަށް ޒަޚަމުވެފައިވާ ކަމަށް ވިދާޅުވެފަ އެވެ.
ނަމަވެސް، އީރާން އިން ވަނީ މި ވާހަކަތައް ދޮގު ކޮށްފަ އެވެ. އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެފައި ވަނީ، ރޫހީ ލީޑަރު މުޖުތަބާ ޚާމަނާއި އަށް އަނިޔާވެފައިވާ ކަމަށް ދެކެވޭ ވާހަކަ އަކީ ކަނޑަ އެޅިގެން ދޮގެއް ކަމަށެވެ. އަދި ރޫހީ ލީޑަރު ގެންދަވަނީ ބަރާ ބަރަށް މަޤާމުގެ މަސްއޫލިއްޔަތު އަދާ ކުރައްވަމުން ކަމަށް ވެސް އަރާގްޗީ ވިދާޅުވެފައިވެ އެވެ. ބައެއް މަސްދަރު ތަކުން ބުނެފައިވާ ގޮތުގައި، މުޖުތަބާ ޚާމަނާއީ އާންމުންގެ ތެރެއަށް ނުނިކުންނަވަނީ ސަލާމަތީ ސަބަބު ތަކަށްޓަކަ އެވެ.
އީރާނުގެ އައު ލީޑަރު މުޖުތަބާ ޚާމަނާއީއަށް އަނިޔާވެފައިވާ ކަމަށް އެމެރިކާ އިން ބުނެފައި ވަނިކޮށް އެމަނިކުފާނުގެ ހާލުކޮޅާ މެދު "އެއްވެސް މައްސަލައެއް ނެތް" ކަމަށް ޚާރިޖީ ވަޒީރު ވިދާޅުވެއްޖެ
އީރާންގެ ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކުރައްވާފައި ވަނީ، އެމެރިކާގެ ހަމަލާ ތަކުގައި އެ ޤައުމުގެ ކުރީގެ ރޫހީ ލީޑަރު އަދި މުޖުތަބާ ޚާމަނާއީގެ ބައްޕާފުޅު އާޔަތުﷲ އަލީ ޚާމަނާއީ އަވަހާރަވުމާ ގުޅިގެންނެވެ. މުޖުތަބާ ޚާމަނާއީ އަކީ، އިސްލާމީ އިންޤިލާބަށް ފަހު އީރާންގައި އައްޔަން ކުރެއްވި ތިން ވަނަ ރޫހީ ލީޑަރެވެ.
މަސްދަރު: އަލް އަރަބިއްޔާ
