އެފްއޭއެމް ވެޓަރަންސް ކަޕް: ހުއްރިއްޔާ ބަލިކޮށް، ހުޅުމާލެ ވެޓަރަންސް އަށް ރަނގަޅ ފެށުމެއް

މިހާރު ކުރިއަށްދާ އެފްއޭއެމް ވެޓަރަންސް ކަޕްގެ ގުރޫޕް ބީގައި ހުއްރިއްޔާ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ހުޅުމާލެ ވެޓަރަންސް ކުލަބުން ރަނގަޅު ފެށުމަކުން ފަށައިފި އެވެ. 

ހޯމަ ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު ހުޅުމާލެ ވެޓަރަންސް އިން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ހުޅުމާލެ ވެޓަރަންސް އިން އެއް ލަނޑު ޖެހިއިރު، އަނެއް ހަތަރު ލަނޑު ޖެހީ ދެ ވަނަ ހާފުގަ އެވެ. މި ހާފުގައި ހުއްރިއްޔާ އިން ވެސް ވަނީ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ހުޅުމާލެ ވެޓަރަންސް އަށް ލީޑު ނަގައިދިނީ މުޙައްމަދު ޒިޔާދު އެވެ. އޭގެ ފަހުން ދެ ވަނަ ހާފުގެ 35 ވަނަ މިނެޓުގައި މުޙައްމަދު ޒަރީފް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ހަތަރު މިނެޓު ފަހުން އެ ޓީމުގެ ތިން ވަނަ ލަނޑު ޖެހީ ޙުސެއިން ވިޝާލް އެވެ.

މެޗުގެ 47 ވަނަ މިނެޓުގައި އަޙުމަދު މުއާޒް ވަނީ ހުޅުމާލެ ވެޓަރަންސްގެ ހަތަރު ވަނަ ލަނޑު ޖަހައިފަ އެވެ. ހުޅުމާލެ ވެޓަރަންސް އިން ހަތަރު ލަނޑު ޖެހި ފަހުން، ހުއްރިއްޔާގެ ހަަމައެކަނި ލަނޑު ޖެހީ އަޙުމަދު ނައުޝާދު އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި، ހުޅުމާލެ ވެޓަރަންސްގެ ފަސް ވަނަ ލަނޑު ޖެހީ ނާފިއު މުޙައްމަދު ހާމިދު އެވެ.

ހުއްރިއްޔާ އާއި ހުޅުމާލެ ވެޓަރަންސްގެ އިތުރުން، ދެން މި ގުރޫޕުގައި އޮތީ ޔުނައިޓެޑު ވިކްޓަރީ އާއި، ބުރު ސްޕޯޓްސް ކުލަބު އަދި ޕޮލިސް ކުލަބެވެ. އެފްއޭއެމް އިން މިއަހަރުގެ ވެޓަރަންސް ކަޕް ބާއްވާއިރު، މުބާރާތުގައި ޖުމުލަ 10 ޓީމެއް ވާދަ ކުރެ އެވެ. ދެ ގުރޫޕަށް ބަހާލައިގެން މުބާރާތް ކުރިއަށް ގެންދާއިރު، ކޮންމެ ގުރޫޕެއްގައި އޮތީ ފަސް ޓީމެވެ.