ހިޒްބުﷲއިން އިޒްރޭލަށް ވަރުގަދަ ރޮކެޓް ހަމަލާތަކެއް ދީފި

އިޒްރޭލުން ލުބުނާނުގެ އިސްތިގުލާލަށް އަރައިގަނެ، ހިންގަމުންދާ އަމަލުތަކަށް ރައްދު ދިނުމުގެ ގޮތުން އިޒްރޭލުގެ އެކި އަމާޒުތަކަށް ގިނަ އަދަދެއްގެ ރޮކެޓް ހަމަލާތަކެއް ފޮނުވާލާފައިވާ ކަމަށް ހިޒްބުﷲ އިން އިއުލާންކޮށްފިއެވެ.

ލުބުނާނުގެ މި ޖަމާއަތުން ބުދަ ދުވަހު ވަނީ، އިޒްރޭލުން ހިސޯރުކޮށްފައިވާ ފަލަސްތީނުގެ ބިންތަކަށް އަމާޒުކޮށް "އޮޕަރޭޝަން އީޓަން ސްޓްރޯ"  ގެ ނަމުގައި އަސްކަރީ އޮޕަރޭޝަނެއް ފަށާފައިވާކަން ހާމަކޮށްފައެވެ.

ހިޒްބުﷲ އިން ބުނި ގޮތުގައި މި އޮޕަރޭޝަނަކީ ލުބުނާނުގެ ވެރިރަށް ބެއިރޫތުގެ ދެކުނު ސަރަހައްދުތައް ހިމެނޭހެން، އެ ގައުމުގެ އެތައް ސިޓީއަކަށާއި އަވަށްތަކަށް އިޒްރޭލުން ދެމުންދާ ހަމަލާތަކަށް ބަދަލުހިފުމުގެ ގޮތުން ހިންގާ އޮޕަރޭޝަނެކެވެ.

އެ ޖަމާއަތުން ބުނީ، ލުބުނާނުގެ ބޯޑަރު ކައިރީގައިވާ އިޒްރޭލުގެ ޣައިރުގާނޫނީ އާބާދީތަކުގެ ތެރެއިން، ހުސްކުރުމަށް މީގެ ކުރިން އިންޒާރު ދީފައިވާ ސަރަހައްދުތަކަށް އެ ޖަމާއަތުގެ މުޖާހިދުން ރޮކެޓް ހަމަލާތައް ދީފައިވާ ކަމަށެވެ.

މި އިންޒާރު ދީފައިވަނީ ބޯޑަރުން ފެށިގެން ފަސް ކިލޯމީޓަރުގެ ރޭޑިއަސްއެއްގައި ހިމެނޭ އާބާދީތަކަށް ކަމަށްވެސް އެ ޖަމާއަތުން ފާހަގަކުރިއެވެ.

ހިޒްބުﷲ އިން ހަމަލާ ދިން އާބާދީތަކުގެ ތެރޭގައި ކިރްޔަތު ޝްމޯނާ އާއި ނަހަރިއްޔާ ހިމެނޭ ކަމަށް އެ ޖަމާއަތުން ބުންޏެވެ.

މީގެ އިތުރުން، އިޒްރޭލުން ހިފާފައިވާ ބިންތަކުގެ އުތުރު ސަރަހައްދުތަކުގައި ހުރި އިޒްރޭލުގެ އަސްކަރީ އިންފްރާސްޓްރަކްޗާތަކަށް ވެސް ރައްދު ހަމަލާތައް ދީފައިވާ ކަމަށް ހިޒްބުﷲ އިން ރިޕޯޓްކޮށްފައިވެއެވެ.

"މުޖާހިދުން ވަނީ ހިފާފައިވާ ހައިފާ ސިޓީގެ އިރުއުތުރުގައި ހުންނަ މިސްގަވް ބޭސްއަށާއި، ޔޯޑިފަޓް މިލިޓަރީ އިންޑަސްޓްރީޒް ކުންފުންޏަށް އަމާޒުކޮށް އެތައް ރޮކެޓެއް ފޮނުވާލާފައި،" ހިޒްބުﷲ އިން ނެރުނު ބަޔާނުގައިވެއެވެ.

މި ރޮކެޓް ހަމަލާތަކަކީ އިޒްރޭލުން އެންމެ ފަހުން ފެށި އުދުވާނަށްފަހު، ހިޒްބުﷲ އިން އެއްފަހަރާ ފޮނުވާލި އެންމެ ވަރުގަދަ އަދި އެންމެ ގިނަ ރޮކެޓް ހަމަލާތައް ކަމަށް ސިފަކޮށްފައިވެއެވެ.

މި މަހުގެ ކުރީކޮޅު ހިޒްބުﷲގެ ސެކްރެޓަރީ ޖެނެރަލް ޝައިޚް ނައީމް ގާސިމް ވިދާޅުވީ، މިއީ އެއް އަހަރަށްވުރެ ގިނަ ދުވަހު ކެތްތެރިކަން އިސްކުރުމަށްފަހު ދިން ހަމަލާތަކެއް ކަމަށާއި، އިޒްރޭލުގެ އުދުވާނާ ކުރިމަތިލުމުގައި ކެތްތެރިކަމުގެވެސް ހައްދެއް އޮންނާނެ ކަމަށް ތަކުރާރުކޮށް އިންޒާރު ދީފައިވާނެ ކަމަށެވެ.

ޝައިޚް ގާސިމް ފާހަގަކުރެއްވި ގޮތުގައި، އެއް އަހަރާއި ތިން މަސް ދުވަސް ވަންދެން އިޒްރޭލާއި އެމެރިކާގެ ދުޝްމަނުން ވަނީ އުދުވާން ކުރިއަށް ގެންގޮސްފައެވެ. އަދި 2024 ނޮވެމްބަރު 27 ގައި ލުބުނާނު ސަރުކާރާއެކު އެއްބަސްވި ހަނގުރާމަ ހުއްޓާލުމުގެ އެއްބަސްވުމަށް ހިޒްބުﷲ އިން އިހުތިރާމް ކުރި ނަމަވެސް، އިޒްރޭލުން އެ އެއްބަސްވުމުގެ އެއްވެސް މާއްދާއަކަށް އަމަލުކޮށްފައި ނުވާ ކަމަށް އޭނާ ވިދާޅުވިއެވެ.

އިޒްރޭލާއި ހިޒްބުﷲ އާ ދެމެދު އެއްބަސްވުމަކަށް އައީ، ލުބުނާނުގެ އެތައް ހާސް ބައެއްގެ ފުރާނަ ގެއްލިގެންދިޔަ ވަރުގަދަ ހަމަލާތައް ހުއްޓާލުމަށް އިޒްރޭލުން ވައުދުވުމާ ގުޅިގެންނެވެ.