ޚަރްޖް އައިލެންޑަށް އިތުރު ހަމަލާ ތަކެއް ދޭނެ ކަމުގެ އިންޒާރު ޓްރަމްޕް ދެއްވައިފި

އީރާންގެ ތެޔޮ އެކްސްޕޯޓު ކުރާ މައި މަރުކަޒު ކަމަށްވާ، ޚަރްޖް އައިލެންޑަށް އިތުރު ހަމަލާ ތަކެއް ދޭނެ ކަމުގެ އިންޒާރު އެެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.

އެންބީސީ ނިއުސް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އެމެރިކާގެ ހަމަލާ ތަކުގައި ޚަރްޖް އައިލެންޑްގެ ބޮޑު ބައެއް މިހާރު ވެސް މުޅިން ސުންނާފަތި ވެފައިވާ ކަމަށެވެ. އަދި އިތުރު ހަމަލާ ތަކެއް ދޭނެ ކަމުގެ އިންޒާރު ދެއްވަމުން ޓްރަމްޕް ވިދާޅުވީ، ހަމައެކަނި މަޖަލަކަށް ވެސް އަދި މަދު ފަހަރެއްގެ މަތިން ވިޔަސް އެ ތަނަށް ހަމަލާ ދީފާނެ ކަމަށެވެ. 

މީގެ އިތުރުން ޓްރަމްޕް ވިދާޅުވެފައި ވަނީ، އީރާން އިން ހަނގުރާމަ ހުއްޓާލުމުގެ އެއްބަސްވުމަކަށް އަންނަން ތައްޔާރަށް އޮތް ކަމަށް ފެނުނު ނަމަވެސް، އެ ޤައުމުން ހުށަހަޅާ ޝަރުތުތަކަކީ އެކަށީގެންވާ ޝަރުތު ތަކެއް ނޫން ކަަމަށެވެ. ޓްރަމްޕް މިހެން ވިދާޅުވެފައި ވީ ނަމަވެސް، އީރާން އިން ބުނެފައި ވަނީ އެމެރިކާ އާއެކު މަޝްވަރާ ކުރުމަކީ މިހާރު އެ ޤައުމުން ބޭނުންވާ ކަމެއް ނޫން ކަމަށެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން ދުނިޔޭގެ ތެލުގެ ބާޒާރަށް ވެސް ވަނީ ބޮޑެތި ލޮޅުން ތަކެއް އަރަން ފަށައިފަ އެވެ. އެގޮތުން ތެލުގެ އަގު އިންތިހާ އަށް މައްޗަށް އުފުލިފައިވާއިރު، ޓްރަމްޕް ވަނީ ހޮރުމޯޒް ކަނޑު އޮޅި މެދުވެރިކޮށް ތެޔޮ ލިބޭ ޤައުމު ތަކުން އެ ސަރަހައްދުގެ ރައްކާތެރިކަން ބެލެހެއްޓުމަށް ގޮވާލައްވައިފަ އެވެ. އެގޮތުން ޓްރަމްޕް ވަނީ ޗައިނާ، ފްރާންސް، ޖަޕާން، ދެކުނު ކޮރެއާ އަދި އިނގިރޭސިވިލާތުން ވެސް އެ ސަރަހައްދަށް މަނަވަރުތައް ފޮނުވުމަށް އެދިވަޑައިގެންފަ އެވެ. ނަމަވެސް ފްރާންސް އިން ވަނީ އެ ޤައުމުން މަނަވަރެއް ނުފޮނުވާނެ ކަމަށް ބުނެފަ އެވެ. 

މި ހަނގުރާމަ މިހާރު ތިން ވަނަ ހަފުތާ އަކަށް ގޮސްފައިވާއިރު، އީރާން އިން ބުނަމުން އަންނަނީ އެމެރިކާ އާއި އިޒްރޭލް އިން ވައިގެ ހަމަލާތައް ހުއްޓައި ނުލަނީސް. ހަނގުރާމަ ހުއްޓާލުމުގެ އެއްވެސް ވާހަކައެއް ނުދައްކާނެ ކަމަށެވެ. މީޑިއާ ތަކުގައި ބުނެފައިވާ ގޮތުން މިދިޔަ ފެބްރުވަރީ މަހުގެ 28 ވަނަ ދުވަހު ފެށި ހަނގުރާމައިގައި މިހާތަނަށް ވަނީ 2000 އަށް ވުރެ ގިނަ މީހުން މަރުވެފަ އެވެ.