އައިއާރުޖީސީގެ އިންޒާރު ޒަޔަނިސްޓުންނަށް: ކަލޭމެންނަށް އަނދިރި ދުވަސްތަކެއް ދައްކާލާނަން

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ކުރިއަށްގެންދާ "އޮޕަރޭޝަން ޓްރޫ ޕްރޮމިސް 4" ގެ ދަށުން، ޒަޔަނިސްޓުންނާއި އެމެރިކާގެ އަމާޒުތަކަށް ދެމުންދާ ބަދަލުހިފުމުގެ ހަމަލާތަކުގެ 47 ވަނަ ބުރު ކާމިޔާބުކަމާއެކު ފުރިހަމަކޮށްފިކަން އިއުލާންކޮށްފިއެވެ.

އައިއާރުޖީސީގެ ޕަބްލިކް ރިލޭޝަންސް އޮފީހުން މައުލޫމާތު ދީފައިވާ ގޮތުގައި، މި އޮޕަރޭޝަނުގެ އެންމެ ފަހުގެ މަރުހަލާ ކުރިއަށް ގެންގޮސްފައިވަނީ ހުކުރު ދުވަހުއެވެ. އިޒްރޭލުން ހިފާފައިވާ ފަލަސްތީނުގެ ބިންތަކުގެ ތެރެއިން، އިޒްރޭލުގެ އެންމެ ބޮޑު އެއް އެއަރބޭސް ހުންނަ ނެގެވް ސަހަރާގެ ނެވަޓިމް ސަރަހައްދަށާއި، އިޒްރޭލުގެ ޓެކްނޮލޮޖީގެ މައި މަރުކަޒު ކަމަށްވާ ބީރުޝީބާގެ އިތުރުން ލޮޑް ސިޓީއަށް އައިއާރުޖީސީން ވަނީ ހަމަލާދީފައެވެ.

މީގެ އިތުރުން، ހުޅަނގު އޭޝިއާ ސަރަހައްދުގައި އޮންނަ އެމެރިކާގެ އެންމެ މުހިންމު އެއަރބޭސް ކަމަށްވާ ގަތަރުގައި ހުންނަ އަލް-އުދައިދު ބޭހަށްވެސް އައިއާރުޖީސީން ވަނީ ހަމަލާދީފައެވެ.

ހަމައެއާއެކު، އީރާނާ ދެކޮޅަށް މަސައްކަތްކުރާ ކޯމަލާ ނަމަކަށް ކިޔާ ޓެރަރިސްޓް ގްރޫޕްގެ މަރުކަޒުތަކަށްވެސް އައިއާރުޖީސީން ވަނީ އަމާޒުކޮށްފައެވެ.

އައިއާރުޖީސީން ރިޕޯޓްކޮށްފައިވާ ގޮތުގައި، ބަދަލުހިފުމުގެ މި 47 ވަނަ ބުރުގައި ބޭނުންކޮށްފައިވަނީ ސޮލިޑް ފިއުލް ބޭނުންކުރާ "ޚައިބަރު ޝަކަން" މިސައިލާއި ލިކުއިޑް ފިއުލް ބޭނުންކުރާ "ގަދަރު" މިސައިލްތަކެވެ.

މީގެ ކުރިން އައިއާރުޖީސީން ވަނީ މި އޮޕަރޭޝަނުގެ 46 ވަނަ ބުރު ކުރިއަށް ގެންގޮސް، "ޚުއްރަމްޝަހަރު"، "ޚައިބަރު ޝަކަން"، "އިމާދު" އަދި "ގަދަރު" މިސައިލްތައް ބޭނުންކޮށްގެން އިޒްރޭލުން ހިފާފައިވާ ބިންތަކުގެ އެކި ސަރަހައްދުތަކަށް ހަމަލާދީފައެވެ.

