އީރާންގެ އަންހެން ކުދިންގެ ސްކޫލް އަށް ދިން ހަމަލާ، އިޓަލީގެ ބޮޑު ވަޒީރު ކުށްވެރި ކުރައްވައިފި
12 މާރިޗު 2026 | ބުރާސްފަތި 09:44އިޓަލީގެ ސެނެޓުގައި ވާހަކަ ދައްކަވަމުން ބޮޑު ވަޒީރު މެލޯނީ ވިދާޅުވީ، މިނާބްގައި ހުންނަ އަންހެން ކުދިންގެ ސްކޫލް އަށް ދިން ހަމަލާ އިޓަލީގެ ސަރުކާރުން ވަރަށް ބޮޑަށް ކުށްވެރި ކުރާ ކަމަށް. އަދި މިއީ ކުށްވެރި ކުރަން ޖެހޭ ހަމަލާއެއް ކަމަށް ވެސް އެކަަމަނާ ވަނީ ސިފަ ކުރައްވާފައި.
އިޓަލީގެ ބޮޑު ވަޒީރު ޖޯޖިއާ މެލޯނީ | ގެޓީ އިމޭޖަސް
އީރާންގެ ދެކުނު މިނާބްގައި ހުންނަ އަންހެން ކުދިންގެ ސްކޫލް އަކަށް ދިން ބޮމުގެ ހަމަލާ، އިޓަލީގެ ބޮޑު ވަޒީރު ޖޯޖިއާ މެލޯނީ ކުށްވެރި ކުރައްވައިފި އެވެ.
އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގައި ވަނީ އެ ސްކޫލް އަށް އަމާޒުކޮށް ހަމަލާ ދީފަ އެވެ. އެ ހަމަލާގައި ސްކޫލްގެ ގިނަ އަދަދެއްގެ ކުދިން ތަކެއްގެ އިތުރުން، އާންމު ބަޔަކު ވެސް ޝަހީދުވެފައިވާ ކަމަަށް ރިޕޯޓުތައް ބުނެ އެވެ.
އިޓަލީގެ ސެނެޓުގައި ވާހަކަ ދައްކަވަމުން ބޮޑު ވަޒީރު މެލޯނީ ވިދާޅުވީ، މިނާބްގައި ހުންނަ އަންހެން ކުދިންގެ ސްކޫލް އަށް ދިން ހަމަލާ އިޓަލީގެ ސަރުކާރުން ވަރަށް ބޮޑަށް ކުށްވެރި ކުރާ ކަމަށެވެ. އަދި މިއީ ކުށްވެރި ކުރަން ޖެހޭ ހަމަލާއެއް ކަމަށް ވެސް އެކަަމަނާ ވަނީ ސިފަ ކުރައްވައިފަ އެވެ.
އެއާ އެކު ބޮޑު ވަޒީރު މެލޯނީ ވަނީ، އެ ހާދިސާގައި ޝަހީދުވި ކުދިންނާއި، އެ ކުދިންގެ އާއިލާތަކާ އެކު އިޓަލީ ސަރުކާރު އޮތް ކަަމަށާއި، އެ އާއިލާ ތަަކަށް ހަމްދަރުދީ ވާ ކަމަށް ވެސް ވިދާޅުވެފަ އެވެ. މިހާތަނަށް މި ހާދިސާގެ ޒިންމާ އެއްވެސް ބަޔަކު ނަގާފައި ނުވާއިރު، މެލޯނީ ވަނީ އެކަމުގެ ޒިންމާ ނަގަން ޖެހޭ ބަޔަކު ވީ އެންމެ އަވަހަކަށް ދެނެ ގަންނަން ޖެހޭ ކަމަށް ވެސް ވިދާޅުވެފަ އެވެ.
އެ ހަމަލާއާ ގުޅިގެން އީރާން އިން ބުނެފައި ވަނީ، އެކަމުގެ ޒިންމާ ނަގަން ޖެހޭނީ އެމެރިކާ އާއި އިޒްރޭލް އިން ކަމަށެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ އެއީ އީރާން އިން ދިން ހަމަލާއެއް ކަމަށް ވިދާޅުވެފަ އެވެ. އިޒްރޭލް އިން ބުނެފައި ވަނީ، އެ ހަމަލާއާ އެ ޤައުމާ އެއްވެސް ގުޅުމެއް ނެތް ކަމަށެވެ.
މިދިޔަ ހޯމަ ދުވަހު ޓްރަމްޕް ވިދާޅުވެފައި ވަނީ، އެ ހަމަލާގެ ތަހުގީގެއް އެމެރިކާ އިން ކުރިއަށް ގެންދާ ކަމަށެވެ. އީރާންގެ މީޑިއާ ތަކުން ބުނެފައިވާ ގޮތުގައި އެ ހަމަލާގެ ސަބަބުން މަދުވެގެން 165 މީހަކު ވަނީ ޝަހީދުވެފަ އެވެ. މިއީ އެމެރިކާ އާއި އިޒްރޭލް އިން އީރާން އަށް ހަމަލާ ދޭން ފެށި ފުރަތަމަ ދުވަހު ދިން ހަމަލާ އެކެވެ.
މަސްދަރު: އޭއެފްޕީ
