އިޒްރޭލުގެ ޖާސޫސީ އިދާރާގެ މައި ޔުނިޓެއް ކަމަށްވާ "ޔުނިޓް 8200" އަށް ހަމަލާ ދީފައިވާ ކަމަށް އީރާނުން ބުނެފި
14 މާރިޗު 2026 | ހޮނިހިރު 18:17އީރާނުގެ އިސްވެރިންނާއި އާންމުންނަށް އަމާޒުކޮށް އިޒްްރޭލާއި އެމެރިކާއިން ދެމުންދާ ހަމަލާތަކުގެ ބަދަލުހިފުމުގެ ގޮތުން، އިޒްރޭލުގެ އަސްކަރީ އިންޓެލިޖެންސް ޔުނިޓްތަކަށާއި ވައިގެ ސިފައިންގެ މަރުކަޒުތަކަށް އީރާނުން ވަރުގަދަ ޑްރޯން ހަމަލާތަކެއް ދީފި. މި އޮޕަރޭޝަނުގައި އިޒްރޭލުގެ ސައިބަރ ޔުނިޓް 8200 އާއި ޑޭޓާ ސެންޓަރުތަކަށް އަމާޒުކޮށްފައިވާއިރު، މިފަދަ ހަމަލާތައް ކުރިއަށް އޮތް ތަނުގައިވެސް ދޭނެ ކަމުގެ އިންޒާރު އެ ގައުމުގެ އަސްކަރިއްޔާއިން ވަނީ ދީފަ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ރިޔާސަތު ބަލަހައްޓަވާ އެ ގައުމުގެ ހަނގުރާމަޔާ ބެހޭ ކެބިނެޓުގެ ބައްދަލުވުމެއް އިޒްރޭލުގެ ތަލް އަވީވްގައި ކުރިއަށް ދަނީ. | ގެޓީ އިމޭޖަސް
އިޒްރޭލުގެ ޒަޔަނިސްޓް ސިފައިންގެ އިންޓެލިޖެންސް ކޯ ޔުނިޓެއް ކަމަށްވާ "ޔުނިޓް 8200" އަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށް އީރާނުގެ އަސްކަރިއްޔާއިން ބުނެފިއެވެ.
އީރާނުގެ އަސްކަރިއްޔާއިން މާރިޗު މަހުގެ 14 ވަނަ ދުވަހު އިއުލާންކުރި ގޮތުގައި، މި ޑްރޯން އޮޕަރޭޝަން ކުރިއަށް ގެންގޮސްފައިވަނީ އިޒްރޭލުގެ ޓެރަރިސްޓް ސިފައިންގެ އިންޓެލިޖެންސް އިދާރާއާއި ޔުނިޓް 8200 އަށް އަމާޒުކޮށްގެންނެވެ.
އީރާނުގެ އަސްކަރިއްޔާއިން ނެރުނު ބަޔާނުގައިވާ ގޮތުން، ހޮނިހިރު ދުވަހުގެ ފަތިހުގެ ވަގުތެއްގައި ފެށި މި ޑްރޯން އޮޕަރޭޝަންތަކުގައި އިޒްރޭލުގެ މިލިޓަރީ އިންޓެލިޖެންސް ޑައިރެކްޓްރޭޓް "އަމާން" އާއި، ސައިބަރ އޮޕަރޭޝަންތަކާ ބެހޭ ޔުނިޓް 8200 އާއި، ޑޭޓާ ޕްރޮސެސިންގ ސެންޓަރުތަކުގެ އިތުރުން، އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި އެ ގައުމުގެ ފައިޓަރ ޖެޓްތައް ބަހައްޓާފައިވާ ސަރަހައްދުތަކަށް އިސްލާމީ ޖުމްހޫރިއްޔާގެ އަސްކަރިއްޔާއިން ވަނީ ހަމަލާދީފައެވެ.
އިޒްރޭލުން ހިފާފައިވާ ބިންތަކަށް ދެމުންދާ ޑްރޯން ހަމަލާތައް ކުރިއަށް އޮތް ތަނުގައިވެސް ކުރިއަށްދާނެ ކަމަށް އީރާނުގެ އަސްކަރިއްޔާއިން ބުނެފައިވެއެވެ. އަދި އީރާނުގެ ސިފައިންގެ ހުރިހާ ގާބިލުކަމެއް ބޭނުންކޮށްގެން، އެ ގައުމުގެ މައުސޫމް ރައްޔިތުންނާއި، ލީޑަރާއި، ހިތްވަރުގަދަ ކޮމާންޑަރުންގެ ލޭގެ ބަދަލުހިފާނެ ކަމަށްވެސް އެ ގައުމުން ވަނީ ބުނެފައެވެ.
އެމެރިކާއާއި ޒަޔަނިސްޓް އިޒްރޭލުން އީރާނާ ދެކޮޅަށް ފުޅާދާއިރާއެއްގައި އަސްކަރީ ހަމަލާތަކެއް ދޭން ފަށާފައިވަނީ، ފެބްރުއަރީ މަހުގެ 28 ވަނަ ދުވަހު އީރާނުގެ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އިތުރުން، އަސްކަރިއްޔާގެ އިސް ކޮމާންޑަރުންތަކަކާއި އާންމު ރައްޔިތުންތަކެއް އަވަހާރަކޮށްލުމާ ގުޅިގެންނެވެ.
އިޒްރޭލާއި އެމެރިކާއިން އީރާނުގެ އަސްކަރީ މަރުކަޒުތަކަށާއި އާންމުން ދިރިއުޅޭ ސަރަހައްދުތަކަށް ދެމުންދާ ވައިގެ ހަމަލާތަކުގެ ސަބަބުން ގިނަ އަދަދެއްގެ ބަޔަކު މަރުވެ، އެ ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.
މި ހަމަލާތަކުގެ ރައްދުގައި އީރާނުގެ ހަތިޔާރު އެޅި ސިފައިން ދަނީ، އިސްރާއީލުން ހިފާފައިވާ ބިންތަކުގައި ހުރި އެމެރިކާއާއި އިސްރާއީލުގެ މަރުކަޒުތަކަށާއި، ސަރަހައްދީ ބޭސްތަކަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ބޭނުންކޮށްގެން ބަދަލުހިފުމުގެ އޮޕަރޭޝަންތައް ހިންގަމުންނެވެ.
