އީރާންއާ ދެކޮޅަށް ހަނގުރާމަ ކުރުމަށް، ރޮމޭނިއާގައި ހުރި އެމެރިކާގެ ބޭސްތައް ބޭނުން ކުރުމުގެ ހުއްދަ އެ ޤައުމުގެ ރައީސް ދެއްވައިފި

އެމެރިކާާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، ރޮމޭނިއާގައި ހުރި އެމެރިކާގެ ބޭސްތައް ބޭނުން ކުރުމުގެ ހުއްދަ އެ ޤައުމަށް ދީފައިވާ ކަމަށް، ރޮމޭނިއާގެ ރައީސް ނިކުސޯ ދާން ވިދާޅުވެއްޖެ އެވެ. 

ބުދަ ދުވަހު ރޮމޭނިއާ އިން ނިންމާފައި ވަނީ، އީރާންއާ ދެކޮޅަށް ކުރިއަށް ގެންދާ ހަނގުރާމައިގައި ބައިވެރިވާ އެމެރިކާގެ ވައިގެ ހަނގުރާމަ އުޅަނދު ތަކަށް ތެޔޮ ލިބޭނެ ގޮތަށް، އިރުމަތީ ޔޫރަޕުގައި އޮންނަ އެ ޤައުމުގެ އެއަރބޭސް ބޭނުން ކުރުމުގެ ހުއްދަ ދިނުމަށެވެ. 

ރޮމޭނިއާގެ ޤައުމީ ސަލާމަތާ ބެހޭ އެންމެ މަތީ މަޖިލީހުން އެ މައްސަލަ ބަލައި ނިންމުމަށް ފަހު، ޤާނޫނު ހަދާ މަޖިލީހުން ވެސް ވަނީ އެކަމަށް ތާއީދު ކޮށްފަ އެވެ. މަޖިލީހުގެ ބައްދަލުވުމަށް ފަހު ރޮމޭނިއާގެ ރައީސް ނިކުސޯ ދާން ނެރުއްވި ބަޔާނެއްގައި ވިދާޅުވީ، މިއީ ރޮމޭނިއާގައި އެމެރިކާގެ ސިފައިންނާއި، އެ ޤައުމުގެ ހަނގުރާމައިގެ ވަސީލަތްތައް ވަގުތީ ގޮތުން ތަހުލީލު ކުރުން ކަމަށެވެ.

މީގެ އިތުރުން ރޮމޭނިއާގެ ރައީސް ވިދާޅުވީ އެ ފިޔަވަޅު ފެށުމުން، އެމެރިކާގެ ވައިގެ އުޅަނދު ތަކަށް ތެޔޮ ލިބޭނެ އިންތިޒާމު ހަމަޖައްސައި ދޭނެ ކަމަށެވެ. އަދި ނަޒާހަތްތެރިކަމާ އެކު ވަސީލަތްތަކާއި ސެޓަލައިޓް މެދުވެރިކޮށް އޮޕަރޭޝަންތައް ކުރިއަށް ގެންގޮސް، ހަނގުރާމައިގެ ވަސީލަތްތައް ވެސް ރޮމޭނިއާގައި ބެހެއްޓޭނެ އިންތިޒާމު ހަމަޖެހޭނެ ކަމަށް އެ ޤައުމުގެ ރައީސް ވިދާޅުވެފައިވެ އެވެ. 

މިއީ އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ އިތުރަށް ފުޅާކޮށް، ވަރުގަދަ ކުރަމުން އަންނަ ދަނޑި ވަޅެއްގައި ރޮމޭނިއާ އިން ނިންމާފައިވާ ނިންމުމެކެވެ. މި ހަނގުރާމައިގައި އެމެރިކާ އިން ބޭނުން ކުރަމުން ދަނީ ދުރުގައި ހުންނަ ޓާގެޓު ތަކަށް ހަމަލާ ދިނުމަށް ބޭނުން ކުރާ ބޮޑެތި ވައިގެ އުޅަނދު ތަކެވެ. 

ރޮމޭނިއާ އަކީ ނޭޓޯގެ ވެސް މެމްބަރު ޤައުމެކެވެ. އެހެންކަމުން، އެމެރިކާ އާއެކު ސަރަހައްދީ ސަލާމަތާ ބެހޭ ގިނަ މަސައްކަތް ތަކެއް ރޮމޭނިއާ އިން އަންނަނީ ކުރަމުންނެވެ. ނަމަވެސް، ރޮމޭނިއާގެ މި ނިންމުމާ ގުޅިގެން ބައިނަލްއަޤުވާމީ މުޖުތަމައުން އަންނަނީ އެކަމުގެ ކަންބޮޑުވުން ފާޅު ކުރަމުންނެވެ.