ހަނގުރާމަ ފެށުނު ފަހުން ބަހްރެއިން އިން މިހާތަނަށް 300 ޑްރޯން އާއި މިސައިލް ހުއްޓުވައިފި

އެމެރިކާ އާއި އިޒްރޭލުން އީރާންއާ ދެކޮޅަށް ފެށި ހަނގުރާމައިގެ ސަބަބުން މެދު އިރުމަތީގެ މަސްރަހު ވަރަށް ބޮޑަށް ހޫނުވެފައިވާއިރު، މިހާތަނަށް 300 އެއްހާ ޑްރޯން އާއި މިސައިލް ހުއްޓުވާފައިވާ ކަމަށް، ބަހްރެއިންގެ ދިފާއީ ބާރުން ހާމަ ކޮށްފި އެވެ. 

ބަހްރެއިންގެ ޑިފެންސް ފޯސް އިން ނެރުނު ބަޔާނެއްގައި ބުނެފައި ވަނީ، ހަނގުރާމަ ފެށުނު ފަހުން މިހާތަނަށް އެ ޤައުމުގެ ވައިގެ ސަރަހައްދަށް ވަންނަން އުޅުނު 112 މިސައިލް އާއި، ގާތް ގަނޑަކަށް 186 ޑްރޯން ކާމިޔާބު ކަމާ އެކު ހުއްޓުވައި، ވައްޓާލާފައިވާ ކަމަށެވެ. މިއީ ސަރަހައްދީ ރައްކާތެރިކަން ދެމެހެއްޓުމަށް އެ ޤައުމުގެ އަސްކަރިއްޔާ އިން ކުރަމުންދާ މަސައްކަތުގެ ތެރެއިން ހޯދާފައިވާ ކާމިޔާބީއެއްގެ ގޮތުގައި ބަހްރެއިން އިން ވަނީ ސިފަ ކޮށްފަ އެވެ. 

މިއީ ކޮން ފަރާތަކުން ފޮނުވާލައިގެން ހުއްޓުވާފައިވާ ތަކެއްޗެއް ކަމެއް، ނުވަތަ ކޮން މިސްރާބަކުން އައި އެއްޗެއް ކަމެއް ބަހްރެއިންގެ އަސްކަރިއްޔާ އިން ސީދާ ހާމަ ކޮށްފައި ނުވެ އެވެ. ނަމަވެސް، މެދު އިރުމަތީގެ މަސްރަހު ނުތަނަވަސްވެފައިވާ މި ދަނޑި ވަޅުގައި، ބަހްރެއިން އަކީ އެމެރިކާގެ ފަސް ވަނަ ފްލީޓު ޤާއިމު ވެފައިވާ ޤައުމަކަށް ވާއިރު، އެ ޤައުމުގެ ދިފާއީ ނިޒާމު ވަނީ ވަރަށް ބޮޑަށް ވަރުގަދަ ކޮށްފަ އެވެ. 

މީގެ އިތުރުން ބަހްރެއިންގެ ދިފާއީ ބާރުން ބުނި ގޮތުގައި މިސައިލް ތަކާއި ޑްރޯންތައް ދެނެ ގަނެ، އެ ތަކެތި ހުއްޓުވުމަށްޓަކައި އެންމެ ޒަމާނީ ޓެކްނޮލޮޖީ އާއި ރާޑަރު ސިސްޓަމްތައް ދަނީ ބޭނުން ކުރަމުންނެވެ. އަދި ޤައުމުގެ އިސްތިޤުލާލާއި، ރައްޔިތުންގެ ސަލާމަތްތެރިކަން ކަށަވަރު ކުރުމަށްޓަކައި އަސްކަރިއްޔާ އިން 24 ގަޑިއިރު ފާރަވެރި ވަމުންދާ ކަމަށް ވެސް އެ ޤައުމުން ބުނެފައިވެއެވެ. 

މެދު އިރުމަތީގައި ހިނގަމުންދާ ހަނގުރާމައާ ގުޅިގެން ސަރަހައްދީ ޤައުމު ތަކަށް އޮތް ނުރައްކާ ބޮޑުވެފައިވާއިރު، ބަހްރެއިން އިން މި ހާމަ ކުރި ތަފާސް ހިސާބު ތަކުން ދޭހަވަނީ އެ ސަރަހައްދުގެ ވައިގެ ސަރަހައްދުގައި އޮތް ނުރައްކާތެރި ކަމުގެ މިންވަރު ކަމަށް މާހިރުން ފާހަގަ ކުރެ އެވެ.