އަދުގެ މުޖުތަމައު ގައި ފާހިޝް ކަންތައްތައް ފެތުރުމުގެ އެންމެ ބޮޑު ދައުރެއް އަދާކުރަނީ ނޫސް މަޖައްލާތަކާއި، ޓީވީތަކާއި، ރޭޑިއޯ ތައް: ޚުތުބާ

އަދުގެ މުޖުތަމައުގައި ފާހިޝް ކަންތައްތައް ފެތުރުމުގެ އެންމެ ބޮޑު ދައުރެއް އަދާކުރަނީ ނޫސް މަޖައްލާތަކާއި، ޓީވީތަކާއި، ރޭޑިއޯ ތައް ކަމަށް ހުކުރު ޚުތުބާ ގައި ބުނެފި އެވެ.

''ފާޙިޝް އަމަލުތަކާ ދުރުހެލިވުން'' މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ޚުތުބާ ގައި ބުނީ، ފާހިޝް ކަންތައްތަކާ ދުރުހެލިވުމުގެ އިތުރަށް އެ ފަދަ ކަންތައްތައް ފެތުރުމާއި އެ ފަދަ ކަންކަމަށް މަގުފަހިކޮށްދޭ ހުރިހައި ކަމެއް ވެސް އިސްލާމް ދީނު ގައި ހަރާމް ކުރައްވައިފައިވާ ކަމަށެވެ.

ޒިނޭގެ ހަޑިމުޑުދާރު ފާހިޝް އަމަލު ހަރާމްކަމުގެ ވާހަކަ ބަޔާންކުރުމުގެ ކުރީގައި އެ ކަމަށް މަގުފަހިކޮށްދޭ ހަރާމް ބެލުންތަކުން ދުރިހެލިވުމަށް އަންގަވައިފައިވާ ކަމަށެވެ.

ފާހިޝް ކަންތައްތައް އަަރައިގަންނަ މީހުންނާއި، މުސްލިމުންގެ ތެރޭގައި ފެތުރުމަށް ލޯބިކުރާ މީހުންނަށް ދުނިޔެއާއި އާޚިރަތުގައި ވެސް ބޮޑުވެގެންވާ އަޒާބު ހުރިކަން ޚުތުބާގައި ވަނީ ހަދުމަ ކޮށްދީފަ އެވެ.

ގައުމެއްގައި ފާހިޝް ކަންތައްތައް ފެތުރި އާންމުވުމަކީ އެ ތަނަކަށް ﷲގެ ކޯފާއަންނާނޭ ސަބަބެއްކަން ބަޔާންކުރައްވައި ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ހަދީޘްކުރައްވައިފައި ވެއެވެ. ‏(لَمْ تَظْهَرِ الْفَاحِشَةُ فِيْ قَوْمٍ قَطُّ حَتَّى يُعْلِنُوْا بِـهَا، إِلَّا فَشَا فِيْهِمُ الطَّاعُوْنُ وَالْأَوْجَاعُ الَّتِيْ لَمْ تَكُنْ مَضَتْ فِيْ أَسْلَافِهِمُ الَّذِيْنَ مَضَوْا‏) މާނައީ: "ބައެއްގެ ތެރޭގައި ފާޙިޝް ކަންތައްތައް ފެތުރި ފާޅުވެ، އެ ބަޔަކު އެ ކަން ޢާއްމުކޮށްފި ނަމަ، އިސްވެދިޔަ އެ މީހުންގެ ކާބަފައިންގެ މެދުގައި ފެތުރިފައިނުވާ ޠާޢޫނު ބައްޔާއި ކެކުޅުންތައް އެބައިމީހުންގެ ތެރޭގައި ފެތުރޭ ހުއްޓެވެ.

ހުކުރު ޚުތުބާ

އަދުގެ މުޖުތަމައުތަކަށް އިޝާރާތް ކޮށް ޚުތުބާ ގައި ބުނީ ފާހިޝް ކަންތައްތައް ފެތުރުމުގެ އެންމެ ބޮޑު ދައުރެއް އަދާކުރަނީ މީސްމީޑިއާގެ ވަސީލަތްތައް ކަމަށް ކަމަށެވެ.

އެގޮތުން ނޫސްމަޖައްލާ ތަކާއި، ޓީވީތަކާއި، ރޭޑިޔޯތަކާއި، އިޖުތިމާއީ އެކިއެކި މަންސަތައް މެދުވެރި ކޮށް ކަމަށާއި، އެއްވެސް ލަދެއްނެތި، ދުވާލެއް ރޭގަނޑެއް ބެލުމެއްނެތި، ހިތުހުރިހައި ވާހަކަތަކާއި، އޯޑިއޯތަކާއި ވީޑިޔޯތައް، އެ ވިއުގަތަކުގައި ފަތުރާ ކަމަށް ޚުތުބާގައި ބުނެފައިވެ އެވެ. އަދި ކުޑަކުދިންނާއި، ޒުވާނުންނާއި، އެންމެހައި އަފުރާދުންނަށް އެއިން ލިބިދާނޭ ގެއްލުމާއި ހަލާކަށް ނުބަލާ ކަމަށާއި، ޝަރުއީ މިންގަނޑުތަކަށް ރިއާޔަތް ނުކުރާ ކަމަށެވެ.

މީގެ އިތުރުން މި މަންސަތަކުގެ މަސްއޫލުވެރީންނާއި އެޑިޓަރުން މިކަންކަމަށް ފަރުވާތެރިވެ، ފާހިޝް ކަންކަމަށް މަގުފަހިވާ ތަކެތި ފެތުރުމާއި އާންމު ކުރުމުން ދުރުހެލިވާން ޖެހޭ ކަމަށެވެ. ޝަރުއީ ގޮތުން ހުއްދަ ނޫން މަންޒަރު ތަކާއި އަޑުތައް ނުހިމެނޭ ގޮތަށް، ޝަރުއީ އިމުގެ ތެރެއިން މީޑިޔާގެ ވަސީލަތްތައް ބޭނުން ކުރުމަށް، އެ ތަންތަނުގައި މަސައްކަތް ކުރާ މުވައްޒަފުންނަށް މަގު ދައްކައިދީ ނަސޭހަތް ތެރިވާން ޖެހޭ ކަމަށް ޚުތުބާ ގައި ބުނެފައިވެ އެވެ.

ޚުތުބާ ގައި ވަނީ ފާހިޝް އަމަލުތަކާ ދުރުހެލިވެ ރަނގަޅު ތައުބާ އަކުން އަވަހަށް ތައުބާވުމަށް ގޮވާލާފަ އެވެ.