އެންމެ ފަހުން ނެރުނު ބަޔާނުގައި، މި ހަމަލާތަކުގެ ސަބަބުން ކުރި ނަފްސާނީ އަސަރުތަކަށް އަލިއަޅުވާލަމުން ބުނެފައިވަނީ، އެއް ސައިރަންގެ އަޑަށްފަހު އަނެއް ސައިރަންގެ އަޑު އިވެމުންދާ ކަމަށާއި، ރައްކާތެރިކަން ހޯދުމަށް ބަންކަރުތަކަށް ވަނުމަށް ޒަޔަނިސްޓުން ދުވަމުންދާ މަންޒަރަކީ މިވަގުތުގެ ހަގީގީ ހާލަތު ކަމަށެވެ.

މި އޮޕަރޭޝަން ފަށާފައިވަނީ މިދިޔަ މަހުގެ ފަހުކޮޅު އިޒްރޭލާއި އެމެރިކާ ގުޅިގެން އީރާނަށް ދޭން ފެށި އުދުވާނީ ހަމަލާތަކާ ގުޅިގެން، އޭގެ ރައްދުގައެވެ.

މިހާތަނަށް ކުރިއަށްދިޔަ ބަދަލުހިފުމުގެ ހަމަލާތަކުގައި އައިއާރުޖީސީން ވަނީ އިޒްރޭލާއި އެމެރިކާގެ އަމާޒުތަކަށް އެތައް ސަތޭކަ ބެލިސްޓިކް އަދި ހައިޕަރސޮނިކް މިސައިލާއި، ހަމަލާދޭ ޑްރޯންތައް ބޭނުންކޮށްފައެވެ.

ހަތުރުވެރި ޑްރޯންތައް ވައްޓާލުން

މީގެ އިތުރުން، މިދިޔަ ހުކުރު ދުވަހު އައިއާރުޖީސީން ވަނީ ކުރިއަރާފައިވާ އެއަރ ޑިފެންސް ސިސްޓަމް ބޭނުންކޮށްގެން، އީރާނުގެ ވައިގެ ސަރަހައްދަށް ވަތް ފަސް ޑްރޯންއެއް ވައްޓާލާފައެވެ. އޭގެ ތެރޭގައި އޯބިޓަރ 4، ހާމީސް އަދި އެމްކިއު-9 ރީޕަރ މަރުކާގެ ޑްރޯންތައް ހިމެނެއެވެ.

އައިއާރުޖީސީން ފާހަގަކުރި ގޮތުގައި، މި އުދުވާނުތައް ފެށުނީއްސުރެ މިހާތަނަށް ޖާސޫސީ އަދި ހަމަލާދޭ 114 ޑްރޯން އެ ޖަމާއަތުގެ އެއަރ ޑިފެންސް ސިސްޓަމްތަކުން ވަނީ ހަލާކުކޮށްލާފައެވެ.

އައިއާރުޖީސީގެ އިންޒާރު ޒަޔަނިސްޓުންނަށް: 'ކަލޭމެންނަށް އަނދިރި ދުވަސްތަކެއް ދައްކާލާނަން'

މި ހަމަލާތަކާ އެކު، އިޒްރޭލުން ހިފާފައިވާ ބިންތަކުގައި ދިރިއުޅޭ ޒަޔަނިސްޓުންނަށް އައިއާރުޖީސީން ވަނީ ހީބްރޫ ބަހުން އިންޒާރުގެ މެސެޖުތަކެއް ފޮނުވަން ފަށާފައެވެ.

އެ މެސެޖުގައި ބުނެފައިވަނީ، "ﷲގެ އިރާދަފުޅާއެކު، ތިޔަބައިމީހުންނަށް އަހަރެމެން އަނދިރި ދުވަސްތަކެއް ދައްކާލާނަމެވެ. އެ ދުވަސްތަކުގައި ތިޔަބައިމީހުން ދިރިތިބުމަށް އެދި އާދޭސްކުރާނެއެވެ. ނަމަވެސް އެކަން ކާމިޔާބެއް ނުވާނެއެވެ." މިފަދައިންނެވެ.