އެފްއޭއެމް ވެޓަރަންސް ކަޕް: ސިފައިންގެ ކުލަބުން ދަ ގްރާންޑޭ ބަލިކޮށްފި
މެޗުގެ ފުރަތަމަ ހާފުގައި ސިފައިންގެ ކުލަބުން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި.
މެޗުގައި ލަނޑު ޖެހުމަށް ފަހު ސިފައިންގެ ކުލަބުގެ ކުޅުންތެރިން އުފާ ފާޅު ކުރަނީ | ސޯޝަލް މީޑިއާ
މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް އޭގައި ދަ ގްރާންޑޭއާ ދެކޮޅަށް ކުޅުނު މެޗުން މޮޅުވެ، ދިވެހި ސިފައިންގެ ކުލަބުން ފެށުން ރަނގަޅު ކޮށްފި އެވެ.
މާފަންނު ޓާފް ދަނޑުގައި އަންގާރަ ދުވަހުގެ ހަވީރު ކުޅުނު މެޗު ސިފައިންގެ ކުލަބުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ސިފައިންގެ ކުލަބުން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.
މެޗުގެ ފުރަތަމަ ހާފުގެ 30 ވަނަ މިނެޓުގައި ސިފައިންގެ ކުލަބަށް ލީޑު ނަގައިދިނީ އިބްރާހީމް މުޙައްމަދު އެވެ. އޭގެ ފަހުން ވެސް ސިފައިންގެ ކުލަބުން ވަނީ އިތުރު ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގެ ދެ ވަނަ ހާފުގެ 40 ވަނަ މިނެޓުގައި ސިފައިންގެ ކުލަބުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އަޙުމަދު ރަޝީދު އެވެ.
ސިފައިންގެ ކުލަބުގެ އަތުން ދަ ގްރާންޑޭ ބަލިވެފައިވާއިރު، މިއީ ގުރޫޕް ސްޓޭޖުގައި އެ ޓީމުގެ ދެ ވަނަ މެޗެވެ. ފުރަތަމަ މެޗުގައި ދަ ގްރާންޑޭ ވަނީ ނިއު ރޭޑިއަންޓް ސްޕޯޓްސް ކުލަބު އަތުން ވެސް ބަލިވެފަ އެވެ. މި ގުރޫޕްގައި ދެން އޮތީ މުއިވެޔޮ ފްރެންޑްސް ކުލަބު އަދި ވިލިމާލެ ޔުނައިޓެޑެވެ.
