އިރާނުން ތުހުމަތު ކުރަނީ އެ ގައުމަށް ހަމަލާ ދިނުމަށް ޔޫއޭއީގެ ބިން ބޭނުން ކުރާ ކަމަށް، އެތަނުގައި ހުރި އެމެރިކާ މަރުކަޒުތަކަށް ހަމަލާދޭނެ ކަމަށް ބުނެ އިންޒާރު ދީފި

އިރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާޒްގެ ތަރުޖަމާނު، ޔުނައިޓެޑް އެރަބް އެމިރޭޓްސް (ޔޫއޭއީ) ގެ ބައެއް ސިޓީތަކުގައި ހުރި ދުޝްމަނުންގެ މިސައިލް ފޮނުވާ މަރުކަޒުތަކަށް ހަމަލާދިނުމަށް ރާވާފައިވާ ރޭވުންތައް ހާމަކޮށްފިއެވެ.

ހޮނިހިރު ދުވަހު އަސްކަރީ ތަރުޖަމާނު ނެރުއްވި ބަޔާނެއްގައި ވިދާޅުވީ، ސަރަހައްދުގައި ހުރި އެމެރިކާގެ އަސްކަރީ މަރުކަޒުތައް ސުންނާފަތިވުމާ ގުޅިގެން، އެމެރިކާގެ އިސްތިއުމާރީ ބާރުތަކުން ޔޫއޭއީގެ ބަނދަރުތަކާއި ސިޓީތަކުގެ ތެރޭގައި ފިލައި ތިބެ، އިރާނުގެ އަބޫ މޫސާ ރަށަށާއި ޚާރްކް ރަށުގެ ބައެއް ސަރަހައްދުތަކަށް މިސައިލް ހަމަލާތަކެއް ދީފައިވާ ކަމަށެވެ.

ޔޫއޭއީގެ ވެރިންނަށް ފޮނުއްވި މެސެޖެއްގައި ތަރުޖަމާނު ވިދާޅުވީ، ޔޫއޭއީގެ ބަނދަރުތަކާއި ސިޓީތަކުގައި ފިލައިގެން ތިބި އެމެރިކާ ސިފައިންނާއި، އެ ގައުމުގެ މިސައިލް ފޮނުވާ މަރުކަޒުތަކަށް ހަމަލާދީ، އިރާނުގެ އިސްތިގުލާލާއި ސަރަހައްދީ ރައްކާތެރިކަން ދިފާއުކުރުމަކީ އިސްލާމީ ޖުމްހޫރިއްޔާ އަށް ލިބިގެންވާ "ޝަރުއީ ހައްގެއް" ކަމަށް ގަބޫލުކުރާ ކަމަށެވެ.

މީގެ އިތުރުން، ދެވިދާނެ ހަމަލާއެއްގައި އާންމުންނަށް ލިބިދާނެ ގެއްލުމަކުން ސަލާމަތްވުމަށްޓަކައި، ޔޫއޭއީގެ ބަނދަރުތަކާއި އެމެރިކާ ސިފައިން ފިލައި ތިބި ތަންތަނާ ދުރަށް ދިއުމަށް އެ ގައުމުގެ މުސްލިމް ރައްޔިތުންނަށް ތަރުޖަމާނު ވަނީ އިލްތިމާސް ކުރައްވާފައެވެ.

ފެބްރުއަރީ މަހުގެ 28 ވަނަ ދުވަހު އިރާނުގެ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި، އަސްކަރީ އިސް ކޮމާންޑަރުންނާއި އާންމުންގެ ބަޔަކު އަވަހާރަކޮށްލުމާ ގުޅިގެން، އެމެރިކާ އާއި ޒަޔަނިސްޓް އިޒްރޭލުން ވަނީ އެއްވެސް އުދުވާނަކާ ނުލައި އިރާނާ ދެކޮޅަށް ފުޅާ ދާއިރާއެއްގައި އަސްކަރީ ކެމްޕޭނެއް ފަށާފައެވެ.

މި ހަމަލާތަކުގައި އިރާނުގެ އެކި ސަރަހައްދުތަކުގައި ހުރި އަސްކަރީ އަދި އާންމުން ދިރިއުޅޭ ތަންތަނަށް ވައިގެ މަގުން ވަރުގަދަ ހަމަލާތަކެއް ދީފައިވާއިރު، މީގެ ސަބަބުން ގިނަ އަދަދެއްގެ ބަޔަކު މަރުވެ، ގައުމުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.

މި ހަމަލާތަކުގެ ރައްދުގައި އިރާނުގެ ހަތިޔާރު އެޅި ބާރުތަކުން ދަނީ، އިޒްރޭލުން ހިފާފައިވާ ފަލަސްތީނުގެ ބިންތަކާއި ސަރަހައްދީ މަރުކަޒުތަކުގައި ހުރި އެމެރިކާ އާއި އިޒްރޭލުގެ އަމާޒުތަކަށް ގިނަ އަދަދެއްގެ މިސައިލާއި ޑްރޯން ބޭނުންކޮށްގެން ރައްދު ހަމަލާ ދެމުންނެވެ.